Luka 22 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usongeelani wa kĩYuda

¹ Nalũsũgamĩĩla ulutondo lukulu lwa ugalĩ naugila igaaĩ nalukuĩtaguaa Pasaka.

² ĩApolia naakulu nĩalangi alĩ idũũma ĩnzĩla ya kumuulaga kunsooko alĩ aoopookaa ĩantu.

³ ũShetani numũingĩla ũYuda nukuĩtanguaa Isikaliote naalĩ umuĩ wa aasio naikyumi naabĩllĩ.

⁴ Nulongola nuenda naĩtambuĩla nĩapolia naakulu nĩatongeeli a ĩlaasi gyana ukakumusakĩlia kunzĩla kĩ.

⁵ Naalumba, naĩgombia amupeele mpiia.

⁶ Nugomba, nudũũma ĩlioma lya kumusakia kumiao pĩna kutilĩ kamulundo.

Wĩzĩpĩĩlia wa Ndia ya kĩShekulu

⁷ Nalupika ulutondo lwa ugalĩ naugila igaaĩ, pĩna alĩ ijĩpĩĩle kwipolelia ĩnkolo ya Pasaka.

⁸ ũYesu nuatuma uPetelo nuYohana nuũga; Lendĩ mukuzĩpĩlĩlie ĩPasaka kumĩlĩe.

⁹ Naamuĩĩla; “Usiiile kumĩzĩpĩlĩlie mpĩĩ.”

¹⁰ Nuaĩĩla; “Laaĩ, pĩna mukiingĩla mukaa, mukitaagana numugoosia nukenkile ntunda ya maazĩ; mumutiate, mũingĩle munumba nukiingĩla uyo.

¹¹ Mumuĩĩle umukola numba, uMumania ukukuĩĩla, liĩlĩ mpĩĩ ityamdo lya agenda. Muasio muumo nĩkakumĩlĩĩla ĩPasaka palumuĩ nĩamanigua aane.

¹² Ninduyo ukakumulagĩĩla ityando kyulu liĩlĩ kukiani ityembe, lyakondile kwijĩpĩĩligua; muzĩpĩĩlie muumo.”

¹³ Naalongola naaona kĩna iio naalĩ waaĩĩlĩĩle, naamĩzĩpĩĩlia ĩPasaka.

Ndia ya kĩShekulu

¹⁴ iTyũngo pĩna nalĩpika, nwikyalansa pandia umuene nĩatumua palumuĩ ninduyo.

¹⁵ Nuaĩĩla, “Ntĩĩte nsula nkankanaa kwilĩa ĩPasaka ĩĩ palumuĩ niniinie pĩna nikĩlĩĩ kalaagigua,

¹⁶ kuitĩ namuĩĩla yakĩna sika nijile kumĩlĩa kangĩ sunga pĩna ikitimĩĩligua muutemi wa kĩNzua.”

¹⁷ Nusola ĩkĩĩko, nusongelia nuũga, “Solĩ ĩkĩ mwĩalĩle niinie kuniinie,

¹⁸ Kuitĩ namuĩĩla ya kĩna kwipũna ityũngo lyolĩ sika nikikopa uupĩi wa mĩkali ya mĩzabiibu sunga uutemi wa kĩNzua ũjiliiiza.”

¹⁹ Nusola uugalĩ, nusongelia, nuuega nuapeela, nuũga, “Uu wau muĩlĩ waane namupũnigue kunsooko yaani; tendĩ yoi mwinjuke ĩne.

²⁰ Iio nĩkĩĩko, pĩna naakondia kwilĩa, nuũga; ĩKĩĩko ĩkĩ ingĩ lyango nĩpia kumugali waane nũitĩkile kunsooko yaani.

²¹ Ĩpa laaĩ, umukono wa kĩuyo nwinshakia ukoolĩ palumuĩ nineene mumeeza.

²² Kuitĩ uMuana-muntu walongolaa kĩna alĩ musĩĩgĩlue ĩpa ukĩa kumuakue umuntu nuasio nukumusakia.

²³ Naandia kukĩkolia eene kueene, waani pakatĩ yaao nukitenda ulukaani ulu?”

uUkulu nawa tai

²⁴ Nazigyela nkungumi pakatĩ yaao kĩna waani mumiao wasĩĩgaguaa kĩna mukulu.

²⁵ Nuaĩĩla; “ĩatemi a ndugu nazĩngĩ akuademelaa, nĩakulu aao akuĩtaguaa Akola-ukende.

²⁶ Ĩpa kumiani sika iio, ĩpa namukulu kumiani nuĩ zĩ muniino, numutongeli nuĩ zĩ mwĩtumi.

²⁷ Kuitĩ waani namukulu; uyo nwikyalansile pandiane, katia unuasio nukĩtuma, Sika uuyone nwikyalansile pandia? Ĩpa ĩne nkoolĩ pakatĩ yaani zĩ mwĩtumi.

²⁸ Inie niinie naalĩ mwikyalile palumuĩ nineene mumagemua maane.

²⁹ Nineene namuĩĩkĩlia uutemi kĩna iio u Tata waane aalumbĩĩkĩĩlie ĩne,

³⁰ koona mulĩe nukwikopa pameeza yaane muutemi waane nukukikyalansa mumatengu ma kĩtemi paasio pĩna mukakuzilamula induuli kyumi nazibĩlĩ za Ĩsilaeli.”

Kwikaana kwa kĩPetelo ikũnukulua nũYesu

³¹ Nuũga; “Simoni Simoni, laaa, ũShetani umusiile inie wamupeete zĩ upemba.

³² Ĩpa nukulompelĩĩle ue, uusuĩĩli waako ulekiula; ninduue pĩna ukipĩluka, uzikamie inkolo za anũna aako.”

³³ Numuĩĩla; “Shekulu, ĩne nkoolĩ palumuĩ ninduue kwienda mukĩtũngo sunga munkia.”

³⁴ Nuũga; “Nakuĩĩla Petelo, umumbĩ sika ukikunkula nantende ĩĩ sunga ukinkaana nkua zitatu ya kĩna sikunzĩzĩ.”

³⁵ Nuakolia; “Aĩpa, pĩna alĩ numutumile ĩmuagila kambogoosi ya mpiia sunga ĩmpĩnda ya mpamba sunga ilaatu alĩ muakeepeelue kĩntune?” Naaũga; “Zũi,” sunga nakĩmuĩ.

³⁶ “Nuaĩĩla, ĩpaino, umukola mbogoosi ya mpiia nwamĩsole, nĩmpĩnda ya mpamba iio, ninduyo na mugila iyũmba nwagulie ĩntiila yaakue walĩgule.

³⁷ Kuitĩ namuĩĩla, ‘Ulo naalĩ luandĩkue ijĩpĩĩle lutimĩĩligue mumuane kutilĩ kawĩnegelo,’ ya kĩna, alĩ mualĩĩligue palumuĩ nĩatimuli. Kuitĩ naluandĩkue mumpola zaane lwatimĩĩlagiguaa.”

³⁸ Naaũga, “Shekulu laaa, ĩpa makoolĩ maũmba mabĩlĩ.” Nuaĩĩla, “Yakondaa.”

Getisemane

³⁹ Nupũna nulongola kunkonko ya Mĩzeituni kĩna alĩ kuuzaa wijiĩli waakue, nĩamanigua aakue ndĩo naĩtiata ninduyo.

⁴⁰ Pĩna nupika kuasio nuaĩĩla, “Lompĩ mulekiingĩla muugemua.”

⁴¹ Nwĩkamatula iniino zĩ ukulĩ wa kuguma igyũe, nutũngama nulompa

⁴² nuũga; “Ee Tata, malĩĩ ĩulooa waako, ndeegelia ĩkĩĩko ĩkĩ; ĩpa sika uulooa waane ĩpa uwaako utendeke.”

⁴³ Paapo malaĩka kwipũna kwigyulu numũgyeleela numupeela ngũlũ.

⁴⁴ Ninduyo pĩna alĩ wĩĩlĩ muluago, nwĩkakia kwilompa, iyĩla liakue nalĩtũla zĩ ntununtu za mĩgali nishononteka pansĩĩ.

⁴⁵ Pĩna nulega muulompi, nuaagaana ĩamanigua agonaa ĩndoolo kuusungu.

⁴⁶ Nuaĩĩla, “Nĩkĩ mwagonaa indoolo? Uukĩ mulompe mulekiingĩla muugemua.”

Kwiguĩlua kwa kĩYesu

⁴⁷ Pĩna alĩ kĩlĩ witambula, laaa, iyũmbĩ lya antu naaaza, nunuasio nukuĩtaguaa Yuda, umuĩ wa aasio naikyumi naabĩlĩ, waatongelĩĩle. Numusũgamĩĩla ũYesu wamusune.

⁴⁸ ũYesu numuĩĩla; “Yuda, wamusakiane uMuana-muntu kukumusuna?”

⁴⁹ Nĩaasio naalĩ ĩpiipĩ nduyo, Pĩna naaona namĩkakigyela, naaũga; “Shekulu, kuatemene kwiyũmba.”

⁵⁰ Umuĩ waao numukua umusese wa mupolia namukulu numudumula ukutuĩ wa kĩgoosia.

⁵¹ ũYesu nushookeelia nuũga; “Leka yaasio! Numuapaatia ukutuĩ, numukamia.”

⁵² ũYesu nuaĩĩla ĩapolia naakulu nĩatongeeli a ĩlaasi a Numba ya kĩNzua nĩanampala naalĩ amuagaanile; “Mbii, kamupũnile nĩmaũmba nĩmasukulĩ zĩ kukumuguĩla umuleegalania?

⁵³ Lutondo kulutondo pĩna alĩ nĩpalumuĩ niniinie munumba ya kĩNzua, sika alĩ mwalantualĩĩla kamikono, ĩpa ĩlĩ Tyũngo liani nuusũmi wa kiiti.”

uPetelo ukumukaana ũYesu

⁵⁴ Paapo naamuguĩla, naamusola naamulongolia kunumba ya mupolia namukulu. nuPetelo alutiatĩlĩĩle kulĩ.

⁵⁵ Nĩpĩna naakoleelia umooto mumpongolo naikyalansa palumuĩ, nuPetelo nwikalansa pakatĩ yaao.

⁵⁶ Paapo katũgua-kakĩĩma kamuĩ nakamuona wikyalansile paweelu, nakamukĩnduĩla namiiso, nakaũga; “Ninduuyu aza ĩpalumuĩ ninduyo.”

⁵⁷ Nukaana nuũga; “Maau ue, sika numuĩzĩ.”

⁵⁸ Katũngo kaniino pĩna nakakĩla, muntu numuua numuaona, nuũga; “Ninduue aza wĩumuĩ waao.” uPetelo nuũga; “Muntu ue, sika neene.”

⁵⁹ Pĩna naikĩla zĩ nsaa ĩmuĩ, muntu wĩngĩ nwĩkakia kwitambula; “Tai, uyu aza ĩpalumuĩ ninduyo, kuitĩ ninduyo Mugalĩlaya.”

⁶⁰ uPetelo nuũga; “Muntu ue, sika manile nwitambula.” Ĩkamuĩ pĩna alĩ kĩlĩ witambula, umumbĩ nukunkula.

⁶¹ ũShekulu nupĩluka, numulaaĩkia uPetelo. uPetelo nulũjuka ulukaani lwa kĩShekulu naalumuĩĩlĩĩle; “Nantende yoĩ pĩna umunbĩ ukaa wikĩĩlĩ kalakunkula ukinkaana nkua zitatu.”

⁶² Nupũna kunzi nulĩlĩkia kuusungu.

⁶³ Nĩantu naalĩ amuguĩlile ũYesu naamupopota, naamukua.

⁶⁴ Kangĩ naamutuunga kumiiso, paapo naamukolia naaũga; “Pũnia unakĩdagu. Waani nukukuile?”

⁶⁵ Naamupũnĩlia inkaani nazĩngĩ ningĩ ĩza kumutukĩla.

ũYesu ntongela ya apolia naakulu

⁶⁶ Pĩna naweela, naĩlundĩĩla ĩanampala a antu nĩapolia naakulu nĩalangi, naamutuala kũlindĩ liao, naaũga;

⁶⁷ “Malĩĩ ue uue Kilisito, ukuĩĩle.” Nuaĩĩla; “Kanga numuĩĩleenoo, sika mukinshuĩĩla kainiino.

⁶⁸ Kangĩ kanga numukolie, sika mwinshookeelia.

⁶⁹ Ĩpa kwipũna ĩpaino uMuana-muntu ukitũla wikyalansile pamukoono wa kĩgoosia wa ngũlũ ya kĩNzua.”

⁷⁰ Naaũga tũlũ; “Ĩpa gua, ue uue wĩMuana wa kĩNzuane?” Nualĩĩla; Niinie mwaũgaa kĩna ĩne neene.

⁷¹ Naaũga; “Aĩpa kusiiile ukuĩli kĩ kangĩ. Kunsooko ishie undiishie kwigyũlagiaa inkaani za mulomo waakue.”