Luka 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ukuasugula ĩamanigua aakue mumpola za unamampĩlu

¹ Paasio pĩna iyũmbĩ naalĩ lĩlundĩlĩĩle magana magana sunga naĩĩ kĩtilangĩla, nuandia kukuaĩĩla ĩamanigua aakue tangua; “ĩsukukĩ nĩngaasio ya Apalisayo, ndĩo ingĩ unamampĩlu.”

² Kutilĩ kalukaani gua nalukũnĩkĩlue nasika lũjilikũnuku lua, sunga nalupisue nasika lũjililĩngua.

³ Ĩpa zensi naalĩ muzitambuĩle mukiiti zĩkakigyũligua muweelu; nĩnamuzitambuĩle muakutuĩ a antu kumbele zijilitanantigua kwityembe.

Ukuakamia nkolo ĩamanigua aakue

⁴ “Nineene namuĩĩla inie asuaĩaane, muleke kĩoopooka ĩaasio naakuulagaa umuĩlĩ pembele agila kausũũmi wa kutenda namĩngĩ.

⁵ Ĩpa nĩkakumusugula namukakumoopooka; moopooke uyo nutĩĩte usũũmi wa kwiulaga, kangĩ utĩĩte usũũmi wa kutaaga muGehena eeze namuĩĩla, moopookĩ unuasio!

⁶ Mbii, ipinoni pitaano sika pyukugulaguaa kusenti zibĩlĩne? Sunga sika kakuĩaguaa kakamuĩ ntongela ya kĩNzua.

⁷ Ĩpa sunga ĩmatũmbĩ ma kumatũe maani maaligue tũlũ mensi. Mulekioopoka gua, mwĩaaza inie kwikĩla ipinoni pingĩ.”

⁸ Nineene namuĩĩla, “Wensi nukinkũmuula ntongela ya antu, uMuana-muntu nduyo ukakumukũmuula ntongela ya amalaĩka a kĩNzua;

⁹ nĩnduyo nukinkaana ntongela ya antu ukikaanua ntongela ya amalaĩka a kĩNzua.

¹⁰ Nuwensi nukitambula ulukaani lwa kumusiita uMuana-muntu ukilekelua, ĩpa nukumutukĩla uMuau Muelu sikakaukilekelua.

¹¹ Pĩna ĩkakumutuala inie kuntongela ya masũnagogi nukuatemi nukuakulu, muleke kĩkunkunalia kwishĩĩga inkaani zaani namukakuashookeelia, katia kwitambula;

¹² kuitĩ uMuau ũMuelu ukakumumania pityũngo lĩĩlo nazĩmũjĩpĩĩle kwitambula.”

Kĩaya, nĩmpiani ya mugolĩ namunaulu

¹³ Muntu umuĩ wiyũmbĩ numuĩĩla; “Mumania, muĩĩle umunũna waane wanomoele uusaali wĩĩtu.”

¹⁴ Numuĩĩla; “Muntu ue, waani alumbĩĩkile ĩne ntũle mulamuli katia moomolania pakatĩ yaani?”

¹⁵ Nuaĩĩla; “ĩsukukĩ, mwĩkendegeele nĩkĩaya, kuitĩ uupanga wa muntu ukutilĩ muwingĩ wa nsao zaakue nutĩĩte.”

¹⁶ Nuaĩĩla mpiani nuũga; “Mugunda wa muntu mugolĩ alĩ upĩĩkilie;”

¹⁷ nũishĩĩga munkolo yaakue nuũga; ntendeeii, kunsooko numugila kalioma lya kuĩĩkĩla ĩkĩuto kya maogola maane.

¹⁸ Nuũga; “nikitenda itĩ; nikitaula uĩĩkĩlo waane, nzenge wĩngĩ naukulu; muumo mbĩĩkĩle uupemba waane, tũlũ niintu yaane.”

¹⁹ paapo nĩĩĩle; “Eenkolo yaane, utĩĩte intu naiiza iingĩ nwĩĩĩkĩĩlie ĩkĩuto kumiaka mingĩ; sũũpia gua, ulĩe ukope, ulumbe.”

²⁰ Ĩpa uNzua numuĩĩla; “Umunaulu uue, uutiku wau nĩmĩsiiile ĩnkolo yaako; niintu naalĩ wĩuutĩĩlie ikitũla ya kuani?

²¹ Iio wĩĩlĩ umuntu nwĩuutĩĩlie ĩkĩuto umuene, nusiita kĩgolĩpia kwa kĩNzua.”

Usuguli mumpola za wĩkunkunalia

²² Nuaĩĩla ĩamanigua aakue; “Kunsooko ĩĩ namuĩĩla mulekikunkunalĩla uumĩ waani, mulĩe yaani; sunga ĩmiĩlĩ yaani, mujiale yaani.

²³ Kuitĩ uuumĩ ukĩlĩkĩlĩĩle india, numuĩlĩ ukĩlĩkĩlĩĩle uwĩtũngi.

²⁴ Zilaaĩ inkungulu ya kĩna sika zukupandĩlaa sunga kwiogola; ngila kishagĩ sunga pauĩĩkĩlo nawĩngĩ, nuNzua ukuzilĩĩsagiaa. Inie mwĩaaza kwikĩlĩkĩĩla inoni!

²⁵ Wĩĩlĩ mpĩĩ mumiani nukĩkunkunalagiaa wasũũme kwiongeelia uulĩĩpũ waakue sunga uwa mukono umuĩ.

²⁶ Ĩpa malĩĩ sika musũũmile sunga ĩkalukaani nakaniino, yaakĩ kukĩkunkunalia kunsooko ya maasio namĩngĩ?

²⁷ Malaaĩ ĩmasungĩ kĩna makuliaa, sika makĩtumaa kamulĩmo sunga kwitũma intiila; nineene namuĩĩla ya kĩna uSolomoni muugolĩpi waakue tũlũ sika alĩ mujialue kaiiza kĩna lĩmuĩ lya maasio.

²⁸ Ĩpa malĩĩ uNzua ĩukumajialaa ĩmasanzĩ ma muweekusĩ namakoolĩ nantende numudaau namataagua mũlyungu sika, nangũlũne ukakumujiala, inie namwa usuĩĩli nauniino?

²⁹ “Inie mulekidũũma namukilĩa sunga kwikopa, sunga muleke kwikunguala,

³⁰ kuitĩ ĩzaasio akudũũmaa ĩa ndugu tũlũ za muna unkũmbigyulu. Ĩpa uTata waani umanile ya kĩna musiile ĩzaasio.

³¹ Ĩpa udũũmĩ uutemi waakue, nĩzaasio mukiongeeligua.

³² Mulekioopoka inie namwidyale niino, kuitĩ uTata waani waloilue kukumupeela inie uutemi.

³³ Guliĩ namutĩĩte, mupũnie ĩsadaka. ĩzĩpĩliĩ iidanda nasika yukukulupala, kĩuto nasiika kyukukeepa mwigyulu pĩna sika yukusũgamĩĩlaguaa numuii, sunga ĩmpekũnĩ sika yukoononaa.

³⁴ Kuitĩ kĩna ĩkĩuto kiani kiĩlĩ, inkolo zaani zikitũla zĩpaapo.”

Kĩna ijĩpĩĩle kwikengeala, nĩmpiani ya mulindĩĩla-nsao namusuĩĩli

³⁵ “iYĩĩno yaani nayĩĩ itũngue, nintala zaani zĩĩ zaakĩĩle;

³⁶ niniinie muĩ zĩ antu naamutũngĩĩle ũshekulu waao pĩna ukishooka kwipũna kuwĩnga, koona pĩna ukiiza nukwiũgia, ĩkamuĩ amũgyuĩle.

³⁷ Aliukũ ĩĩtumi aasio, pĩna ũShekulu waao ukiiza waagaane alaĩĩle. Tai namuĩĩla, ukakĩtũnga nukukuasũgamĩĩlia pandia, ukiiiza nukukuatumĩla.

³⁸ Kanga waazee muutiku wa katĩ katia waaze mũgyĩngu nukukĩaagaana iio, Aliukũ ĩĩtumi aasio.

³⁹ Ĩpa gua, lĩngĩ ulukaani ulu, ya kĩna umukola numba kanga ĩalumanile umũii ukiiza tyũngo kĩ alũjilikengeala, ĩnumba yaakue ĩlekitalulua.

⁴⁰ Luulo gua niniinie ĩzĩpĩĩliĩ, kuitĩ ityũngo nasika mulĩsĩĩgile, paapo uMuana-Muntu wijile.”

⁴¹ uPetelo numuĩĩla, “Shekulu, ĩmpiani ĩyĩ ukuĩĩlĩĩle undiishie dũũne, anga ĩantu tũlũ?”

⁴² ũShekulu nuũga, “Waani gua umulindĩĩli namusuĩĩli nĩnamusugũ, ũShekulu waakue ukakumuĩĩka munumba yaakue waapeele ĩantu india zaao pityũngo liao.”

⁴³ Muliukũ umwĩtumi nuasio, ũshekulu waakue pĩna ukiiiza ukakumuagaana witenda yaasio.

⁴⁴ Tai namuĩĩla, ukakumuĩĩka wĩĩ mukulu munsao zaakue zensi.

⁴⁵ Ĩpa umwĩtumi nuasio kanga waũge munkolo yaakue, “ũShekulu waane watinagiaa kwiiiza; wandie kukuakua ĩĩtumi ĩĩa naagoosia nĩnaakĩma, nukwilĩa nukwikopa nukwigaala,

⁴⁶ ũShekulu wa mwĩtumi nuasio ukiiiza palutondo nasikulusĩĩgile nĩnsaa nasika umĩlĩngile, ukakumutiĩnkanula nukukumuĩĩkĩlia ityũmpĩ liakue palumuĩ nĩaasio nasika asuĩlĩĩle.

⁴⁷ “Numwĩtumi nuasio nuumanile uulooa wa kĩShekulu waakue, sika nukĩzĩpĩĩlia sunga kwitenda uulooa waakue, ukikuĩkigua.

⁴⁸ Nunuasio nasikumanile, ninduyo utendile naijĩpĩĩle uukuua, ukikuugua iniino. Wensi namupeegue iingĩ, kumuakue ikidũũmua iingĩ, ninduyo naalĩ muĩĩkĩĩle iingĩ, kumuakue ikidũũmua iingĩ nangũlũ.”

Ilĩngasĩĩlio ya matũngo

⁴⁹ “Nijile kwiguma umooto muna nsĩĩ; kangĩ kutilĩ nanulusiiile isiititũla waakĩĩligue!

⁵⁰ Ĩpa ntĩĩte uubadĩĩzo nawinjĩpĩĩle kwibadĩĩzĩligua, nineene numutuunĩĩligue sunga ukondeeligue.

⁵¹ Musĩĩgilene ya kĩna alĩ nijile kwileeta matiliga munansĩĩ. Namuĩĩla sika iio, ĩpa uutemanuki.

⁵² Kuitĩ kwipũna ĩpaino, munumba ĩmuĩ ukaa akoolĩ antu ataano alemanile, atatu kuabĩlĩ, abĩlĩ kuatatu.

⁵³ Ikilemana ũsheenumuana waakue, umuananũshee, unina numunanso waakue, umunanso nunina; umukuĩlĩmĩla numukuĩ waakue, umukuĩ numukuĩlĩmĩla.”

⁵⁴ Nuaĩĩla nĩaniyũmbĩ gaa; “Pĩna mwaona ilyũnde kumpũmpũkĩli kuluandĩ lwa kumueli, ĩkamuĩ namuũga, mbũla yapolokaa, naitũla iio.

⁵⁵ “Pĩna nzega yakuunkaa kwipũna kutakama namuũga, Ikitũla mpasu nkulu, naitũla iio.

⁵⁶ Inie anamampĩlu, mumanile kwilĩnga uusiu wa nsĩĩ nigyulu; yatũla mbii gua kĩna sika muĩzĩ kwilĩnga ĩmatũngo aya?

⁵⁷ Nĩkĩ inie uniinie namuakola sika mukulamulaa ĩkulukuuluu.

⁵⁸ Kuitĩ pĩna mwĩtiatile numutakia waako kwienda kumutemi, muasio munzĩla ĩkamatĩkie kwikamantana ninduyo, waaze waleke kukukwesa sunga kuntongela ya mulamuli, numulamuli wakuĩĩkĩle mumĩkono ya mukola kulĩpania, numukola kulĩpania wakugumĩle mukĩtũngo.

⁵⁹ Nakuĩĩla, sika ukipũna umuasio kainiino sunga ukondie kwilĩpa ĩkasenti ka mumalĩĩlio.”