Luka 20 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kyolio mumpola za usũũmi wa kĩYesu

¹ Lutondo lumuĩ pĩna alĩ wimania ĩantu munumba ya kĩNzua nukwitambula impola nanziiza, ĩapolia naakulu nĩalangi palumuĩ nĩanampala naamuagaana.

² naamuĩĩla; “Kuĩĩle, ukutendaa inkaani izi kuusũũmi kĩ? Kangĩ waani nalukupĩĩle uusũũmi uu?”

³ Nushookeelia, nuaĩĩla; “Nineene nĩkakumukolia inie lukaaani lumuĩ, mbuĩlĩ,

⁴ Ubadĩĩzo wa kĩYohana alĩ upũnile kwigyulune kanga kuantu?”

⁵ Naĩkolia eene kueene, naaũga, “Kanga kuũge upũnile kwigyulu, ukiũga, ‘Nĩkĩ gua sika namumusuĩĩla?’

⁶ Kanga kuũge upũnile kuantu, ĩAntu tũlũ ĩkakukukua ĩmagũe kunsooko agombile kĩna uYohana alĩ munakĩdagu.

⁷ Naashookeelia kĩna sika aoonie kĩna upũnile.”

⁸ ũYesu nuaĩĩla, “Sunga uneene sika nukumuĩĩla inie kuusũũmi kĩ nukutendaa inkaani izi.”

Mpiani ya mugunda wa mĩzabiibu

⁹ Nuandia kukuaĩĩla ĩantu ĩmpiani ĩĩ, “Muntu umuĩ alupandĩĩle mugunda waa mĩzabiibu, nualindĩĩlia ĩalindĩĩli, nulongola kikyala kunsĩĩ yĩngĩ kũtyũngo lyĩĩpũ.

¹⁰ Pĩna nazikonda intondo, nutuma mwĩtumi kuanamulĩmo aasio amupeele ityũmpĩ lya nkali za mĩzabiibu; ĩalindĩĩli naamukua naamuĩnga, nushooka mĩkono mĩtilĩ.

¹¹ Nutuma mwĩtumi wĩngĩ; naamukua ninduyo gaa, naamukolia inshoni, naamuĩnga nushooka mĩkono mĩtilĩ.

¹² Numutuma nunwa katatu. Uyo nduyo naamukua inguma, naamutaaga kunzi.

¹³ Paapo umukola mugunda wa mĩzabiibu nuũga, ‘Ntendeeii? Nĩkakumutuma umuana waane muloogua; nĩmbũge ĩkakumukulia uyo.’

¹⁴ Ĩpa ĩalindĩĩli pĩna naamuona, naĩtambuĩla eene kueene naaũga, ‘Wayuyu musaali. Kuĩni kumuulage koona uusali utũle wĩĩtu.’

¹⁵ Naamutaaga kunzi ya mugunda wa mĩzabiibu, naamuulaga. “Umukola mugunda wa mĩzabiibu gua, ukakuatendela yaani?

¹⁶ Ukiiiza nukukuamala ĩalindĩĩli aasio, numugunda wa mĩzabiibu ukakuapeela naĩngĩ?” Pĩna naigyũlia izi naaũga, “Leka yaasio.”

¹⁷ Nuatuupĩĩla nuũga, “ĩNdogolelio yaakue yaani gua, ulukaani ulunaluandĩkue, ‘iGyũe naalĩ alĩsiitille ĩazengi Lĩĩlo lĩtũlile gyũe kyulu lya kuluũno.’

¹⁸ Wensi nukuguaa mwigyũe ĩlĩ ukiminanguka; nuwensi nalĩkakumuguĩĩla lĩkakumusiĩkia.”

Kyolio mumpola za koodi

¹⁹ ĩAlangi nĩapolia naakulu naadũũma amuguĩle ityũngo lĩĩlo, ĩpa naoopooka ĩantu kuitĩ alĩ alĩngile ya kĩna alutambuĩle ĩmpiani ĩĩ mumpola zaao.

²⁰ Naamukũsĩla naatuma apeleeli naĩtendile zĩ aantu aa kulukuuluu amuguĩlie munkani zaakue, koona amuĩĩkĩle mungũlũ nuusũũmi wa mutemi.

²¹ Naamukolia naaũga; “Mumania, kumanile ya kĩna witambula nukwimania ĩtai sunga sika ukulaaa uusiu wa muntu, ĩpa ukumanagiaa ĩnzila ya kĩNzua kutai.

²² Iizane kukumupeela uKaisali ĩkoodi kanga zũi?”

²³ Ĩpa uyo nulĩnga uupembeelia waao, nuaĩĩla;

²⁴ “Ndagĩĩlĩ ĩshilinge. ĩtĩĩte ityũe nuwandĩkua wa kuani munu.” Naamushookeelia, “Lya kĩKaisali.”

²⁵ Nuaĩĩla; “Luulo gua, naya kĩKaisali mupeelĩ uKaisali; naya kĩNzua mupeelĩ uNzua.”

²⁶ Nĩndĩo sika naasũũma kukumuguĩlia munkaani zaakue ntongela ya antu; naakulĩlua kuushookeelia waakue, naatuulia.

Kyolio mumpola za wiiuki kwipũna muakiu

²⁷ iTyũmpĩ lya Asadukayo naamuagaana, ĩaasio naakuũgaa ya kĩna kutilĩ kawiiuki, naamukolia

²⁸ naaũga, “Mumania, uMusa alukuandĩkĩĩle ya kĩna umuntu na wakiĩlua numunũna waakue nutĩĩte umusungu nuasio wamulelelie umunũna ĩaana.

²⁹ Alĩakoolĩ antu ĩkĩnũna mupũngatĩ. Nwa muandio nutoola musungu, nukia mugila kamuana;

³⁰ Nunwa kabĩlĩ numusola umusungu nuasio, nukia mugila kamuana;

³¹ sunga nwa katatu numusola; iio-iioo sunga tũlũ uumupũngati waao naakia agila kaaana

³² ĩMpelo ya ĩa tũlũ nukia numusungu gaa.

³³ Iio gua, muwiiuki ũjilitũla musungu wa kuani, kunsooko alĩ amusolile tũlũ umupũngatĩ watũle musungu waao.”

³⁴ ũYesu nuaĩĩla, “ĩAana a muna unkũmbigyulu uu akutoolaa nukwitoolua;

³⁵ ĩpa ĩaasio naijilialĩĩligua kukuuligia unkũmbigyulu uu nukwiiiukigua kwipũna muakiu, sika akutoolaa katia kwitoolua.

³⁶ Kuitĩ sika asũũmile kwikia kangĩ, kunsooko akutũlaa ilika lĩmuĩ nĩamalaĩka, ndĩo awa aana a kĩNzua kũyaasio naaana a wiiuki.

³⁷ Ĩpa ya kĩna ĩakiu akũiukiguaa, sunga uMusa alulagĩlĩĩle mumpola za kĩtũnkũ paasio pĩna alumutĩĩle ũShekulu kĩna ingĩ Nzua wa kĩIbũlahimu, Nzua wa kĩIsaki, Nzua wa kĩYakobo.

³⁸ Nduyo sika Nzua wa akiu ĩpa wa apanga, kuitĩ tũlũ apanga mumuakue.”

³⁹ iTyũmpĩ lya alangi naashookeelia naaũga, “Mumania, utambuĩle iiza.”

⁴⁰ Kuitĩ sika naagagũlia kukumukolia kalukaani kangĩ.

uKilisito muana wa kĩDaudi

⁴¹ Nuaĩĩla gua, “Akuũgaa mbii ĩantu ya kĩna uKilisito ingĩ muana wa kĩDaudi?

⁴² Kuitĩ uDaudi umuene uũgile mukĩtabũ kya Malumbĩĩlio, ‘ũShekulu alumuĩĩlĩĩle ũShekulu waane, kyalansa pamukono waane nwa kĩgoosia.

⁴³ Sunga pĩna nĩkakuaĩĩka ĩanaulugu aako Kwitũla tyengu lya kuĩĩkĩla ĩmĩgulu yaako.’

⁴⁴ uDaudi wamutea kĩna Shekulu; utũlile mbii muana waakue?”

Usuguli mumpola za alangi

⁴⁵ Nĩ antu tũlũ pĩna alĩ amutegelĩĩle, nuaĩĩla ĩamanigua aakue,

⁴⁶ “Ĩsukukĩ nĩalangi naaloe kwiumba-umba ĩajialile intiila nandĩĩpũ nukwiũgigua mumagulĩlo nukukikyalansa kuntongela mumasũnagogi numumatengu ma kuntongela pandia.

⁴⁷ Akulĩaa inumba za akiĩlua, nukuunamampĩlu akulompaa ilĩĩpũ. ĩAasio ijililigia ulamulua naulũto.”