Luka 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muluĩle wa kĩdaa wikamigua palutondo lwa wikyali

¹ Palutondo lwa wikyali pĩna nũingĩla munumba ya muntu umuĩ nwa akulu a Apalisayo walĩe india, alĩ amukũsĩĩle.

² Laaa, ntongela yaakue alukoolĩ umuntu naalutĩĩte uluĩle wa saapula.

³ ũYesu nushookeelia nuaĩĩla ĩanakialo nĩApalisayo; “Mũikone kwikamia palutondo lwa wikyali kanga zũi?”

⁴ ĩAasio naatulia. Numũtyapa nu mukamia, numulekela walongole.

⁵ Nuaĩĩla; “Waani mumiani, kanga muana waakue katia ng'ombe yaakue ĩĩguĩlĩĩle muluzĩ, wasiite kukumĩpũnia ĩkamuĩ palutondo lwa wikyali.”

⁶ Nĩndĩo sika naasũũma kwishookeelia kalukaani.

Kukĩniinupia nuusũgamĩĩlia

⁷ Nuaĩĩla mpiani ĩaasio naalĩ aanue pĩna nuona kĩna alĩ asaaguĩle ĩmatengu ĩma kuntongela, nuũga,

⁸ “Pĩna umuanue numuntu kuwĩnga, uleke kukikyalansa mwityengu lya kuntongela, ilekitũla katia ĩmuanue muntu namukulu kwikĩla ue,

⁹ nukiiiza unuasio naalumuanile inie ensi, nukukukuĩĩla, ‘Leka ĩlioma kwa kĩuyu. Paapo ukiandia kwikolua inshooni kukikyalansigua paluandĩ ulwa kunũma.’

¹⁰ Ĩpa pĩna wanua, lenda wikyalanse paluandĩ ulwa kunũma koona pĩna waaza naazukuanile wakuĩĩle, ‘Musuamĩaane, nzuu kĩna ntongela gua,’ paapo ukitũla nuukulu ntongela ya tũlũ naikyalansile palumuĩ ninduue.

¹¹ Kuitĩ wensi nukĩkulagiaa ukiniinupagigua, ninduyo nukĩniinupagia ukikuligua.”

¹² Numuĩĩla nunuasio naalumuanile; “Pĩna wilũga india ĩza pamunsĩ katia ĩza pampĩndĩ, uleke kuaana ĩasuaĩaako sunga ĩanũna aako, sunga ĩantu aako, sunga nĩanakaa ĩaako naazengua; nĩndĩo alekiiiza kukukuana kangĩ uligie kwishookeligua.

¹³ Ĩpa pĩna wilũga india, uane ĩatũka nĩalema nĩanakĩtele nĩapokũ,

¹⁴ ninduue ukitũla muliukũ kunsooko ĩaasio agila kya kukushookelia; kuitĩ ukishookeligua muwiiuki wa akola kulukuuluu.”

Mpiani ya waanua kundia

¹⁵ Pĩna nũgyũlia ĩzaasio, umuĩ wa aasio naalĩ ikyalansile pandia palumuĩ nduyo numuĩĩla, “Muliukũ unuasio nũjililĩa uugalĩ muutemi wa kĩNzua.”

¹⁶ Numuĩĩla; “Muntu umuĩ alulũgile india ningĩ, nuaana antu iingĩ,

¹⁷ numutuma umwĩtumi waakue pityũngo lya ndia waaĩĩle ĩaasio naalĩ aanue, Nzuĩ kuitĩ tũlũ yensi yakondagiguaa.”

¹⁸ Naandia tũlũ kwipũnia uwĩloongo kũshĩĩgo lĩmuĩ. Nwa muandio numuĩĩla; “Aza ngulile mugunda, injĩpĩĩle nende nuulaae; nakulompa undekele.”

¹⁹ Numuua nuũga; “Aza ngulile ng'ombe kyumi za mulimo, injĩpĩĩle nende niziigeme; nakulompa undekele.”

²⁰ Numuua nuũga; “Aza ntoolile musungu nukunsooko ĩĩ sika nsũũmile kwiiza.”

²¹ uMwĩtumi nushooka numuĩĩla ũShekulu waakue impola zaasio. Paapo umukola numba nutaka, numuĩĩla umwĩtumi waakue, “Pũnanga, lenda kunzĩla nukupijĩla pya kaa, ualeete ĩpa ĩatũka nĩalema nĩapokũ nĩanakĩtele.

²² uMwĩtumi nuũga; Shekulu, zaasio naazundagĩlĩĩlie zatendekaa, sunga kĩlĩ lĩkoolĩ ĩlioma.

²³ ũShekulu numuĩĩla umwĩtumu; Pũna kunzi wende kunzĩla nankulu nukumpongolo uakankanĩke ingĩle, koona ĩnumba yaane ijule.

²⁴ Kuitĩ namuĩĩla ya kĩna muaasio naalĩ aanue kutilĩ kaumuĩ nukitoma india zaane.”

Ngele ya kutũla mumanigua wa kĩYesu

²⁵ Pĩna maũmbĩ mingĩ alĩ mĩtiatile ninduyo, nupĩluka nuaĩĩla;

²⁶ “Kanga wensi waaze kumuane ninduyo wasiite kumusuukĩlua ũshee nunina, sunga numusungu waakue nĩaana aakue nĩanũna nĩagũlĩ aakue, eeze, sunga ĩnkolo yaakue umuene, sikusũũmile kwitũla mumanigua waane.

²⁷ Ninduyo nasikukuukenkaa umusalaba waakue nukwintiata, sikusũũmile kwitũla mumanigua waane.”

²⁸ Kuitĩ waani mumiani nusiiile kwijenga ĩnumba nandĩĩpũ nasika wikyalansile tangua nukwialia kanga utĩĩte za kumĩkondelia?

²⁹ Ilekitũla pĩna wakondia kwiĩĩka umukũlĩla walemue kwikondia, tũlũ naikiona ĩzaasio, ikiandia kukumupopota

³⁰ ĩiũga, uMuntu uyu alĩ wandilie kwijenga, nulemua kukumĩkondia.

³¹ Katia mutemi kĩ nwilongola kuulugu kukĩkua numutemi wĩngĩ, nasika wikyalansile tangua nukwiikomia ĩkialo kĩna uyo kanga waatume ĩĩlaasi magana kyumi manzogũ usũũmilene kutaagana nunuasio nupolokile nĩĩlaasi magana makumi mabĩlĩ manzogũ.

³² Kanga waone kĩna sikusũũmile, ukutumaa mutumua walompe ĩmatiliga, kumutemi muua pĩna kĩlĩ wĩkulĩ.

³³ Itĩ yoi, wensi mumiani nasikukulekaa tũlũ nutĩĩte sikusũũmile kwitũla mumanigua waane.

³⁴ “uMulenge ingĩ muuza; ĩpa umulenge kanga usuuke, uĩĩkĩlue yaani ukolele.

³⁵ Sika wijĩpĩĩle kumugunda sunga pawiito; ĩantu akuutaagaa kunzi. Nutĩĩte ĩakutuĩ a kuigĩlia, nũigie.”