Luka 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwigemua kwakĩ Yesu

¹ ũYesu nwijuile uMuau Muelu, nushooka kwipũna kũYolidani, nutualua numuau kumbuga

² kuntondo makumi manĩĩ kunu nũgemua nũShetani muntondo zaasio sika alukulĩaa kakĩntu, sunga pĩna naziula nukolua nzala.

³ ũShetani numuĩĩla “malĩĩ ue ĩwĩ Muana wa kĩNzua, lĩĩĩle igyũe ĩlĩ lĩtũle ugalĩ.”

⁴ ũYesu numushookeelia nuũga, “Yandĩkue, umuntu sika witũla muumĩ kuugalĩ dũũ.”

⁵ Numunankĩlia kukiania, numulagĩĩla uutemi tũlũ wensi wa unkũmbigyulu kukatũngo kaniino.

⁶ ũShetani numuĩĩla, “Nĩkakukupeela uusũũmi uu tũlũ nuukulu waakue, kunsooko uwaasio ĩne numupeeegue, nineene nukumupeela tũlũ wensi muna numuloelue.

⁷ Iio gua, ue kanga wĩntekele, tũlũ mikitũla maako.”

⁸ ũYesu nushookeelia numuĩĩla, “Yandĩkue, Umutekele ũShekulu Nzua waako, ninduyo wing'ene dũũ umutumĩle.

⁹ numutuala kũYelusalemũ numuĩmĩkia kunsonge ya Numba ya kĩNzua, numuĩĩla, Malĩĩ ue ĩwĩ Muana wa kĩNzua, ĩsuulie pansĩ kwipũna ĩpa;

¹⁰ Kuitĩ yandĩkue, ‘Ukakukulagĩlĩlia ĩmalaĩka aakue akulindĩĩle,’

¹¹ Kangĩ, ĩkakukukenka mumĩkono yaao, Uleke kĩkũmpia umugulu waako mwigyũe.”

¹² ũYesu numushookeelia, “Itambulue Uleke kumugema ũShekulu Nzua waako.”

¹³ umupembelia, pĩna numala ĩmagemua mensi, numuleka kwityũngo.

ũYesu kuNazaleti

¹⁴ ũYesu nushooka ningũlũ za kĩMuau, nuenda kũGalilaya; impola zaakue nazikũmuuka munsĩĩ tũlũ nazĩpiipĩ.

¹⁵ Ninduyo alukumanagiaa mumasũnagogi maao nwikuligua nĩantu tũlũ.

¹⁶ Nupika kuNazaleti paasio pĩna alukulĩĩle, nũingĩla palutondo lwa wikyali mũshũnagogi kĩna alĩ ntendo yaakue, nuĩmĩka wasome.

¹⁷ Nupeegua ĩkĩtabũ kya munakĩdagu Yesaya. Pĩna nukĩkũnukula ĩkĩtabũ kiasio nuona pĩna yandĩkue,

¹⁸ “uMuau wa kĩShekulu wĩĩlĩ mumuane, kuitĩ wampakile ĩmakũta kukuatanantĩlia ĩatũka iMpola na Nziiza. Untumile nĩatanantĩlie ĩatũngua uutũnguĩlua waao, nĩapokũ aone kangĩ, nĩatende akolelua naalĩ atuunĩĩligue,

¹⁹ nuutanantie umuaka wa kĩShekulu namugombigue.”

²⁰ Nukĩkũnĩkĩla ĩkĩtabũ, numushookelia umwĩtumi, nwikyalansa. Tũlũ ensi naalĩ akoolĩ mũshũnagogi naamutuupĩĩlĩkia.

²¹ Nuandia kukuaĩĩla, “Nantende uandĩkua uu watimĩĩlagiguaa muakutuĩ aani.”

²² Tũlũ naamukuĩla iiza, naakulĩlua kunsooko ya nkaani za ukende naalĩ zipũnile mumulomo waakue, naaũga “Uyu sika wayu muana wa kĩYosepũne?”

²³ Nuaĩĩla “Tai, mukimbuĩla uung'enua uu, ‘Mukilĩki, ĩkamie uuue;’ inkaani zensi nalĩ kuziigilie kĩna alĩ zitendekile muKapelinaũmũ zitende nĩndĩĩpa gua muna nsĩĩ yaako.”

²⁴ Nuũga “Tai namuĩĩla, Kutilĩ kamunakĩdagu nukugombagiguaa munsĩĩ yaakue umuene.”

²⁵ Ĩpa tai namuĩĩla, “Pantondo za kĩElia alĩ akoolĩ akiĩlua iingĩ muĨsilaeli pĩna igyulu aligyalĩlue miaka ĩtatu nĩmieli mutandatu, pĩna nĩtũla nzala nkulu munsĩĩ yensi;

²⁶ Ĩpa uElia sika alĩ mutume kuumuĩ wa aasio isiititũla kumukiilua wa Salepita munsĩĩ ya Sidoni.

²⁷ Kangĩ alĩ akoolĩanamatana iingĩ muĨsilaeli pantondo za munakĩdagu Elisha, sunga kutilĩ naalĩ mueligue isiititũla uNamani wa kuSilia.”

²⁸ Tũlũ ensi naalĩ akoolĩ mũshũnagogi pĩna naaziigia izi, naijulua nuutaki,

²⁹ naauuka naamupũnia kĩnzinzi kya kaa, naamutuala kunkilimbua ya nkonko pana alĩ nzengue ĩkaa yaao, koona amugumĩle pansĩ; kĩngaalĩ ngaalĩ

³⁰ Ĩpa uyo nukĩlĩla pakatĩ yaao, nulongola.

Munalĩsĩĩmuĩ wikamigua

³¹ Nutima kuKapelinaũmũ, kaa ya Galĩlaya, nuĩ kuamania palutondo lwa wikyali.

³² Naakũmia uumania waakue kunsooko ulukaani luakue alĩ lutĩĩte usũũmi.

³³ Mũshũnagogi alukoolĩ muntu munalĩsĩĩmuĩ, nukuuta kululi lukulu,

³⁴ nuũga “Hai! Kwĩmbii nĩnduue, Yesu Munazaleti. Wijile kukukumalane, Nukuĩzĩ kĩnaue wĩwaani, wĩMuelu wa kĩNzua.”

³⁵ ũYesu nulĩtakĩla nuũga Mũma! Pũna mumuakue! Paapo ĩlĩsĩĩmuĩ nalĩmuguusia pakatĩ yaao, nalĩmupũna, sika nalĩmulemaalia.

³⁶ Ensi naakũmia, naĩtambuĩla eene kueene naaũga, “Lukaani kĩ ulu, kuusũũmi ningũlũ ukumalagĩĩlia ĩmasĩĩmuĩ, ndayo mipũna.”

³⁷ iMpola zaakue nazikũmuuka munandĩ zensi za nsĩĩ niasio.

Kwikamigua kumukuĩ namukĩĩma nwa kĩSimioni palumuĩ nĩnaĩngĩ

³⁸ Nupũna mũshũnagogi, nũingĩla munumba ya kĩSimoni. uMukuĩ wa kĩSimoni, unina wa musungu waakue, alugonile muluĩle alĩ wisonselĩĩle naamulompa kunsooko yaakue.

³⁹ Nuĩmĩka piipĩ nduzo, nuutakĩla uuluĩle naumulegela. ĩkamuĩ nuuuka, nuĩ kuatumĩla.

⁴⁰ ĩMpasu pĩna nĩsaalĩĩla, ensi naalĩ atĩĩte ĩaluĩle naauluĩle nawĩsiasia naaaleeta kumuakue. Numuĩĩkĩla wensi ĩmĩkoono nuakamia.

⁴¹ Nĩmasĩĩmuĩ namaapũna iingĩ, namikuuta namiũga, “Uwe wĩmuana wa kĩNzua.” Numatakĩlĩkia, sika numagombia kwitambula, kunsooko alĩ mamanile kĩna uzo ingĩ Kilisito.

⁴² Pĩna naweela nupũna, nulongola kĩna tilĩ kaantu, ĩmaũmbĩ namaa kumudũũma, namapika kumuaakue, namaa kumugilĩĩlia walekilega kunsiao.

⁴³ Ĩpa nuaĩĩla, “Injĩpĩĩle kwitanantia impola na Nziiza za utemi wa kĩNzua numukaa nzia, kuitĩ yoi alĩ numutumue.”

⁴⁴ Nũitanantagiaa mumasũnagogi ĩma muGalĩlaya.