Luka 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Musese wa mutongeeli wa ulugu wikamigua

¹ Pĩna nukondia kukuzitambula inkaani zaakue zensi muakutuĩ a antu, nũingĩla muKapelinaũmũ.

² Numusese wa mutongeeli wa ĩlasi gyana, umuĩ alĩ mulemeeligue piipĩ kwikia, naalĩ muloogekigue nduyo.

³ Pĩna nũigia impola za kĩYesu, nutuma kumuakue anampala a Ayahũdi kukumulompa waaze wamukamie umusese waakue.

⁴ Pĩna naapika kwa kĩYesu naĩĩ kumupeepia naaũga, “Yumũjĩpĩĩle umutendele yaasio

⁵ kuitĩ umĩloilue ĩndugu yĩĩtu, nduyo nukuzengelia ishũnagogi liĩtu.”

⁶ Paapo ũYesu nuenda palumuĩ ndĩo. Pĩna nupigamĩĩla piipĩ nĩnumba yaakue, umutongeeli wa ĩlasi gyana nutuma asuaĩĩa kumuakue numuĩĩla, “Shekulu uleke kĩkunkunalia, kuitĩ sika injĩpĩĩle ĩne ue wingĩle mwityembe liane.

⁷ Luulo gua, aza nĩoonie kĩna sika injĩpĩĩle ĩne uneene kwiiza kumuako; ĩpa tambula ulukaani udũũ, numusese waane ukikamia.

⁸ Kuitĩ ĩne nineene nĩmuntu numuĩĩkue nsĩlĩlĩ ya usũũmi wa kĩtemi, ntĩĩte ĩĩlaasi naĩĩlĩ nsĩlĩlĩ yaane; nukumuĩĩlaa uyu, ‘Lenda,’ ukuendaa; numuua, ‘Nzuu,’ ukuuzaa; nukumusese waane, Tenda itĩ ukutendaa.”

⁹ ũYesu pĩna nũigia izi numukulĩlua, nulĩkea iyũmbĩ naalĩ lyumutiatile, nuũga “Namuĩĩla inie, sunga muĩSilaeli sika nalaona nĩnainiino uusuĩĩle naukulu kĩna uu.”

¹⁰ Nĩaasio naalĩ atumue pĩna naashooka kukaa naamuagaana umusese wakamagiaa.

Muana wa mukiĩlua mutũka nwa kuNaini wiiiukigua

¹¹ Pembele nulongola sunga kukaa nyukuĩtaguaa Naini, nĩamanigua akue alĩ ĩtiatile nunduyo palumuĩ niyũmbĩ kyulu.

¹² Pĩna nusũgamĩĩla palyumulango lya kaa, paasio alĩ ukoolĩ muimba mukenkue kunzi, muana wing'ene kwa kĩnina naalĩ mukiĩlua, nĩantu iingĩ a kaa alĩ yĩpalumuĩ nduyo.

¹³ ũShekulu pĩna numuona, numukolelua kĩsuusu, numuĩĩla “Lekilĩla.”

¹⁴ Nusũgamĩĩla nulĩamba ikyenkelo, ĩaasio naalĩ alĩkenkile naĩĩmĩka. Nuũga, “Musumbatĩ nakuĩĩla, Uuka!”

¹⁵ uMuimba nauuuka, nwikyalansa, nuandia kwitambula. Numupeela unina waakue

¹⁶ Tũlũ naingĩĩlua nuooa, naĩĩ kumukulia uNzua naiũga “Munakĩdagu mukulu wigyelelaa kunsĩĩtu;” kangĩ, “uNzua waagaanaa ĩantu aakue.”

¹⁷ iMpola zaakue izi nazishapatĩla mu Uyahũdi wensi numunsĩĩ tũlũ nazipilimĩkĩlĩĩlie.

Yohana Mubadĩĩzia

¹⁸ ĩAmanigua a kĩYohana naamutualĩla ĩzaasio tũlũ.

¹⁹ Paapo uYohana nuĩĩta abĩlĩ muamanigua aakue, nuatuma kwa kĩYesu nukolia “Ue uuene unuasio nwijile, katia kumulaaĩĩle wĩngĩ?”

²⁰ Nindĩo pĩna naapika kumuakue naaũga, “uYohana Mubadĩĩzia ukutumile kumuako uũgile itĩ Ue uuene nwijile katia kumulaaĩĩle wĩngĩ.”

²¹ Nityũngo lĩĩlo-lĩĩloo alĩ waakamilie iingĩ ĩmauluĩle maao ninjago nĩmasĩĩmuĩ, nĩapokũ iingĩ nualaĩlia.

²² Paapo nushookeelia nuaĩĩla, “Lendĩ, mumuĩĩle uYohana namuzioonie nukukuziigia ĩapokũ iona, ĩanakĩtele igenda, ĩanamatana ieeligua, ĩanakĩlĩmba iiigia, ĩakiu iiiukigua, ĩatũka itanantĩligua impola na Nziiza.

²³ Muliukũ unuasio nasika mukũmpigue kunsooko yaane.”

²⁴ Pĩna nalega naalĩ atumue nuYohana, nuandia kukumaĩĩla ĩmaũmbĩ impola za kĩYohana, “Alĩ mupũnile kwienda kumbuga kwilaaa yaani? Lunangine naalĩ lwishũngũsigua nĩnzega?

²⁵ Ĩpa alĩ mupũnile kwienda kwilaaa yaani, muntu namujialue intiila nantitimũne? Laaĩ, ĩantu naajialile intiila za ukulu, naakulĩaa kumamona akoolĩ mumazumba ma kĩtemi.

²⁶ Ĩpa alĩ mupũnile kwienda kwilaaa yaani? munakĩdagune? Eeze namuaĩĩla inie, nukĩlile munakĩdagu.

²⁷ Uyu wayu naalĩ muandĩkĩlue izi, ‘Laaa, namutuma umutumua waane ntongela ya usiu waako, nukijĩpĩĩlia ĩnzĩla yaako ntongela yaako.’”

²⁸ Nineene namuĩĩla, “Muaasio naalĩ alelue nĩasungu kutilĩ namukulu kwikĩla uYohana; ĩpa namuniino muutemi wa kĩNzua ingĩ mukulu kwikĩla uyo.”

²⁹ (Nĩantu tũlũ nĩasangulia-koodi pĩna naigyũlia izi naamĩkuĩla ĩkulukuuluu ya kĩNzua, kuitĩ abadĩzĩgue kuubadiizo wa kĩYohana.

³⁰ Ĩpa ĩApalisayo nĩanakialo naalĩsiita ishiio lya kĩNzua mumiao, kuitĩ sika alĩ abadĩĩzigue nunduyo.)

³¹ ũShekulu nuũga, “Nĩapianĩkĩĩlie ĩantu a wĩleli uu niyaani, ndĩo ĩpianile niyaani?”

³² Ĩpianile nĩang'inia naikyalansile pigyulaanĩlo nukukĩĩta eene kueene naiũga, aza kukumukuĩla inie impembe ĩpa sika mwaina; aza kukomilie ĩsuuka ĩpa sika mwalĩla.

³³ Kuitĩ uYohana Mubadĩĩzia nuuza sika alukulĩaa uugalĩ katia kwikopa umubinio, niniinie namuũga, munalĩsĩĩmuĩ.

³⁴ uMuana-muntu nuuza nwilĩa nukwikopa, niniinie namuũga, Laaĩ, mulakũ uyu, kangĩ mukopekia mubinio, musuamuua wa asangulia-koodi nĩanamĩlandu!

³⁵ Nĩmasala migyelĩĩle kĩna ma kulukuuluu kwĩaana aakue tũlũ.

ũYesu wipakua ĩmakũta mumĩgulu, nĩmpiani ya alĩa-mpaa abĩlĩ

³⁶ Muntu umuĩ wa Apalisayo alumusũgamĩlĩlie walĩe india kumuakue, nũingĩla munumba ya Mupalisayo, nwikyalansa pandia.

³⁷ Laaa, musungu umuĩ wa kaa niasio, naalĩ munamĩlandu, pĩna nuligia impola ya kĩna wikyalansile pandia munumba ya Mupalisayo, nuleeta kasali ka makũta,

³⁸ nuĩmĩka kunũma yaakue piipĩ nĩmĩgulu yaakue nũilĩla, nuandia kukumusonontekelia ĩmisholi mumĩgulu yaakue nukukuuĩpiagula kumatũmbĩ mityũe liakue, nuĩsunĩkia ĩmĩgulu yaakue nukukuĩpaka ĩmakũta.

³⁹ Ĩpa uMupalisayo nalumusũgamĩlĩĩlie pĩna nuona yaasio, nuũga munkolo yaakue, “uMuntu uyu kanga ĩazaa munakĩdagu azũjile kumumana umusungu uyu nukumuapaatia kĩna waani, kangĩ nduyo muntu kĩ, ya kĩna ingĩ, munamĩlandu.”

⁴⁰ ũYesu nushookeelia numuĩĩla, “Simoni, ntĩĩte lukaani lwa kukuĩĩla.” Nuũga “Lukaani kĩ, Mumania.”

⁴¹ Nuũga, “Muntu umuĩ nukupeelanaa ĩmpaa alutĩĩte antu abĩlĩ naalĩ alĩĩle ĩmpaa; umuĩ alulĩĩle magana mataano ma shilinge, nwa kabĩlĩ makumi mataano.

⁴² Nĩndĩo pĩna alĩ agila kya kumushookelia, nualekela alekilĩpa tũlũ uubĩlĩ waao. Muaasio naabĩlĩ nuĩmbi nukakumuloekigua?”

⁴³ uSimoni nushookeelia nuũga, “Nĩmbũge uyu namulekelue iingĩ.” Numuĩĩla “Ulamuĩle ĩtai.”

⁴⁴ Numupĩlukĩĩla umusungu, numuĩĩla uSimoni, “Wamuonaane umusungu uyu. Aza ningĩĩle munumba yaako; ĩpa uyu wansonontekelia ĩmisholi mumĩgulu yaane nukukuĩpiagula kumatũmbĩ mityũe liakue.

⁴⁵ Ue sika azunsunile, ĩpa uyu kwipũna pĩna ningĩlĩlaa, sika waleke kwinshunĩkia ĩmĩgulu yaane.

⁴⁶ Sika wampaka ĩmakũta mwityũe liane, ĩpa uyu azumpakile ĩmĩgulu yaane ĩmakũta.

⁴⁷ Kunsooko ĩĩ nakuĩĩla waleegelagiguaa ĩmĩlandu yaakue namingĩ kunsooko muloekigue; ĩpa nukuleegelagiguaa iniino, uyo ukuloaguaa iniino.”

⁴⁸ Paapo numuĩĩla umusungu, “Waleegelagiguaa ĩmĩlandu yaako.”

⁴⁹ Nĩaasio naalĩ ikyalansile pandia palumuĩ ninduyo naandia kukĩĩĩla eene kueene, “Waani uyu sunga waĩleegelania ĩmĩlandu.”

⁵⁰ Numuĩĩla umusungu, “uUsuĩĩli waako wakugũnaa, lenda nĩmatiliga.”