Apilipi 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ukapĩkĩ wa nsaĩlo za kĩmuĩlĩ

¹ Kumpelo gua, anũna aane, lumbikiĩ mwa kĩShekulu kukumuandĩkĩla zizo-ziizoo sika zinkatalia ĩne, ĩpa yukumusaĩpia inie.

² Ĩsukukĩ nimbua, ĩsukukĩ nĩnaakutendaa namabĩĩ, ĩsukukĩ nĩndĩo naakuudumulaa umuĩlĩ.

³ Kuitĩ ishie kuakola kualamigua, ishie nakukumutekelaa uNzua kwa kĩMuau nukukĩkũmazukia mwa kĩKilisito Yesu, sunga sika kuzishanilie ĩza kĩmuĩlĩ.

⁴ Ĩne nineene kanga aza nsiiile, aza nijilishania ĩza kĩmuĩlĩ. Wensi kaanga waone kĩna utĩĩte nsooko ya kuzishania ĩza kĩmuĩlĩ, ĩne nangũlũ.

⁵ Alĩ numualamigue palutondo lwa munaana; nĩmuntu wa luuli lwa Ĩsilaeli, wa kĩntua kya kĩBenjamini, nuMuebũlania wa Aebũlania; kumpola za kutiata uUlagĩĩlio, nuMupalisayo;

⁶ kumpola za wĩkakia, mukola kuliagia ikyanisa; kumpola za kulukuuluu niĩlĩ muUlagĩĩlio, alĩ numugila kishokio.

Nsula ya kĩPaulo kwitũla mwa kĩKilisito

⁷ Ĩpa itĩ, ĩzaasio naalĩ nsaĩlo kumuane,, naniziona kĩna ukapĩkĩ kunsooko ya kĩKilisito.

⁸ Tai-taaii, naiona tũlũ tũũlũũ kĩna ukapĩki kunsooko ya uuza naugila kaukinĩĩlo wa kumumana uKilisito Yesu, Shekulu waane; iio kunsooko yaakue nandigia uukapĩki wa intu tũlũ, naniiona zĩ mpalala koona numuligie uKilisito;

⁹ kangĩ nigyelele mumuakue, ndekitũla nĩkulukuuluu nikigyelelaa kuUlagĩĩlio, ĩpa ĩo nikigelelaa kunzĩla ya usuĩĩli mwa kĩKiliisto; ĩkulukuuluu nyukupũnaa kwa kĩNzua, kunzĩla ya usuĩĩli.

¹⁰ Kangĩ numumane uyo, ningũlũ za wiiuki waakue, nuukamantani wa waagi waakue, nĩpianĩkĩĩligue nukwĩkia kumuakue;

¹¹ koona kanga ĩishũũmĩkile mpikĩĩle uwiiuki wa kupũna muakiu.

¹² Sika ya kĩna napikile katia nakamĩnkĩlĩĩle, zũi, ĩpa nĩambukĩlĩĩlie, nulũtyape uluasio naKilisito Yesu alũtyapile.

¹³ Anũna aane, sika nsĩĩgile ya kĩna ĩne neene nityapile; ĩpa nitenda lukaani luulu, lumuĩ dũũ, nukuzĩĩwa ĩza kunũma, nukukĩsũntĩĩla ku zakuntongela,

¹⁴ nĩambukĩlĩĩlie, mpikĩĩle paukopelio wa mpĩĩla, ndigie ĩkĩpeegua kya wĩĩtua wa kukiania wa kĩNzua mwa kĩKilisito Yesu.

¹⁵ Ishie nakuakamĩnkĩĩlũ nakutiate ĩmasĩĩgo aya; kanga musĩĩge naliĩngĩ muliensi, uNzua ukakumukũnukuĩla ĩlĩ ndĩlo.

¹⁶ Ĩpa paasio pĩna kwapikile, nakugendele muulagĩĩlio uu-uuoo.

ĩMpiani ya kĩPaulo ĩtiatue

¹⁷ Anũna aane, mutũle atiati aane; mualaae ĩaasio naakugendaa kuutiati wa mpiani naalĩ kumupĩĩle inie.

Anaulugu amusalaba wa kĩKilisito

¹⁸ Kuitĩ iingĩ akugendaa kĩna alĩ numuĩĩlĩĩle nkua ningĩ impola zaao, sunga nunzuauu nukumuĩĩla kumisholi, ya kĩna ingĩ alugu a musalaba wa kĩKilisito

¹⁹ ĩMpelo yaao ingĩ oononeki, unzua waao ingĩ ĩndaa, uukulu waao wĩĩlĩ munsoni zaao, naakusĩĩgaa impola za muna nsĩĩ.

²⁰ Ĩpa uukolakaa wĩĩtu ukoolĩ kwigyulu, kwipũna kuasio kumutũngĩĩle uMugũni, Shekulu Yesu Kilisito;

²¹ nukakuukaĩla umuĩlĩ wĩĩtu wa uniekũ wĩpiane numuĩlĩ waakue wa ukulu, kungũlũ nazukumusũũmagia kukuiĩĩka tũlũ yensi nsĩlĩlĩ yaakue.