Luka 17 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Utambuli uua wa kĩYesu

¹ Nuaĩĩla ĩamanigua aakue; “iInkũmpa ikiiiza kutilĩ kawĩnegelo, ĩpa ukĩa kumuakue umuntu nuasio naijile kunsooko yaakue!

² Wijĩpĩĩle nangũlũ unuasio lĩluala lya kushiela lĩtũngĩĩligue munkingo yaakue, wagumĩlue munanza, kwikĩla wamutimulie umuĩ wa aniino ĩa.

³ Ĩkendegeelĩ! Kanga umunũna waako watimule, umusugule; na wapela umulekele.

⁴ Kanga wakutimulĩle nkua mupũngatĩ, kulutondo lumuĩ nukwishooka kumuako nkua mupũngatĩ, na waũga, Napelaa; umuleke.”

⁵ ĩAtumua naamuĩĩla ũShekulu, “Kongeelie uusuĩĩli!”

⁶ ũShekulu nuũga; “Kanga ĩazaa mutĩĩte uusuĩĩli kĩna kapeke ka haladali aza mwijile kuuĩĩla umukuu uu, Kuuluka upaandĩlue munanza, nĩnduo aza wijile kumugombia.

⁷ “Waani gua kunsiani nutĩĩte umwĩtumi wa kulĩma katia wa kudĩĩma nukakumuĩĩla pĩna ukishooka kwipũna kumugunda, Nzuu, kyalansa pandia?

⁸ Sika ukakumuĩĩlane, Nzĩpĩlĩlia india, ndĩe; ĩtũnge untumĩle; sunga nkondie kwĩlĩa nukwikopa, paapo nduue ukilĩa nukwikopa

⁹ Ukumusongeliane umwĩtumi kunsooko wĩtumaa kĩna alĩ mulagĩĩligue.

¹⁰ Iio niniinie, pĩna mukikondia tũlũ namualagĩĩligue, ũgĩ Kuĩtumi nasika kwijĩpĩĩle; kwĩtumile udũũ nayukũjipĩĩle kwĩtume.”

ũYesu wikamia ĩanamatana Kyumi

¹¹ Pĩna alĩ wĩĩlĩ munzĩla kwienda kũYelusalemũ, alukĩlĩĩle pakatĩ ya Samalia nĩGalĩlaya.

¹² Pĩna nũingĩla mukĩsaalĩ kĩmuĩ, naitaagana nĩantu kyumi anamatana naĩĩmĩka kulĩ

¹³ naĩtunta induli naaũga; “EeeYesu Shekulu, kukolelue kĩnishungu!”

¹⁴ Pĩna nuaona nuaĩĩla; “Lendĩ, mwĩlagĩĩle kuapolia.” Pĩna alĩ alonguĩle naeela.

¹⁵ Umuĩ waao pĩna nuona yakĩna wakamagiaa, nushooka kunu nukumukulia uNzua kululi lukulu,

¹⁶ nugua uũndaala pamĩgulu yaakue numusongelia, ninduyo alĩ Musamalia.

¹⁷ ũYesu nushookeelia nuũga, “Sika aza eeliguene tũlũ ensi kyumi; ĩaasio naikyenda ĩĩlĩ mpĩĩ?

¹⁸ Sika igyelelane naĩngĩ ashooke amupeele uNzua uukulu isiititũla umugenda wayu dũũ?”

¹⁹ Numuĩĩla, “Uuka, longola, uusuĩĩli waako wakukamagiaa.”

Mpola za kuuza kuutemi wa kĩNzua

²⁰ Pĩna nukoligua nĩ Apalisayo uutemi wa kĩNzua wijile nalĩ, nushookeelia nuaĩĩla; uUtemi wa kĩNzua sika wijile kuupeleelua;

²¹ sunga sika ikiũga, Laaa, ukoolĩ kunu, katia ukoolĩ uko; kuitĩ laaa, uutemi wa kĩNzua ukoolĩ mumuani.

²² Nuaĩĩla ĩamanigua; intondo zikiiiza pĩna mukiawa kwiona lumuĩ muntondo za Muana-muntu, sika mukakuluona.

²³ Kangĩ ĩkakumuĩĩla, Laaĩ uuko! Laaĩ kunu! Mulekilega, sunga muleke kuatiata,

²⁴ kuitĩ kĩna ulupĩĩto nalukumĩlĩkaa kwipũna luandĩ ulu nsĩlĩlĩ igyulu sunga kuluandĩ ulo nsĩlĩlĩ igyulu, iio ukitũla uMuana-muntu palutondo luakue.

²⁵ Ĩpa tangua yumũjĩpĩĩle waligie nzago ningĩ nukwishiitua nuwĩleli uu.

²⁶ Kĩna alĩ itũlile pantondo za kĩNoe, iio ikitũla pantondoza Muana-muntu.

²⁷ Alĩ akulĩaa nukwikopa; alĩ akutoola nukwitoolua sunga palutondo uNoe pĩna nũingĩla mwipyango, ukapĩli nauuza nuamala tũlũ.

²⁸ Iio, kĩna alĩ itũlile pantondo za kĩLoti alĩ akulĩaa nukwikopa, alĩ akugulaa nukwigulia, alĩ akupandĩlaa nukwijenga,

²⁹ ĩpa palutondo uLoti pĩna nulega muSodomũ naupoloka mooto nĩkĩbiliti kwipũna kwigyulu zĩ mbũla nuamala ensi.

³⁰ Iio ikitũla palutondo pĩna ukikũnukulua uMuana-muntu.

³¹ Palutondo luasio, nuĩlĩ kukiania ityembe niisheme yaakue yĩĩlĩ munumba, waleekitima waishole; iio nuĩlĩ mumugunda waleke kuishookela ya kunũma.

³² Mũjukĩ umusungu wa kĩLoti.

³³ Wensi nukudũũmaa kukuugũna uumĩ waakue ukakuulimĩĩlia, wensi nukakuulimĩĩlia ukakuupangatia.

³⁴ Namuĩĩla utiku waasio antu abĩlĩ ijile ĩagonile ulĩlĩ umuĩ, umuĩ ukitualua umuua walekue.

³⁵ Asungu abĩlĩ ijile ishia palumuĩ; umuĩ ukitualua umuua walekue.

³⁶ Antu abĩlĩ ijile akoolĩ mumugunda; umuĩ ukitualua umuua walekue.

³⁷ Naashookeelia naũga; “Mpĩĩ Shekulu.” Nuaĩĩla; “Pĩna ukoolĩ umuimba, paapo nindĩĩ zĩkakĩlundĩĩla.”