Apilipi 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usuguli

¹ Ĩpa gua anũna aane nanumuloogilue, nanumuonĩĩle nsula, ilyumbi liane, nĩngala yaane, ĩĩmĩkĩ kee iio kuukamatĩkũ mwa kĩShekulu, aloogua aane.

² Numupeepilie uEuodia, numupeepilie nuSintike ĩĩ nishĩĩgo lĩmuĩ mwa kĩShekulu.

³ Ninduuwegaa mĩaane wa tai, nukulompile wĩaalĩĩlie ĩasungu aasio, kuitĩ alĩ ĩkamatĩkilie muMpola na Nziiza palumuĩ nineene, nuKelemensi nduyo, nĩaasio naĩngĩ naalĩ ĩkĩtumaa umulĩmo palumuĩ nineene; aao namiina maao makoolĩ mumbũgũlũ ya upanga.

⁴ Lumbĩ mwa kĩShekulu intondo tũlũ; kaubĩlĩ naũga, lumbĩ.

⁵ uUpolo waani wigyelele kuantu tũlũ. ũShekulu wĩpiipĩ.

⁶ Muleke kĩkunkunalia kulukaani luensi, ĩpa muluensi kuulompi nukwinena palumuĩ nĩmasongelio, uusiio waani wigyelele kwa kĩNzua.

⁷ Nĩmatiliga ma kĩNzua namakĩlile ulĩngi wensi mĩkakumulindĩlĩlia inkolo zaani nĩmasĩĩgo maani mwa kĩKilisito Yesu.

⁸ Kumpelo anũna aane, zensi naza tai, zensi nazikyullio, zensi naza kulukuuluu, zensi nanzelu, zensi naza kuloeelia, zensi nazukukũmuukaa iiza, kanga wĩĩ ukoolĩ uuza wensi, kangaa luĩ lukoolĩ lukũmo naluuza luensi, zishĩĩgĩkie inkaani izi.

⁹ iMpola naalĩ mwĩmanilie kumuane nukukuzaanũnkula nukukuziigia nukukuziona kumuane, zitendĩ nuNzua nwa matiliga ukitũla palumuĩ niniinie.

Songela ya kĩPaulo mumpola za usũgamĩĩlia wa Apilipi

¹⁰ Numbĩkilie mwa kĩShekulu kunsooko ĩpaino kumpelo mwamiiula kangĩ ĩmasĩĩgo maani mumpola zaane, kĩna iio alĩ munsĩĩgile impola zaane, ĩpa sika namuligia kalioma.

¹¹ Sika nitambula izi kunsooko ya usilĩlua, kuitĩ nĩmanilie kwiendua muumo nuwikyaalĩ wensi nanuutĩĩte.

¹² Manile kwishilĩlua, kangĩ manile kukijulĩkigua. Muwikyaalĩ wensi numumpola zensi, numumanigue kukikyuta nukwikolua ĩnzala, kwitũla nĩnaiingĩ nukwikeepeelua.

¹³ Nĩzishũũmile tũlũ kwa kĩuyo nukumpeela ingũlũ.

¹⁴ Ĩpa itĩ alĩ mutendile iiza dũũ kwikamantana nineene muwaagigua waane.

¹⁵ Ine niniinie Apilipi, mumanile ya kĩna mumuandio wa Mpola na Nziiza pĩna nampũna kuMakedonia, lyukutilĩ kikyanisa naliĩngĩ naalĩ lĩkamamantĩĩne nineene mulukaani ulu lwa kupũnia nukwiaanũnkula, isiititũla uniinie dũũ.

¹⁶ Sunga pĩna alĩnĩĩlĩ kuTesaloniki alĩ mundeetĩĩle uwaalĩĩlia kuusilĩlua waane nkua ya muandio nĩnya kabĩlĩ.

¹⁷ Sika kina nĩkĩonelee nsula ĩkĩpeegua, ĩpa nizionĩĩlue nsula inkalĩ nazĩkĩongeelaa kwitũla ningĩ mũyalo liani.

¹⁸ Ntĩĩte intu tũlũ nukwikĩlĩkĩĩla, nijuilie ndee, pĩna alĩ naanũnkuĩle kumukono wa kĩEpapulodito iintu naalĩ ipũnile kumiani zĩ munũnku namuuza, sadaka nya ugombigua, nĩmuloelĩĩlie uNzua.

¹⁹ NuNzua waane ukakumongeelia kiensi namwasilĩlue kwilika lya ugolĩ waakue muukulu naukoolĩ mwa kĩKilisito Yesu.

²⁰ Kwa kĩNzua Tata wĩĩtu wĩĩ ukulu ĩkalĩ nakalĩ Amini.

Wĩlagi

²¹ Namukĩliĩ muelu wensi mwa kĩKilisito Yesu. ĩAnũna naĩpalumuĩ nineene akumulamukia.

²² ĩEelu ensi akumulamukia, nangũlũ ĩaasio naa munumba ya kĩKaisali.

²³ uUkende wa kĩShekulu Yesu Kilisito wĩĩ palumuĩ ninkolo zaani.