Luka 15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nkolo Naalĩlimĩlĩĩle

¹ Pĩna ĩasangulia-kooodi nĩanamĩlandu naiishũgamĩĩla amutegeele,

² ĩApalisayo nĩalangi naĩĩ kĩulũnga naaũga; “uMuntu uyu ukuasũgamĩĩlagiaa ĩanamĩlandu, kangĩ nulĩaa ensi nĩndĩo.”

³ Paapo nuaĩĩla ĩmpiani ĩĩ, nuũga;

⁴ “Waani mumiani nutĩĩtee inkolo gyana, kanga walimĩĩlie ĩmuĩ wasiite kuzileka ĩzaasio namakumi kyenda nikyenda kumbuga, wende kumĩdũũma nĩlimĩlĩĩle sunga wamĩone?

⁵ Ninduyo pĩna wamĩona, numĩĩĩkĩla kumaega maakue kuulumbi.

⁶ Nĩpĩna ukipika kukaa, ukĩĩĩtaa ĩasuaĩĩa aakue nĩanakaa aakue waaĩĩle, ‘Lumbĩ palumuĩ nineene, kuitĩ namĩligagiaa ĩnkolo yaane naazĩlimĩlĩĩle!’

⁷ Namuĩĩla, iio-iioo ukaa ukoolĩ ulumbi kwigyulu kunsooko ya munamĩlandu umuĩ nupelile, kwikĩla kunsooko ya anakulukuuluu naa makumi kyenda nikyenda nasika asiiile kwipela.”

Shilinge naalĩlimĩlĩĩle

⁸ Katia ukoolĩ musungu kĩ nutĩĩte shilinge kyumi, kanga wamĩlimĩĩlie ĩmuĩ nasikukusonsagiaa ĩntala nukwipiagula ĩnumba nukwidũũmĩkia sunga wamĩone.

⁹ Nĩpĩna wamĩona ukĩĩĩtaa ĩasuaĩĩa aakue nĩanakaa aakue nukukuaĩĩla, “Lumbĩ palumuĩ nineene kuitĩ namĩonaa kangĩ ĩshilinge yaane naaza nĩmĩlimĩlĩĩlie.”

¹⁰ Namuĩĩla, “Iio-iioo ukaa ukoolĩ ulumbi ntongela ya amalaĩka a kĩNzua kunsooko ya munamĩlandu umuĩ nupelile.”

Muana mulimĩĩli

¹¹ Nuũga, “Alukoolĩ muntu umuĩ naalutĩĩte aana abĩlĩ.

¹² namuniino numuĩĩla ũshee, ‘Tata, mpeela ityũmpĩ lya nsao nalikitũla liane.’ Nwĩoomolania inshao zaakue.

¹³ Pĩna nazikĩla ntondo sika ningĩ, umuana namuniino nuilingĩĩla tũlũ, nutũnga umusĩnzo kwienda kunsĩĩ ya kulĩ, nusapatĩlia inshao zaakue kuuko kuwikyalĩ wa usambo.

¹⁴ Pĩna nulĩa tũlũ, nzala nkulu ningĩla munsĩĩ niasio; nduyo nuandia kwikolua ĩnzala.

¹⁵ Nuenda nutũgua numukolakaa umuĩ wa nsĩĩ niasio, nduyo numutuala kumugunda waakue wadĩĩme ingũlũĩ.

¹⁶ Alutĩĩte nsula kukikyuta ĩmuululilua naalĩ zukulĩaa ingũlũĩ, ĩpa kutilĩ naalumupĩĩle kakĩntu.

¹⁷ Pĩna nwijuka mumoo waakue nuũga, ĩAnamulĩmo aanga a kĩtata waane nailĩa ĩkikyuta nukwishaagia, nineene ĩpa nikia nanzala.

¹⁸ Nikilongola nende kwa kĩtata, nĩkakumuĩĩla, ‘Tata, natimuĩle kwigyulu nĩntongela yaako.

¹⁹ sika nijĩpĩĩle kwiĩĩtua muana waako kangĩ; ntenda zĩ umuĩ wa anamulĩmo aako.’

²⁰ Nulongola nuenda kwa kishee. “Pĩna alĩ kĩlĩ wĩĩlĩĩ kulĩ, ũshee numuona numukolelua kĩsuusu, numanka numukũmbasĩla munkingo, numusunĩkia.

²¹ uMuana numuĩĩla ũshee, ‘Tata, natimuĩle kwigyulu nĩntongela yaako; sika nijĩpĩĩle kwiĩĩtua muana waako kangĩ.’

²² Ĩpa ũshee nuaĩĩla ĩĩtumi aakue, ‘Mĩleetĩ kuukaaũ ĩntiila niasio nanziiza,’ mumujiale; mujialĩ nĩkĩnanzala muluala luakue niilaatu mumĩgulu yaakue;

²³ Mĩleetĩ nĩndaama niasio nangĩnu mumĩtemie; nindiishie kulĩe nukwilumba.

²⁴ Kuitĩ umuana waane uyu alĩ wakiile ninduyo wiiukaa, alĩ walimĩlĩĩle ninduyo wigyelaa. Naandia kwilumbĩĩlia.

²⁵ “Ĩpa umuana namukulu alĩ wĩĩlĩ kumugunda; pĩna nupoloka nukwishũgamĩĩla panumba, nũigia induli za mĩmbo nĩmĩsĩgo.

²⁶ Numuĩta mwĩtumi umuĩ numukolia, Mpola izi, ĩndogolelio yaakue yaani?

²⁷ Numuĩĩla, ‘uMunũna waako waazaa, nũshoo wamĩtemagiaa ĩndaama nangĩnu.’

²⁸ Nutaka, nusiita kwiingĩla. ĩpa ũshee nupũna kunzi, numupeepeelia.

²⁹ Numushookeelia ũshee nuũga, ‘Laaa, ĩne nukukutumĩlaa miaka yĩnga ĩzĩ, sunga sika alĩ ntimulĩĩle kilyagĩĩlio liako ityũngo liensi, ĩpa sika numpeela kakaana-mbuli, nzĩpie ulumbi palumuĩ nĩasuaĩaane;

³⁰ ĩpa pĩna waazaa uyu umuana waako naalulĩĩle inshao zaako palumuĩ nĩagololia, wamutemelia uyo ĩndaama nangĩnu.’

³¹ Numuĩĩla, ‘Muanuane, ukoolĩ palumuĩ nineene intondo tũlũ, kangĩ tũlũ nayaane ingĩ yaako.

³² Ĩpa kwijĩpia uulumbi nukwilumbĩĩlia aza ijĩpĩĩle kuitĩ uyu umunũna waako alĩ wakiile nduyo wiiukaa, alĩ walimĩĩlĩĩle nduyo wigyelaa.’”