Luka 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Amanigua a muandio Iĩĩtua

¹ Pĩna iyũmbĩ nalĩmutuunĩĩlia kukulutegeela ulukaani lwa kĩNzua, uzo alĩ wĩĩmĩkile pikiki lya nanza ya Genesaleti;

² nuona mapango mabĩlĩ namĩĩlĩ pikiki, ĩpa ĩazui alĩ apũnaa kukumoogia ĩmazũĩlo maao.

³ Nũingĩla mwipyango lĩmuĩ, naalĩ lya kĩSimoni, numulompa walĩtelie iniino nikiki. Nũkyalansa numamania ĩmaũmbĩ pĩna alĩ wĩĩlĩ mũpyango.

⁴ Pĩna nukondia kwitambula, numuĩĩla uSimoni, “Tuala pĩna ishimu mumagumĩle ĩmazũĩlo maani muzũe.”

⁵ uSimoni nushookeelia numuĩĩla, “Shekulu, kuagile utiku pee, sika kwaligia kakĩntu, ĩpa kulukaani luako nĩkakumagumĩla ĩmazũĩlo.”

⁶ Pĩna naatenda itĩ, naailingĩĩla inshiĩ ningĩ sunga ĩmazĩĩlo maao namiitiĩka.

⁷ Naaangaazĩlia ĩakamantani aao naalĩ ĩĩlĩ mũpyaango lĩĩa, aaze kukuaalĩĩlia; naaaza naamijulia ĩmapango tũlũ mabĩlĩ sunga namiisheketela.

⁸ uSimoni Petelo pĩna nuona, nutũngama pamĩgulu ya kĩYesu nuũga “Lega kumuane Shekulu, kunsooko ĩne numukola mĩlandu.”

⁹ Kuitĩ alĩ wakulĩlaguaa uwingĩ wa nsiĩ naalĩ aligagiaa, uzo nĩĩĩa tũlũ naalĩ ĩpalumuĩ nduyo;

¹⁰ sunga gaa uYakobo nuYohana ĩaana a kĩZebedayo, naalĩ akamantani a kĩSimoni. ũYesu numuĩĩla uSimoni, “Lekioopoka, kwipũna nantende ukitũlijũaa antu.”

¹¹ Pĩna naamasũgamĩĩlia ĩmapango pikiki, naaleka tũlũ naamutiata.

Munamatana wikamigua

¹² Pĩna alĩ wĩĩlĩ mukaa ĩmuĩ ya kaa zaasio, laaa, alukoolĩ muntu naalukankatile ĩmatana. Pĩna numuona ũYesu, nugua uũndaala numupeepia nuũga, “Shekulu, malĩĩ umuloe, wishũũma kwinjelia.”

¹³ Paapo nuunansula umukono numuamba, nuũga, “Numuloe, eela!” Ĩkamuĩ ĩmatana namamulegela.

¹⁴ Numulagĩĩlia waleke kumuĩĩla kamuntu. Nuũga, “Ĩpa lenda wĩambie kumupolia, upũnie ĩsadaka ya kueligua kumuako kĩna uMusa alulagĩlĩĩlie, yĩĩ ukuĩli kumuao.”

¹⁵ Ĩpa impola zaakue nazishapatĩlĩkia; namĩlundĩĩla maũmbĩ makulu kwiigia nukwikamigua ĩmauluĩle maao.

¹⁶ Ĩpa uzo alukĩũnaa kumbuga nulompa.

mukiigyandi wikamigua

¹⁷ Palutondo lumuĩ lwa ntondo zaasio alĩ wimania alĩ akoolĩ Apalisayo nĩalangi alĩ ikyalansile naalĩ apũnile mũishaalĩ yensi ya Galĩlaya nuUyahũdi niYelusalemũ. Nuusũũmi wa kĩShekulu alĩ wĩpalumuĩ ninduyo kwikamia.

¹⁸ Laaa, antu alĩ amukenkile muntu muluĩle wa kukiigyandi muulĩlĩ, naasiia kukumũingĩlia munumba kukumuĩĩka pamuakue.

¹⁹ Pĩna naaulia ĩlioma lya kumũingĩlia kunsooko iyũmbĩ, naanankĩla kwityembe, naamũikia pakĩkololo muulĩlĩ waakue pakatĩ ntongela ya kĩYesu.

²⁰ Pĩna nuona uusuĩĩli waao, numuĩĩla “Mbuane, ĩmĩlandu yaako yeelagiguaa.”

²¹ Naandia ĩalangi nĩApalisayo kukĩsĩĩgia, naaũga “Aauyu waani nwitambula inkaani za utuki? Waani nusũũmile kwileegelania ĩmĩlandu isiititũla uNzua wing'ene udũũ.”

²² ũYesu pĩna nulĩnga uwĩsĩĩgia waao, nushookeelia, nuaĩĩla “Mwishĩĩga yaani munkolo zaani.

²³ Nayĩmbi naitontũ; kwiũga, ĩMĩlandu yaako yaleegagiguaa; katia kwiũga, ‘Uuka, ulongole.’

²⁴ Ĩpa gua, mumane kĩna uMuana-muntu utĩĩte usũũmi muna nsĩĩ kwileegelania ĩmĩlandu.” Numuĩĩla umukiigyandi, “Nakuĩĩla uuka, wĩtuĩke uulĩlĩ waako, ulongole kukaa.”

²⁵ Ĩkamuĩ nuĩmĩka ntongela yaao nwĩtuĩka waasio naaluugonĩĩle, nulongola kunumba yaakue, kunu nukumukulia uNzua.

²⁶ Ukulĩlua nauityapa tũlũ ensi naamukulia uNzua, naijulua nuooa, naaũga Kuoonie makula natende.

Wĩĩtua wa kĩLawi

²⁷ Izi pĩna nazikĩla, nulongola, numuona musangulia koodi ĩliina liakue Lawi, wikyalansile panumba ya usangulĩlio wa koodi, numuĩĩla, “Ntiata.”

²⁸ Nuleka yensi, nuuuka, numutiata.

²⁹ NuLawi numulũgĩla ndia ningĩ munumba yaakue. Muasio alĩ lĩkoolĩ yũmbĩ kyulu lya asangulia-koodi nĩnaĩngĩ naalĩ ikyalansile palumuĩ ndĩo pandia.

³⁰ ĩaPalisayo nĩalangi aao naĩĩ kuang'ung'untĩlia ĩamanigua aakue naaũga “Nĩkĩ mwilĩa nukwikopa palumuĩ nĩasangulia koodi nĩanamĩlandu?”

³¹ ũYesu nushookeelia nuaĩĩla Naapanga agila kansula ya mukilĩki, ĩpa naaluĩle

³² Sika nijile kukuĩĩta ĩanakulukuuluu, ĩpa ĩanamĩlandu, apele.

Kyolio Lya Kulaalĩla

³³ Nĩndĩo naamuĩĩla, “Nĩkĩ gua ĩamanigua a kĩYohana akulaalĩlaa nkua ningĩ nukwilompa, iio nĩamanigua a Apalisayo, ĩpa ĩaako akulĩaa nukwikopa?”

³⁴ ũYesu nuaĩĩla, “Mwishũũma mbii kukualaalĩlia ĩanawĩnga pĩna umutooli yĩensi nĩndĩo.”

³⁵ Ĩpa intondo zikiiiza pĩna ijilileegeligua umutooli; muntondo zaasio paapo ijilitũlilaalĩla.

³⁶ Kangĩ nuaĩĩla ĩmpiani, “Kutilĩ kaumuĩ nukutemaa ĩkĩtaaso muntiila nampia nukukukĩĩĩkĩla muntiila nankulukulu; kanga watende itĩ umĩtanduĩle ĩntiila nampia, nĩkĩtaaso kiasio sika kilĩganĩĩla nĩniasio nankulukulu.

³⁷ kangĩ kutilĩ kaumuĩ nukutaagĩlaa umubinio mũyĩndĩ ya ndĩlĩ naikulukulu; kanga wataagĩle, umubinio namupia ukakuitandula iyĩndĩ ya ndĩlĩ, nunduo wiitĩka, niyĩndĩ ya ndĩlĩ ioononeka.

³⁸ Ĩpa umubinioo namupia utaagĩlue mũyĩndĩ ya ndĩlĩ naipia.

³⁹ Sunga kutilĩkaumuĩ nukukopaa umubinio nwa kalĩ nukwiona nsula kwikopa namupia; kuitĩ ukuũgaa, ‘Nwa kalĩ muuza nangũlũ.’”