Luka 19 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Zakayo

¹ Nduyo nũingĩla mũYeliko, alukĩlĩĩle pakatĩ yaakue

² Laaa alukolĩ muntu, ĩliina liakue Zakayo, mukulu umuĩ wa asangulia-koodi, nduyo alĩ mugolĩ.

³ Uyu alĩ widũũma wamuone ũYesu kĩna itĩ waani; sika nusũũma kunsooko ya wingĩ wa antu, kuitĩ alĩ mukuũpĩ

⁴ Numanka kutongela, nunankĩla mumukuu wamuone, kuitĩ ukiiiza kwikĩlĩla munzĩla ĩĩo.

⁵ Nũ Yesu pĩna nupika paasio, nulaaa kukiania, numuĩĩla; “Zakayo, iikanga, kuitĩ nantende injĩpĩĩle kukikyala munumba yaako.”

⁶ Nũikanga numusũgamĩĩlia kuulumbi.

⁷ ĩAntu Pĩna naaona, naĩũlũnga tũlũ, naaũga; “wingĩlaa munumba ya munamĩlandu, wikyale muumo.”

⁸ uZakayo nuĩmĩka numuĩĩla ũShekulu; “Shekulu, inshao zaane nukuatiĩla pakatĩ ĩatũka; kanga alĩ numuleegĩĩlie muntu kĩntu kuunele nukumushookelia nkua zinĩĩ.”

⁹ ũYesu numuĩĩla; “Nantende uugũnua wapikaa muna numba ĩĩ kuitĩ uyu ninduuyu muana wa kĩIbũlahimu.

¹⁰ Kuitĩ uMuana-muntu alĩ wijile kwidũũma nukwigũna naalĩ kĩlimĩlĩĩle.”

Mpiani ya shilinge

¹¹ Pĩna naigyũlia ĩzaasio, nongeelia kwitambula ĩmpiani, kunsooko alĩ wĩĩlĩ piipĩ niYelusalemũ nĩndĩo alĩ asĩĩgile nĩmbũge uutemi wa kĩNzua ukakigyela kuukaaũ.

¹² Luulo gua nuũga, “Muntu umuĩ wa kĩtemi nutũnga musĩnzo kwienda kunsĩĩ ya kulĩ koona waligie uutemi nukwishooka.

¹³ Nuĩĩta antu kyumi muĩtumi aakue, nuapeela shilinge gyana lya nzogũ, nuaĩĩla, muĩnzĩle ninjia sunga pĩna nijiliiiza.

¹⁴ Ĩpa ĩakolakaa aakue alĩ amusuukĩĩlue, naatuma anampala amutiate nukwiũga, Sika kualoe uyu wakuteme.”

¹⁵ “Pĩna nukondia kwiligia uutemi waakue, nushooka, nulagĩĩlia ĩĩtue ĩaasio ĩĩtumi aakue naalĩ waapĩĩle ishilinge, wamane kĩna alĩ aligilie nsaĩlo kĩ muwĩnzi waao.

¹⁶ Nuuza nwa muandio nuũga, ‘Shekulu, ityũmpĩ liako lyaleetaa nsaĩlo ya matũmpĩ kyumi nĩmĩĩa.’

¹⁷ Numuĩĩla, ‘Iiza, mwĩtumi numuuza; kunsooko alumusuĩĩli kulukaani naluniino uziteme kaa kyumi.’

¹⁸ Nuuza nwa kabĩlĩ nuũga, ‘Shekulu, ityũmpĩ liako lyaleetaa nsaĩlo ya matũmpĩ mataano nĩmĩĩa.’

¹⁹ Numuĩĩla ninduyo, ‘Ue uziteme kaa zitaano.’”

²⁰ “Nuuza numuua, nuũga, ‘Shekulu, ĩlĩ lyolĩ tyũmpĩ liako naalĩ ntũngile mukĩdeeo.

²¹ Kunsooko alĩ nakoopookaa kuitĩ ue umuntu mukakũ; ukuleegagiaa nĩnasika uĩĩkile, ukuogolaa nĩnasika upandĩĩle.’

²² Numuĩĩla, ‘Nĩkakukulamula kumulomo waako umwĩtumi umubĩĩ ue. Alumanile kĩna ĩne nĩmuntu mukakũ, nukuleegagiaa nĩnasika mbĩĩkile nukwiogola nasika mpandĩĩle.

²³ Ĩpa gua, nĩkĩ sika aluĩĩkile ishilinge zaane kuĩo naakupũnagiaa ĩnsaĩlo yaakue koona aza nĩĩze nsole ishilingr zaane nĩ nsaĩlo yaakue.’

²⁴ Nuaĩĩla naalĩ ĩĩmĩkile paasio, ‘Muleegeliĩ nityũmpĩ liasio, mupeelĩ unuasio nutĩĩte ĩmatũmpĩ kyumi.’

²⁵ Naamuĩĩla, ‘Shekulu, utĩĩte matũmpĩ kyumi.’

²⁶ ‘Namuĩĩla,’ wensi nutĩĩte ukipeegua; namugila gua, ukileegeligua sunga kĩĩkio nutĩĩte.

²⁷ Kangĩ ĩaasio ĩanaulugu aane nasika aloe nĩateme, aleetĩ kunu, muaulage sue ntongela yaane.”

ũYesu wiingĩla mũYelusalemũ zĩ mutemi

²⁸ Pĩna nukondia kwitambula izi, nulongola kuntongela, nunankĩla ulunziĩ kũYelusalemũ.

²⁹ Pĩna nusũgamĩĩla kuBetipage nĩBetania pankonko nyukuĩtaguaa Mĩzeituni, nutuma abĩlĩ muamanigua aakue

³⁰ nuũga; “Lendĩ sunga kukĩsaalĩ namutungĩnkĩĩne, nĩpĩna mukiingĩla mukakumuona muana-ndoguĩ mutũngue nasika waladaamĩĩla kamuntu. Mutũngulĩ, muleetĩ ĩpa.

³¹ Nuensi kanga wamukolie, Nĩkĩ mukumutũngula, mumuĩĩle Shekulu umusiile.”

³² Nĩaasio naalĩ atumue naalongola naaona kĩna alĩ waaĩĩlĩĩle.

³³ Nĩpĩna alĩ akumutũngula umuana ndoguĩ ĩakola naaaĩĩla, “Nĩkĩ mukumutũngula umuana ndoguĩ.”

³⁴ Naaũga; “Shekulu umusiiile.”

³⁵ Naamutuala kwa kĩYesu, naazaala intiila zaao mukiani ya muana-ndoguĩ,

³⁶ Nĩpĩna alulonguĩle, naazaala intiila zaao munzĩla

³⁷ Pĩna nusũgamĩĩla pantinintĩko ya nkonko ya mĩzeituni, iyũmbĩ tũlũ ĩlya amanigua na andia kwilumba nukukumukũmazukia uNzua kunduli nkulu kunsooko ya utendi tũlũ wa ngũlũ naalĩ auonaa,

³⁸ naaũga; “wakũmazukigue uMutemi nũjile muliina lya kĩShekulu! Matiliga kwigyulu nuukulu kukiania!”

³⁹ iTyũmpĩ lya Apalisayo naalĩ akoolĩ mwiyũmbĩ naamuĩĩla; “Mumania, agilie ĩamanigua aako.”

⁴⁰ Nuashookeelia nuũga; “Namuĩĩla inie kanga atuulie ĩa, ĩmagũe aza mijilikuuta.”

ũYesu ukumĩlĩĩla iYelusalemũ

⁴¹ Pĩna nusũgamĩĩla piipĩ, numĩona ĩkaa, numĩlĩĩla

⁴² nuũga; “Taazu azuzilimana sunga uuue palutondo luako ulu, naijĩpĩĩle ĩmatiliga! ĩpaino mapisue pamiiso maako.

⁴³ Kuitĩ intondo zijiliiiza kumuako pĩna ĩanaulugu aako ĩkakukuzengela ĩnkĩlĩ yukupilimĩĩlie, ĩkakukupilimikĩĩlia nukukukutuunĩĩlia nandĩ zensi;

⁴⁴ ĩkakukuguusia pansĩ, ue nĩaana aako muasio, asiite kukulekela kigyũe mukiania igyũe kunsooko sika alulĩngile ityũngo lya kukuagaana kumuako.”

ũYesu ukumielia ĩNumba yakĩNzua

⁴⁵ Nũingĩla muNumba ya kĩNzua, nuandia kukuaĩnga ĩaasio naalĩ igulia,

⁴⁶ Nuaĩĩla; “Yandĩkue, ĩNumba yane ikitũla numba ya wĩtekeli. Inie gua, mwamĩtendaa ĩtũle lyũlũ lya aleegelania.”

⁴⁷ Nduyo alĩ wimania lutondo luensi munumba ya kĩnzua. ĩApolia naakulu nĩalangi nĩakulu a antu alĩ idũũma nzĩla ya kumuulaga,

⁴⁸ sika naaona ulwa kutenda kuitĩ ĩantu alĩ akukamantanaa ninduyo nukukumũigia.