Luka 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mulindĩĩla-nsao namubĩĩ

¹ Kangĩ nuaĩĩla ĩamanigua aakue, “Alukoolĩ muntu umuĩ mugolĩ naalutĩĩte umulindĩĩla-nsao. Uyo nusokigua kumuakue ya kĩna wishapatĩlia inshao zaakue.

² Numuĩta numuĩĩla, Mpola kĩizi nanikigyũlia kumuako. Pũnia iyalo lya ulindĩĩli waako, kuitĩ sikusũũmile kwitũla mulindĩĩli kangĩ.

³ uMulindĩĩli nuũga munkolo yaakue, ntendeii, kuitĩ ũShekulu waane wandeegelia uulindĩĩli waane. Kwilĩma sika nsũũmile; kwigelelua niona nsoni.

⁴ Nalĩngaa kĩna nikitenda koona pĩna nikileegigua muulindĩlĩ waane, ĩantu ansũgamĩĩlie munumba zaao.

⁵ Nuĩĩta ĩantu a Mpaa ĩa kĩShekulu waakue umuĩ-umuĩ; numuĩĩla nwa muandio, ‘Alulĩĩle mpaa kĩ kwa kiShelulu waane?’

⁶ Nuũga, iNgele gyana za makũta. Numuĩĩla, ‘Sola uwandĩkua waako, wikyalanse kuukaaũ, andĩka makumi mataano.’

⁷ Paapo numuĩĩla numuua, aue, ‘alulĩĩle mpaa kĩ?’ Nuũga, ‘Mĩligo gyana ya upemba.’ Numuĩĩla, ‘Sola uwandĩkua waako, andĩka makumi munaana.’

⁸ ũShekulu nuasio numukũmazukia umulindĩĩli nasika munakulukuuluu kuusugũ waakue; kuitĩ ĩaana a unkũmbigyulu uu muwĩleli waao uweene asugũ kwikĩla ĩaana a weelu.”

Nzĩla nanziiza nya kutumĩla inshao

⁹ Nineene namuĩĩla, ĩpaĩlĩ ĩkĩsuakĩĩa kunsao nasika za kulukuuluu koona pĩna zijiliula, amusũgamĩĩlie muwikyalo waao uwa kalĩ nakalĩ.

¹⁰ “Namusuĩĩli mũintu nainiino ukutũlaa musuĩĩli sunga mũintu naikulu gaa; nasika munakulukuuluu mũintu nainiino ukutũlaa sika munakulukuuluu sunga mũintu naikulu gaa.

¹¹ Kangĩ malĩĩ uniinie sika muasuĩĩli munsao nasika za kulukuuluu, waani ukakumusuĩĩla munsao za tai.

¹² Malĩĩ sika alĩ muasuĩĩli munsao za muntu wĩngĩ, waani ukakumupeela inshao nazaani uniinie.

¹³ Kutilĩ umwĩtumi nusũũmile kukuatumĩla iShekulu naabĩlĩ, kuitĩ katia ukakumusuukĩlua umuĩ nukukumuloogua umuua, katia ukikamantana nuumuĩ nukukumumela umuua Sikaka musũũmile kukumutumĩla uNzua nĩmamona.”

ĩApalisayo itakĩlua

¹⁴ ĩApalisayo naalĩ alogua mpiia, pĩna naigyũlia ĩzaasio tũlũ, naamumela.

¹⁵ Nuaĩĩla; “Inie niinie mukĩpeelaa ĩkulukuuluu ntongela ya antu, ĩpa uNzua ulĩngile inkolo zaani; kuitĩ nalukuligue pakatĩ ya antu lukutũla uĩĩpĩlua ntongela ya kĩNzua.

¹⁶ “uUlagĩĩlio nĩAnakĩdagu alĩ ikoolĩ sunga kuntondo za kĩYohana; kwipũna ĩmatũngo maao iMpola naNziiza ĩza utemi wa kĩNzua zukutanantagiguaa, numuntu wensi ukĩingĩlagiaa kungũlũ.

¹⁷ Ĩpa itontũ igyulu nĩnsĩĩ zilimansĩĩligue kwikĩla katonua kamuĩ ka Ulagĩĩlio kwioononeka.

¹⁸ “Wensi nukumuleka umusungu waakue nukwitoola wĩngĩ wagololagiaa; ninduyo nukumutoola uyo namulekue numugoosia wagololagiaa.”

Mugolĩ numutũka uLazalo

¹⁹ “Alukoolĩ muntu umuĩ namugolĩ naalukĩtũnga intiila za kĩtemi naza ngele nkakũ nukulĩaa lutondo luensi kumamona.

²⁰ Nĩpamulango waakue alukuĩĩkaaguaa mutũka umuĩ, ĩliina liakue Lazalo naalutĩĩte inkonko ningĩ.

²¹ ninduyo alukuuzaa muauwe wikyute kumaminangulua namaguile pameeza ya mugolĩ; sunga imbua nazukumulampa inkonko zaakue.

²² Numutũka nukia, nusolua nĩamalaĩka kukĩkũa kya kĩIbũlahimu. uMugolĩ nduyo nukia, nuĩĩkua.

²³ Ĩpa kuasio kuulungu nunansula ĩmiiso maakue kĩna alĩ wĩĩlĩ muluago, numuona uIbũlahimu kĩna kulĩ nuLazalo mukĩkũa kiakue.

²⁴ Nwĩtunta nuũga, Ee tata Ibũlahimu, unkolelue kĩnishungu, umutume uLazalo watoelie ĩnsonge ya luala luakue mumaazĩ walupolie ululĩmĩ luane, kunsooko niaaga muna mooto uu.

²⁵ “uIbũlahimu nuũga, Muana waane, juka ya kĩna ue aluligilie maaza ĩmako muumĩ waako nuLazalo iio nuligia namabĩĩ. Ĩpaino nduyo wipumbuligua kunu, ninduue ualaalĩke.

²⁶ Kangĩ sika kunsooko yoĩ dũũ, ĩpa pakatĩ yĩĩtu ishie niniinie, lyaĩĩkilue lyĩndĩ kyulu koona ĩaasio naasiiile kwipũna alongole kunsiani alemue, sunga ĩaaiso a kunsiani alemue kwipũũta aaze kunsĩĩtu.

²⁷ Nuũga, Tata, nakulompa gua, umutume kunumba ya kĩtata wane,

²⁸ kunsooko ntĩĩte anũna aane ataano, koona waakuĩle, alekipika ndĩo paluandĩ ulu ulwa luago.

²⁹ uIbũlahimu nuũga, ‘Atĩĩte uMusa nĩanakĩdagu, naaiigie aao.’

³⁰ Nuũga, ‘Zũi Tata Ibũlahimu, ĩpa kanga muntu wapũne muakiu waagaane ndĩo ikipela.’

³¹ Numuĩĩla, ‘Na asiita kukĩiigia uMusa nĩanakĩdagu, sika ikigomba kanga umuntu wiiuke nakĩ kwipũna muakiu.’”