Luka 18 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mulamuli namubĩĩ

¹ Nuaĩĩla mpiani ya kĩna ijĩpĩĩle kukumulompa uNzua intondo tũlũ, sunga aleke kũtia ĩnsula.

² Nuũga, “alukoolĩ mulamuli mukaa ĩmuĩ, sika alumoopokile uNzua sunga sika alumukeelĩĩle kamuntu.

³ Numukaa niasio alukoolĩ musungu mukiĩlua nukumuagaana nkua kunkua nuũga, ndigĩlia ĩkulukuuluu kumulugu waane.

⁴ Ĩpa nduyo kuntondo ningĩ alusiitile; pembele nuũga munkolo yaakue, malĩĩ sika numoopokile uNzua nakĩ sunga kukumukeela kamuntu,

⁵ ĩpa kunsooko umukiĩlua uyu winjagia, nĩkakumuligĩlia ĩkulukuuluu yaakue, waleke kwinkatalia kwinjagia matũngo mensi.”

⁶ ũShekulu nuũga; “Tegeelĩ kĩna witambula umulamuli nasika munakulukuuluu;

⁷ nuNzua, sika ukakualigĩliane ĩkulukuuluu ĩasaagulua aakue naakumulĩĩlaa munsĩ nuutiku? Ukakuatinĩliane mumpola zaao?

⁸ Namuĩĩla ukakualigĩlia ĩkulukuuluu kuukaaũ. Ĩpa gua, pĩna ukiiza uMuana-muntu, ukakuuonane uusuĩĩli muna nsĩĩ?”

Mupalisayo numusangulia-koodi

⁹ Kangĩ nuaĩĩla ĩmpiani ĩĩ ĩantu naakĩsanagiaa ya kĩna akola kulukuuluu naakuamela naĩngĩ,

¹⁰ “Antu abĩlĩ alĩ anankĩĩlee kuNumba ya kĩNzua ende kwilompa, umuĩ Mupalisayo umuua musangulia-koodi.

¹¹ uMupalisayo nuĩmĩka nũlompa itĩ pamuakue umuene, Ee Nzua, nakusongelia kunsooko ĩne sika kĩna ĩatu naingĩ, aleegelania, nasika anakulukuuluu, agololia sunga sika kĩna uyu umusangulia-koodi

¹² Ĩne nukulaalĩlaa nkua zibĩlĩ kwijũma; nukupũnagiaa ityũmpĩ likyumi muuligia waane tũlũ.

¹³ Ĩpa umusangulia-koodi nuĩmĩka kulĩ, sunga sika nugimia kwinansula ĩmiiso maakue kwigyulu, ĩpa nwikuanga ĩkĩkũa kiakue nuũga, EeNzua, unkolelue kĩnishungu ĩne numukola mĩlandu.

¹⁴ Namuĩĩla, uyu nũika kwienda kukaa yaakue mukola kulukuuluu kwikĩla uyo; kuitĩ wensi nukĩkulagiaa ukiniinupigua, ninduyo nukĩniinupagiaa ukikuligua.”

ũYesu ukuakembeta ĩang'inia

¹⁵ Naamutualĩla sunga ipiana wapishumbule; ĩpa ĩamanigua pĩna naaona naagilia.

¹⁶ Ĩpa ũYesu nuĩĩta aaze kumuakue nuũga; “Alekĩ ĩang'inia aaze kumuane, muleke kuagilia, kuitĩ naĩkĩna ĩa, uutemi wa kĩNzua ingĩ waao.

¹⁷ Tai namuĩĩla, unuasio nasikukuwaanũnkulaa uutemi wa kĩNzua zĩ mung'inia sikukuwingĩla kainiino.”

Upanga wa kalĩ nakalĩ nĩkĩgilia kya ugolĩ

¹⁸ Kangĩ muntu umuĩ namukulu numukolia nuũga; “Mumania numuuza, ntende yaani nuusaale uupanga wa kalĩ nakalĩ?”

¹⁹ ũYesu numuĩĩla; “Nĩkĩ winjĩta nĩmuuza. Kutilĩ namuuza isiititũla uNzua wing'ene.

²⁰ Umamanile ĩmalagĩĩlio; Uleekigololia, Ulekiulaga, Ulekiiia, Ulekikuĩla uulongo, Kulia utata waako numaau waako?”

²¹ Nuũga; “Aya tũlũ namakendegelĩĩle kwipũna uulĩĩsia waane.”

²² ũYesu pĩna nwigyũlia ĩzaasio numuĩĩla; “Kĩlĩ umukeepeelue lukaani lumuĩ. Gulia tũlũ yensi nutĩĩte, uooomolanie ĩatũka, ninduue ukitũla utĩĩte nĩkĩuto kwigyulu; nzuu, untiate.”

²³ Ĩpa pĩna nwigyũlia itĩ, nuona usungu kunsooko alĩ mugolĩ dũũ.

²⁴ ũYesu pĩna numulaaa, nuũga; ikakũ kuaasio ĩakola nsao kwiingĩla muutemi wa kĩNzua.

²⁵ Kuitĩ itontũ ĩngamĩa kwishelela munsungĩĩli ya lusinge kwikĩla umugolĩ kwiingĩla muutemi wa kĩNzua.

²⁶ Nĩndĩo pĩna naigyũlia naaũga; Waani gua nusũũmile kwigũnĩka?

²⁷ Nuũga, “Nasika masũũmĩkile kuantu masũũmĩkile kwa kĩNzua.”

²⁸ uPetelo nuũga, “Laaa, katĩ, ishie kwalekile inumba zĩĩtũ nukukukutiata ue.”

²⁹ Nuaĩĩla; “Tai namuĩĩla, Kutilĩ nulekile numba katia musungu, katia anũna, katia aleli, katia aana kunsooko ya utemi wa kĩNzua

³⁰ nasikukipeegua nangũlũ nkua ningĩ munityũngo ĩlĩ, numuunkũmbigyulu naũjile uupanga wa kalĩ nakalĩ.”

Ukũnukuli wa katatu wa nkia yakue ũYesu

³¹ Nuasola ĩaasio naikyumi naabĩlĩ nuaĩĩla; “Laaĩ, kwinankĩla kulunziĩ kũYelusalemũ, ninkaani tũlũ zikikondeeligua naalĩ muandĩkĩligue uMuana-muntu nĩanakĩdagu.

³² Ukiĩĩkĩlua mumĩkono ya ndugu nazĩngĩ watendelue ĩmapana, watendelue uugaali nukwitiĩlua ĩmatĩ.

³³ Nĩndĩo ĩkakumukua ĩmĩkoa nukukumuulaga, nĩpalutondo lwa katatu ukiiiuka.

³⁴ Ĩpa sika naalĩnga ĩzaasio nĩnainiino nulukaani luasio alĩ lupisigue kumiao, sunga sika naalekanula nalutambulue.”

ũYesu ukumukamia umupokũ

³⁵ Pĩna nusũgamĩĩla kũYeliko, alukoolĩ mupokũ alĩ wikyalansile panzĩla nũlompa ĩsadaka.

³⁶ Pĩna nũigia iyũmbĩ lĩkĩlile, nukolia; “Yaani katĩ?”

³⁷ Naamuĩĩla; “ũYesu Munazaleti ukĩlile.”

³⁸ Nukulia ĩkĩlanga nuũga; “Yesu, Muana wa kĩDaudi, unkolelue kĩnishungu!”

³⁹ ĩAasio naalĩ atongĩĩle naamukalamukĩla watuulie ĩpa uyo nwĩkakia nuũga; “Ee Muana wa kĩDaudi, unkolelue kĩnishungu!”

⁴⁰ ũYesu nuĩma, nulagĩĩlia waleetue kumuakue. Pĩna numusũgamĩĩla, numukolia;

⁴¹ Usiiile nukutendele yaani? Nuũga; Shekulu, nsiile mone.

⁴² ũYesu numuĩĩla; Upeegue kwiona; uusuĩĩli waako wakukamagiaa.

⁴³ ĩkamuĩ nuona, numutiata kunu nukumukulia uNzua. Nĩantu tũlũ pĩna naaona itĩ naamukũmazukia uNzua.