Luka 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwilelua kwa kĩYesu

¹ Pantondo zaasio lyagĩĩlio nalĩpũna kwa kĩKaisali Augusto ya kĩna mandĩkue ĩmiina ĩma antu tũlũ ensi ĩa muna unkũmbigyulu.

² uWandĩkuua uu wau wa muandio pĩna uKilenio alutemile mũSilia.

³ Naalongola tũlũ kwiandikua, wensi kukaa yaakue.

⁴ uYosepu nduyo nulega kũGalilaya kwipũna mukaa ya Nazaleti, nuenda kuUyahũdi kukaa ya kĩDaudi nyukuĩtaguaa Betelehemũ, kunsooko alĩ wa numba muluuli lwa kĩDaudi,

⁵ koona wandĩkue palumuĩ nuMalia naalĩ umuulilie, nunduyo alutĩĩte ndaa.

⁶ Pĩna alĩ ĩĩlĩ kuasio, intondo za kĩtunguĩla nazipika.

⁷ Numulela muana waakue naalĩ tyangĩ, numutũnga pitiila pya kĩng'inia, numugonia muntũa ya ng'ombe kunsooko alĩ lyukutilĩ kalioma munumba ya agenda.

⁸ Alĩ akoolĩ adĩĩmi munsĩĩ niasio naalĩ ikyalile lugũndĩĩka nailindĩĩla kuwĩali idyale liao uutiku.

⁹ Malaĩka wa kĩShekulu nũigyeleela nuweelu wa kĩShekulu nauamĩlĩkĩla tũlũ pensi; naoopooka pũũ.

¹⁰ uMalaĩka nuaĩĩla, “Lekioopookĩ; laaĩ numuleetĩĩle inie impola nanziiza za ulumbi ukulu naukitũla kuantu tũlũ ensi,

¹¹ Kuitĩ nantende mukaa ya kĩDaudi walelaguaa Mugũni kunsooko yaani, muene Kilisito Shekulu.

¹² Nĩndĩĩkĩ kyokĩ kĩlĩngasĩĩlio kumuani mukakumuagaana muana mutũngue pitiila pya kĩng'inia mugoniugue muntũa ya ng'ombe.”

¹³ Kumpũmpũkĩli iingĩ iyũmbĩ lya kwigyulu nayĩĩ yĩensi numalaĩka, naaa kumukũmazukia uNzua, naaũga

¹⁴ “uUkulu kwa kĩNzua kukiania numuna nsĩĩ matiliga kuantu naamuloelĩĩlie.”

¹⁵ Pĩna ĩamalaĩka naalega naalongola kwienda kwigyulu, ĩadĩĩmi naĩĩ kĩĩĩla, “Kuĩni sunga kuBetelehemũ kuluone ulukaani ulu nalutendekile, ũShekulu naazukulĩngilie.”

¹⁶ Naambukanga naamuagaana uMaalia nuYosepu numuana mugonigue muntũa ya ng'ombe.

¹⁷ Pĩna naamuona, naaganula naalĩ aĩĩlue ulwa muana uyu.

¹⁸ Tũlũ ensi pĩna naiigia, naakulĩlua kuzaasio naalĩ aĩĩlaguaa nĩadĩĩmi.

¹⁹ Ĩpa uMalia nuziĩĩka inkaani zaasio zensi nukukuzipindĩkia munkolo yaakue.

²⁰ ĩAdĩĩmi naashooka naakumukulia uNzua nukukumukũmazukia kumpola tũlũ zensi naalĩ aziigagiaa nukukuziona, kĩna alĩ aĩĩlue.

²¹ Pĩna nazipika intondo munaana za kumualamia umuana, nuteegua ĩliina liakue Yesu, lĩĩlo-lĩĩloo naalityeegue numalaĩka pĩna alĩ wikaalĩ kalauukĩĩligua ĩndaa.

ũYesu witualua munumba ya kĩNzua

²² iNtondo zaao za kĩeelia pĩna nazipika, kuUlagĩĩlio wa kĩMusa, naamutuala kũYelusalemũ, amupũnilie ũShekulu

²³ (kĩna alĩ yandĩkue muUlagĩĩlio wa kĩShekulu “uMuana namugoosia nwityangi ukiĩĩtua muelu kwa kĩShekulu.”)

²⁴ Nukwipũnia ĩshongelio kuUlagĩĩlio wa kĩShekulu, “Nkunda zibĩlĩ katia aana a nzĩa abĩlĩ.”

Simoni nĩliĩmbo lya ugombigua

²⁵ Laaa, alukoolĩ muntu mũYelusalemũ ĩliina liakue Simoni, nduyo alĩ muntu wa kulukuuluu mukulia-Nzua nulaaĩlĩĩle uupumbuligua wa Ĩsilaeli, nuMuau Muelu alukoolĩ mumuakue.

²⁶ Alĩ wakũnukulĩĩlue nuMuau Muelu kĩna walekiona uukiu sunga wamuone tangua uKilisito wa kĩShekulu.

²⁷ Nuuza muNumba ya kĩNzua mutongeelue nuMuau; nĩaleli pĩna alĩ amuleetile umuana ũYesu amutendele kuntendo ya Ulagĩĩlio,

²⁸ Paapo uyo numusola numukũmazukia uNzua, nuũga,

²⁹ “Ĩpaino Shekulu wamulekela umuasi waako wende nĩmatiliga, kulukaani luako.

³⁰ kuitĩ ĩmiiso maane mauonaa uugũnua waako

³¹ naaluzĩpĩlĩĩlie pamiiso ma antu ensi,

³² uweelu wa kuamĩlĩkĩla ĩa ndugu nazĩngĩ, nuukulu kuantu aako ĩa Ĩsilaeli.”

³³ ũShee nunina alĩ ikulĩlua kuzaasio naalĩ ntambulue kunsooko yaakue.

³⁴ uSimoni nuakembeta, numuĩĩla uMalia unina, “Laaa, uyu waĩĩkaguaa iingĩ ague, iingĩ ĩĩmĩke mu Ĩsilaeli, ukitũla kĩlĩngasĩĩlio nakĩkikungumigua ibĩĩ

³⁵ (nunduue, iyũmba likishoma ĩnkolo yaako), koona ĩmasĩĩgo ma nkolo ningĩ makũnukuke.”

Ana

³⁶ Alukoolĩ munakĩdagu-mukĩĩma ĩliina liakue Ana muana wa kĩPanueli wa luuli lwa kĩAsheli; alĩ wakombitile. Alũkyalile numugoosia miaka mupũngatĩ kwipũna unanso waakue,

³⁷ alĩ mukiĩlua wa miaka makumi munaana nĩnĩĩ. Nasika alukulegaa muNumba ya kĩNzua ĩpa alukuuza nwilaalĩla nukwilompa nukĩtekela munsĩ nuutiku.

³⁸ Nunduyo nuuza ityũngo lĩĩlo-lĩĩloo numusongelia uNzua, nuaĩĩla impola zaakue ĩaasio tũlũ naalĩ alaaĩlĩĩle uukomolua wa Yelusalemũ.

Ulĩĩsia wa kĩYesu

³⁹ Pĩna naazikondeelia tũlũ kuUlagĩĩlio wa kĩShekulu, naashooka kũGalilaya, kukaa yaao kuNazaleti.

⁴⁰ uMuana nukula, nongeeleka ningulu, mũjuligue ĩmasala, nuukende wa kĩNzua alĩ wĩĩlĩ mumuakue.

⁴¹ ĩAleli aakue alĩ akuenda muaka kumuaka kũYelusalemũ kulutondo nalukulu ulwa Pasaka

⁴² ũYesu pĩna nuĩutĩĩte miaka kyumi nĩbĩlĩ, naalongola kĩna alĩ ntendo ya luutondo lukulu.

⁴³ Pĩna naazikondia intondo, naashooka, ĩpa umuana ũYesu nusaaga kũYelusalemũ; ĩaleli aakue sika naamana.

⁴⁴ Naasĩĩgile kĩna ukoolĩ mumusĩnzo; naagenda munsĩ pii, naĩĩ kumudũũma muantua nĩasuaĩĩa.

⁴⁵ Pĩna naamuulia, naashooka kũYelusalemũ, naakumudũũma.

⁴⁶ Pĩna nazikĩla ntondo zitatu naamuonela muNumba ya kĩNzua, wikyalansile pakatĩ ya amania nukukuategeela nukukuakolia.

⁴⁷ Tũlũ naalĩ amutegelĩĩle naakulĩlua kuulĩngi nuushookeelia waakue.

⁴⁸ Pĩna namuona naakũmia; nunina numuĩĩla, “Muana waane, nĩkĩ wakutendela itĩ. Laaa, ũshoo nineene aza kukukudũũmaa kuusungu.”

⁴⁹ Nuaĩĩla, “Nĩkĩ aza mwindũũma? Sika mumanilene kĩna injĩpĩĩle nĩĩ nĩĩlĩ munumba ya kĩTata waane?”

⁵⁰ Ndĩo sika naalulĩnga ulukaani naalĩ waaĩĩlĩĩle.

⁵¹ Nulongola palumuĩ ndĩo, nupika kuNazaleti, nwĩniinupilie kumiao. UNina nuziĩĩka inkaani zensi munkola yaakue.

⁵² ũYesu nwĩongeela mumasala nuukuli nuukende kwa kĩNzua nukuantu.