Luka 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Yohana Mubadĩĩzia nuutanantia waakue

¹ Pamuaka wikyumi nakataano wa kutema kwa kĩTibelio Kaisali, uPontio Pilatu pĩna alĩ mutemi wa Uyahũdi nuHelode pĩna alĩjũmbe wa Galĩlaya; nuFilipo umunũna waakue pĩna alĩ jũmbe wa Itulea nĩTalakoniti; nuLisania pĩna alĩ jũmbe wa Abilene.

² Pĩna Anasi nuKayapa alĩ Apolia naAkulu, paapo ulukaani lwa kĩNzua nalumuagaana uYohana sha Zakalia mumbuga.

³ Nuenda kunsĩĩ zensi nazĩpiipĩ piYolidani, nuutanantia ubadĩĩzo wa upeli kuuleegeligua wa mĩlandu,

⁴ kĩna yoi nayandĩkue mukĩtabũ kya nkaani za kĩYesaya umunakĩdagu “Luli lwa muntu lukĩtunta mumbuga, Mĩzĩpĩĩliĩ ĩnzĩla ya kĩShekulu pigololĩ ipijĩla piakue.

⁵ Magĩlĩlĩ mensi mikitinĩĩlua, ĩnkonko yensi ikishĩmbuulua, nĩ makikilague mensi gaa pana yĩpetile ikitũla igolokũ; pana lyĩndĩ ikilĩganĩĩligua,

⁶ nĩ antu tũlũ ensi ĩkakuuona uugũnua wa kĩNzua.”

⁷ Itĩ numaĩĩla ĩmaũmbĩ naalĩ mamuagaanile mabadĩĩzigue nduyo “Inie wĩleli wa nzoka, waani numusuguĩle kukuutalama uutaki nawijile.

⁸ Pĩĩ gua inkali nazijĩpĩĩle uupeli; kangĩ mulekiandia kwitambula munkolo zaani, ‘Kutĩĩte utata, nduyo;’ uIbũlahimu, kuitĩ namuĩĩla kĩna uNzua usũũmile muna magũe aya kukumunansulĩlia uIbũlahimu ĩaana.

⁹ Ĩpaino ĩmpoopo yaĩĩkaguaa pamatina ma makota; kuitĩ ikyota liensi nalyasiitipĩa inkali nanziiza lyukutemaguaa nukwitaagua mumooto.”

¹⁰ ĩMaũmbĩ namamukolia, “kutendeeii gua?”

¹¹ Nushookeelia nuaĩĩla, “Nutĩĩte intiila zibĩlĩ wamupeele namugila, nduyo nutĩĩte india watende iio-iioo.”

¹² Nĩasangulia-koodi naamuagaana abadĩziigue, naamuĩĩla, “Mumania, aishie kutendeeii.”

¹³ Nuaĩĩla “Mulekishangulia kwikĩlĩkĩĩla namualagĩĩligue.”

¹⁴ Sunga ĩĩlaasi naamukolia naaũga, “Aishie kutendeeii.” Nuaĩĩla “Lekioopokiĩ kamumtu wensi katia kukumusokia kuulongo, kangĩ muendue muumo nĩkĩnamulĩmo kiani.”

¹⁵ Nĩantu pĩna alĩ alaaĩlĩĩle nazĩkakigyelela, naipindĩkia munkolo zaao impola za kĩYohana zĩmbũge kĩna uyo muene Kilisito,

¹⁶ uYohana nushookeelia nuaĩĩla tũlũ “ĩne tai nukumubadĩĩzagiaa kumazĩ, ĩpa upolokile umukola usũũmi kwinkĩla ĩne, nineene sikaka nijĩpĩĩle kukumutũngulĩlia sunga ĩmĩkoa ya ilaatu yaakue. Uzo ukakumubadĩĩzia kuMuau Muelu nukumooto.

¹⁷ ĩKĩsela kiakue kiĩlĩ mumukono waakue, nduyo ukakukĩpiagula sue ĩkĩuga kiakue, ukakuuĩĩka uupemba mwishagĩ liakue, ĩpa ĩmapuulĩlo ukakumasonsa mumooto nasika ukudibaa.”

¹⁸ Iio gua, nuasugula kunkaani nazĩngĩ ningĩ nukukuatanantĩlia ĩantu iMpola naNziiza.

¹⁹ Ĩpa ũjũmbe Helode pĩna nutakĩlua nduyo kunsooko ya kĩHelodia umusungu wa munũna waakue, nukunsooko ya ubĩĩ tũlũ uHelode naaluutendile,

²⁰ nongeelia kangĩ nuutendi uu numutũnga uYohana mukĩtũngo.

Kwĩbadĩĩzigua kwakĩ Yesu

²¹ ĩAntu tũlũ pĩna naabadĩĩzigua, nũYesu pĩna nubadĩĩzigua pĩna alĩ wilompa, igyulu nalĩkũnukuka

²² nuMuau Muelu nutima mumuakue zĩ kũkyelu lya nkunda, nululi nalupũna kwigyulu, naluũga “Ue uue Muana waaane muloogua, nanumuloeeligue ninduue.”

Wĩleli wa kĩYesu

²³ ũYesu pĩna nuandia umulĩmo waakue alĩ waalĩĩ zĩ miaka makumi matatu, nusĩĩgĩlua kĩna muana wa kĩYosefu, mwana wakĩ Heli,

²⁴ wakĩ Matati, wakĩ Lawi, wakĩ Meliki, wakĩ Yosepũ, wakĩ Heli,

²⁵ wakĩ Matatia, wakĩ Amosi, wakĩ Nahumũ, wakĩ Esili, wakĩ Nagai

²⁶ wakĩ Maati, wakĩ Matatia, wakĩ Semei, wakĩ Yosepũ, wakĩ Yuda

²⁷ wakĩ Yoana, wakĩ Lesa, wakĩ Zelubabeli, wakĩ Selitieli, wakĩ Neli,

²⁸ wakĩ Meleki, wakĩ Adi, wakĩ Kosamũ, wakĩ Elimdamũ, wakĩ Eli,

²⁹ wakĩ Yosua, wakĩ Eliezeli, wakĩ Yolimũ, wakĩ Matati, wakĩ Lawi,

³⁰ wakĩ Simoni, wakĩ Yuda, wakĩ Yosepũ, wakĩ Yonamũ, wakĩ Eliakimũ,

³¹ wakĩ Melea, wakĩ Mena, wakĩ Yolamũ, wakĩ Matata, wakĩ Natani, wakĩ Daudi,

³² wakĩ Yese, wakĩ Obedi, wakĩ Boazi, wakĩ Salimoni, wakĩ Nasoni,

³³ wakĩ Aminadabũ, wakĩ Alamũ wakĩ Heziloni, wakĩ Pelesi, wakĩ Yuda,

³⁴ wakĩ Yakobo, wakĩ Isaki, wakĩ Ibũlahimu, wakĩ Tela, wakĩ Naholi,

³⁵ wakĩ Sekugi, wakĩ Lagaũ, wakĩ Pelegi, wakĩ Ebeli, wakĩ Seela,

³⁶ wakĩ Kenani, wakĩ Alifakisadi, wakĩ Semũ, wakĩ Noe, wakĩ Lameki,

³⁷ wakĩ Metusala, wakĩ Enoki, wakĩ Yeladi, wakĩ Mahaleli, wakĩ Kenani,

³⁸ wakĩ Enosi, wakĩ Seti, wakĩ Adamu, wakĩ Nzua.