Luka 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwitumua kumuao namakumi mupũngatĩ nukwishooka kumuao

¹ Pĩna nazikĩla izi, ũShekulu nuaĩĩka nĩĩĩa makumi mupũngatĩ, nuatuma abĩlĩ-abĩlĩ amutongeele kwienda kukaa zensi nuluandĩ luensi kĩna alulomile kwienda umuene.

² Nuaĩĩla, “ĩMaogola mingĩ ĩpa ĩanamulĩmo akeei; iio gua mumulompe ũShekulu wa maogola waatuale ĩanamulĩmo mumaogola maakue.

³ Longolĩ; laaĩ, namutumaa inie zĩ aana-nkolo pakatĩ ya iyĩngi.

⁴ Mulekishola kambogoosi za mpiia sunga ĩmpĩnda sunga iilaatu, kangĩ muleke kĩsaaukia numuntu munzĩla.

⁵ Nĩnumba yensi namukiingĩla muũge tangua; ‘matiliga mĩĩ muna numba ĩyĩ!’

⁶ Naaukoolĩ muana wa matiliga, ĩmatiliga maaani mĩkakumũkyalĩla uyu; naa ukutilĩ, ĩmatiliga maani mĩkakumushookela inie.

⁷ Mũkyale munumba ĩĩo gua ĩmwilĩa nukwikopa iyaao; kuitĩ umunamulĩmo wijĩpĩĩle ĩkĩnamulĩmo kiakue; mulekishaama-saama kwipũna munumba ĩĩ nukwienda kunzĩa.

⁸ Nĩkaa yensi namukiingĩla, naaamusũgamĩĩlia, mulĩe india nazikiĩĩkua ntongela yaani,

⁹ muakamie ĩaluĩle naakoolĩ; muaĩĩle; ‘uUtemi wa kĩNzua wasũgamĩĩlaa kumuani.’

¹⁰ Nĩkaa yensi namukiingĩla, nĩndĩo kanga asiite kukumusũgamĩĩlia, mupũne muasio nĩpĩna mwakĩla munzĩla zaakue, ũgĩ;

¹¹ ‘Sunga ulukundĩ lwa kaa yaani nalwakamantĩĩlaa mumĩgulu yĩĩtu kwalukũnũnta mumiani; ĩpa mumane izi, ya kĩna uutemi wa kĩNzua wasũgamĩĩlaa.’

¹² Namuĩĩla ya Kĩna ikitũla itontũ kuSodomũ kwigigimĩĩlia palutondo luasio kwikĩla kukaa ĩyo.

¹³ “Ukĩa kumuako Kolazini, ukĩa kumuako Betisaida! Kuitĩ kanga ĩmakula naalĩ matendekile kumiani kanga ĩalĩ matendekile kuTilo nĩSidoni, alĩ ijilee apelille kalĩ, ĩkikyalansa kunu ĩĩkĩtũnga imbuela nukukĩsemuĩla ĩmaũ.

¹⁴ Ĩpa ikitũla itontũ kuTilo nĩSidoni kwigigimĩĩlia muulamulua kwikĩla kumiani.

¹⁵ Ninduue Kapelinaũmũ, ukinansuluane sunga kwigyulu? Ukitimigua sunga kuulungu!

¹⁶ Nukumũigagiaa inie ukunzigagiaa uneene; nukumusiitaa inie ukunsiitaa uneene; nunduyo nukunsiitaa ĩne ukumusiitaa uyo naaluntumile.”

¹⁷ ĩAasio naa makumi mupũngatĩ naashooka kuulumbi, naaũga; “Shekulu, sunga ĩmasĩĩmuĩ makukugombia ishie kuliina liako.”

¹⁸ Nuaĩĩla; “Aza numuoonie ũShetani wigua kwipũna kwigyulu zĩ lupĩĩto.

¹⁹ Laaĩ, namupeelaa usũũmi kwitilata injoka ningĩĩ, nukũtilata ingũlũ tũlũ za mulugu; sunga kutilĩ kakĩntu nakĩkakumualaalia inie.

²⁰ Ĩpa mulekilumba yaasio kĩna ĩmasĩĩmuĩ makumugombia, ĩpa lumbĩ kunsooko ĩmiina maani mandĩkue kwigyulu.”

Kwishongelia kwa kĩYesu

²¹ iTyũngo lĩĩlo-lĩĩloo nulumbĩĩlia mwa kĩMuau Muelu, nuũga; Nakusongelia Tata, Shekulu wigyulu nĩnsĩĩ, kuitĩ waapisĩle izi ĩanamasala nuusugũ, nuakũnukuĩla naatakata. Eeze Tata, kuitĩ iio alĩ umuloeeligue.

²² Tũlũ yensi napeegilue nuTata waane; kutilĩ numulĩngile uMuana isiititũla uTata, kangĩ wensi kutilĩ numulĩngile uTata isiititũla uMuana kangĩ wensi uMuana nusiiile kukumukũnukulĩla.

²³ Nuapĩlukĩĩla ĩamanigua aakue, nuĩ kĩtambuĩla nĩndĩo ing'ene dũũ, nuũga; “Maliukũ ĩmiiso namakuonaa namumaoonie inie.

²⁴ Kuitĩ namuĩĩla ya kĩna anakĩdagu iingĩ nĩatemi alĩ asiiile kwiona namukumaonaa inie, sika naamaonaa; nukukumiigia namukumiigagiaa iinie; sika naamiigia.”

Nzĩla ya kuligia uupanga wa kalĩ nakalĩ

²⁵ Laaa, umunakialo nuĩmĩka wamugeme, nuũga; “Mumania, ntende yaani nuusaale uupanga wa kalĩ nakalĩ?”

²⁶ Numuĩĩla; “Yandĩkue yaani muUlagĩĩlio. Usomile mbii?”

²⁷ Nushookeelia numuĩĩla; “Umuloogue ũShekulu Nzua waako kumoo waako tũlũ mukunkolo yaako tũlũ nukungũlũ zaako tũlũ nukumasala maako tũlũ, numunakaa waako kĩna ĩnkolo yaako.”

²⁸ Numuĩĩla; “Washookeelia iiza; tenda iio nĩnduue ukitũla umupanga.”

Mpiani ya Musamalia namuuza

²⁹ Nunduyo nwĩsiia kukĩona kĩna munakulukuuluu, numukolia ũYesu; “uMunakaa waane waani?”

³⁰ ũYesu nuluamba ulukaani ulu nuũga, “Muntu umuĩ alupũnile kũYelusalemũ kwienda kũYeliko, nuguĩlua nĩaleegelania; naamujiula intiila naamukua nguma naenda naamuleka piipĩ kwikia.

³¹ Kunsungia mupolia umuĩ alukĩlile ĩĩo nzĩla; pĩna numuona nuseenuka kĩmpeelo.

³² nuMulawi iio-iiioo, pĩna nupika paasio numuona, nuseenuka kĩmpeelo.

³³ Ĩpa Musamalia umuĩ mumusĩnzo waakue numuagaana paapo pĩna alĩ wĩĩlĩĩ; ĩpa numuona numukolelua kĩsuusu.

³⁴ Numusũgamĩĩla numutũnga inguma zaakue, nuzipaka ĩmakũta numubinio; numunankĩlia mundoguĩ yaakue numutuala kunumba ya agenda, numukendegeela.

³⁵ Palutondo lwa kabĩlĩ nupũnia shilinge zibĩlĩ numupeela umukola numba ya agenda nuũga, ‘Mukendegeele uyu; tũlũ kiensi nukipũnia nakĩkĩlĩkĩlĩĩle, pĩna nikishooka nĩkakukushookelia.’

³⁶ Waonaa mbii ue, muĩa naatatu nuĩmbi naalĩ munakaa waakue unuasio naalĩ muguĩlue nĩaleegelania?”

³⁷ Nuũga, “uUyo naalumukolĩĩlue ĩkĩsuusu.” ũYesu numuĩĩla, “Lenda utende iio-iioo.”

Malita nuMalia

³⁸ Pĩna naalongola nũingĩla mukĩsaalĩ kĩmuĩ, numusungu ĩliina liakue Malita numusũgamĩĩlia munumba yaakue.

³⁹ Ninduyo alutĩĩte munũna nukuĩtaguaa Malia naalĩ wikyalansile pamĩgulu ya kĩYesu nũigia inkaani zaakue.

⁴⁰ Ĩpa uMalita alĩ wĩkunkunĩĩlie kuwĩtumi wingĩ, numuendeela nuũga, “Shekulu, sika kĩntune kumuako kĩna umunũna waane wandeka itĩ nĩtume ĩmilĩmo ning'ene dũũ? Luulo gua, umuĩĩle wanzalĩĩlie.”

⁴¹ Ĩpa ũYesu nushookeelia nuũga; “Malita Malita, wĩkunkunĩĩlie nukukĩagia kunsooko ya intu iingĩ,

⁴² ĩpa kĩdũũmue kĩntu kĩmuĩ dũũ. uMalia usaaguĩle ityũmpĩ naliiza nasikukileegeligua.”