Luka 23 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ntongela ya kĩPilatu, mutemi wa kĩLumĩ

¹ uMulundo tũlũ nawĩĩmĩka, naamutuala kwa kĩPilatu

² Naandia kukumusokia naaũga; “Kwamuonile uyu wipuutia ĩndugu yĩĩtu nukukuagilia ĩantu aleke kumupeela uKaisali ĩkoodi, nuũga ya kĩna uyo muene Kilisito mutemi.”

³ uPilatu numukolia nuũga; “Ue uuene umutemi wa Ayahũdi.” Nushookeelia numuĩĩla, Kĩna “Ue uũgile.”

⁴ uPilatu nuaĩĩla ĩapolia naakulu nĩmaũmbĩ, “Nasiitiiona kautimu kumuntu uyu.”

⁵ Nĩndĩo naazoma naaũga; “Ukuasuagĩĩlagiaa ĩantu, wimania muUyahũdi pensi kwipũna kũGalilaya sunga kwanu.”

ũYesu ntongela yakĩHelode

⁶ uPilatu pĩna nwigyũlia izi, nukolia kĩna umuntu uyu muGalĩlayane?

⁷ Pĩna nuligia impola ya kĩna uyu alĩ wa utemi wa kĩHelode, numutuala kwa kĩHelode, nduyo umuene alĩ wĩĩlĩ mũYelusalemũ intondo zaasio.

⁸ uHelode pĩna numuona ũYesu, nulumbĩkia, kunsooko alĩ kuuza widũũma wamuone kwipũna ntondo ningĩ kuitĩ alĩ wigyũlilie impola zaakue; nusiia waone ĩkĩlĩngasĩĩlio nakĩtendue nduyo.

⁹ Numukolia nkaani ningĩ; uyo sika numushookeelia kalukaani.

¹⁰ ĩApolia naakulu nĩalangi naĩĩmĩka paasio, naamusokia kungũlũ dũũ.

¹¹ uHelode numumelekia palumuĩ nĩĩlaasi aakue, nukukumupopota nukukumujiala intiila za kĩtemi; paapo numushookia kwa kĩPilatu

¹² uLutondo luulo uHelode nuPilatu naakamantana naĩĩ kĩsuakĩĩa; kuitĩ pamuandio alĩ ĩulugu eene kueene.

Pilatu, Balaba nũYesu

¹³ NuPilatu nuailingĩĩla ĩapolia naakulu nĩakulu nĩantu

¹⁴ nuaĩĩla, “uMuntu uyu mumuleetile kumuane yakĩna alĩ wipuutia ĩantu; nineeene laaa, nalamulaa impola zaakue ntongela yaani, ĩpa sika moonie kumuakue umuntu uyu kautimu wensi mumpola izi naaza mukumusokia,

¹⁵ sunga uHelode, kuitĩ wamushookagiaa kuna nsĩĩtu. Laaa, lukutilĩ kalukaani nutendile nalumũjĩpĩĩle kwikia.

¹⁶ Luulo gua, nĩkakumukua, paapo nĩkakumutũnguĩla.”

¹⁷ Kunsooko alĩ yumũjĩpĩĩle kukuatũngulĩlia umuĩ palutondo nalukulu.

¹⁸ Naazogolia tũlũ palumuĩ naaũga; “Muleegiĩ uyu ukutũngulĩlie uBalaba.”

¹⁹ Ninduyo alĩ muntu naalĩ mugumĩlue mukĩtũngo kunsooko ya luntampa naalĩ lũgyelile mukaa nukunsooko ya uulagani.

²⁰ uPilatu naĩtambuĩla nĩndĩo kangĩ kunsooko alusiiile kukumutũnguĩla ũYesu.

²¹ Ĩpa naazogolia kunduli nkulu, “Mukononteele mumusalaba! Mukononteele mumusalaba!”

²² Nuaĩĩla nkua ya katatu, “Kunsooko kĩ. Uyu utendile ubĩkĩ. Sika moonie kumuakue sunga kalukaani nalũjĩpĩĩle kukumuulaga, Luulo gua, nĩkakumukua, paapo nĩkakumutũnguĩla.”

²³ Ĩpa naakulia ĩkĩlanga kungũlũ dũũ, naishiia wakononteelue mumusalaba. Ninduli zaao nazidula.

²⁴ uPilatu nulamula ĩmasiio maao matendeke.

²⁵ Numutũnguĩla unuasio naalĩ mugumĩlue mukĩtũngo kunsooko ya luntampa nuulagani, unuasio naalĩ amusiiile. Numupũnia ũYesu amutendele kĩna aloele.

ũYesu wikononteelua mumusalaba

²⁶ Nĩpĩna alĩ akumulongolia, naamuguĩla muntu umuĩ, Simoni nwa kuKilene nalukĩlile kwipũna kumugunda, naamutuĩka umusalaba waukenke kunũma ya kĩYesu.

²⁷ Naamutiata antu iingĩ dũũ nĩasungu naalĩ ĩkĩkuanga mũikũa nukukumulĩĩla.

²⁸ ũYesu nuapĩlukĩĩla nuũga; Inie ananso iYelusalemũ, mulekindĩĩla ĩne, ĩpa ĩlĩĩlĩ uniinie nĩaana aani.

²⁹ Kuitĩ laaĩ, intondo zikiiza naikiũga, Aliukũ naagumba nindaa nasika zukulelaa, nimbelele nasika zukonkagiaa.

³⁰ Paapo ikiandia kukuziĩĩla inkonko, Kuguĩĩlĩ; nipiikonko, kukũnĩkĩlĩ.

³¹ Kuitĩ kanga ĩitenda itĩ kwikyota nityotũ, ikitũla mbii kuna liumu?

³² Naatualua nĩĩĩa abĩlĩ aleegelania aulague palumuĩ ninduyo.

³³ Pĩna naapika paasio pana yukuĩtaguaa Nungulu iTyũe, paapo naamukononteela uyo mumusalaba, nĩaleegelania, umuĩ pakĩgoosia, umuua pakĩkĩĩma.

³⁴ ũYesu nuũga, “Tata ualekele, kunsooko sika amanile naakumatenda.” Naoomolania intiila zaakue naazikuĩla nsimbi.

³⁵ ĩAntu naĩĩmĩkile nailaaa; ĩpa ĩakulu alĩ akumumela, naaũga, “Aluagũnile naĩngĩ, nwĩgũne umuene malĩĩ ĩKilisito wa kĩNzua, Musaagulua waakue.”

³⁶ Ĩĩlaasi ndĩo naamupopota, naamuagaana, naamuleetela siki nkalĩ

³⁷ naaũga; “Malĩĩ uue ĩumutemi wa Ayahũdi, ĩgũne uuue.”

³⁸ Pakiania yaakue alĩ ukoolĩ wandĩkua naalĩwandĩkue; UYU WAYU MUTEMI WA AYAHŨDI.

³⁹ Umuĩ wa aleegalania naalĩ atumbĩkue numutukĩla nuũga; “Ue sika uue Kilisitone. Ĩgũne uue nindiishie.”

⁴⁰ Ĩpa nwa kabĩlĩ numutakĩla nuũga; “Ue sikumoopokilene sunga uNzua, ninduue wĩĩlĩ muulamulua uo-uuoo.

⁴¹ Niindiishie kualamulue kulukuuluu kuitĩ kwiaanũnkula nawijĩpĩĩle uutendi wĩĩtu, ĩpa uyu sikutendile kalukaani nalubĩĩ.”

⁴² Nuũga; Ee Yesu, winjuke pĩna ukiiiza kuusũmi waako wa kĩtemi.

⁴³ ũYesu numuĩĩla; Tai nakuĩĩla, nantende yoĩ ukitũla palumuĩ nineene muPaladiiso.

Kwikia kwa kĩYesu

⁴⁴ Pĩna naitũla zĩ nsaa ya mutandatu, nayĩĩ kiiti munsĩĩ tũlũ sunga kunsaa ikyenda,

⁴⁵ uweelu wa mpasu nauula, ipyupa lya numba ya kĩNzua nalĩtanduka pakatĩ.

⁴⁶ ũYesu nwĩtunta kululi lukulu nuũga; Tata mumĩkono yako namĩĩĩka ĩnkolo yaane.

⁴⁷ Pĩna nukondia kwitambula izi, nutiĩka ĩnkolo. uMutongeeli wa ĩlaasi gyana pĩna nuona naalĩ matendekile numukulia uNzua, nuũga; Tai umuntu uyu alĩ munakulukuuluu.

⁴⁸ Numulundo tũlũ wa antu naalĩ ĩilĩngĩlĩĩle kwilaaa aya, pĩna naaona naalĩ matendekile naashooka kukaa naĩĩ kĩkuanga mũikũa.

⁴⁹ Tũlũ naalĩ ĩĩĩzĩ ninduyo nĩasungu naalĩ ĩtiatile ninduyo kwipũna kũGalilaya naĩĩmĩka kulĩ nailaaa aya.

ũYesu wiĩĩkua mukĩbĩĩla

⁵⁰ Laa alukoolĩ muntu wa Alimatea, ĩkaa ya Uyahũdi, ĩliina liakue Yosepũ, munakialo muntu muuza kangĩ munakulukuuluu;

⁵¹ ninduyo sika alugombile inkaani nuutendi waao, kangĩ alulaaĩlĩĩle uutemi wa kĩNzua.

⁵² uMuntu uyu nuenda kwa kĩPilatu nulompa wapeegue umuĩlĩ wa kĩYesu.

⁵³ Nuwiikia nuutũnga muntiila nankamũ, nuuĩĩka mukĩbĩĩla naalĩ kĩkũnue mwipyampa nakikĩĩlĩ waĩĩkue kamuntu muasio.

⁵⁴ Nulutondo luasio alĩ lutondo lwa Wĩzĩpĩĩlia, nulutondo lwa wikyali nalũipika.

⁵⁵ Nĩasungu naalĩ ijile ninduyo kwipũna kũGalilaya naĩtiata, naaona ĩkĩbĩĩla nĩkĩna umuĩlĩ waakue alĩ muĩĩkue.

⁵⁶ Nashooka naazĩpĩĩlia ĩmakũta nuulũmba. Nulutondo lwa wikyali naasũpia kĩna alĩ ilagĩĩligue.