Aepeso 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Utumua wa kĩPaulo ingĩ kwikũnukula unkũnkũ wa kĩNzua

¹ Kunsooko ĩĩ ĩne nanĩPaulo numutũngua wa kĩKilisito Yesu kunsooko yaani inie ndugu nazĩngĩ.

² Nĩmbũge mũigilie impola za wĩtumi wa ukende wa kĩNzua naalĩ numupeegue kunsooko yaani;

³ ya kĩna kuukũnukuĩlua namanigua uunkũnkũ, kĩna alĩ numuandĩkĩĩle inie kunkaani nkeei.

⁴ Pĩna mukuzishoma, mukishũũma kwilĩnga uumani waane muunkũnkũ wa kĩKilisito.

⁵ Muwĩleli nawĩngĩ ĩantu sika alĩ amanigua uunkunku waasio, kĩna akũnukulĩlue ĩpaino ĩatumua aakue naeelu nĩanakĩdagu mwa kĩMuau,

⁶ nduo ntuu, ĩa ndugu nazĩngĩ ingĩ asaali palumuĩ nindiishie, nĩndĩo akoolĩ mumuĩlĩ umuĩ, akamantani palumuĩ nindiishie ilyago mwa kĩKilisito Yesu kunzĩla ya Mpola naNziiza.

⁷ Alĩ ntũlile mwĩtumi wa Mpola na Nziiza ĩzaasio kwilika lya upeegua wa ukende wa kiNzua nanumupeegue kuwĩtumi wa ngũlũ zaakue.

⁸ Ĩne nanumuniino kwikĩla unuasio naalĩ muniino wa eelu tũlũ, alĩ numupeegue uukende uu, kukuatanantĩlia ĩa ndugu nazĩngĩ iMpola na Nziiza za ugolĩ wa kĩKilisito nasika usũũmile kwilĩngĩka;

⁹ sunga kukuamĩlĩkĩla tũlũ ensi, amane kĩna wĩĩlĩ uukendegeeli wa unkũnkũ waasio naalĩ wĩsuekile mwa kĩNzua kwipũna ĩkalĩ, naaluitũndile intu tũlũ yensi.

¹⁰ Iio gua, ĩakulu nĩakola usũũmi a kwigyulu amane ĩmasala namingĩ ma kĩNzua, kunzĩla ikyanisa.

¹¹ Alĩ itĩ kwilika lya usiio waakue wa kalĩ nakalĩ naalutendile mwa kĩKilisito Yesu Shekulu wĩĩtu.

¹² Mumuakue alukutongelĩĩle ĩnzĩla ya kumuagaana, ĩkutilĩ kaooa wensi, kuukamatĩkũ, kunzĩla ya usuĩĩli wĩĩtu mumuakue.

¹³ Luulo gua, nompile mulekitia kansula kunsooko ya waagigua waane kunsooko yaani, kuitĩ wamuligĩĩlie inie uukulu.

Ulompi wa kulĩĩnga iMpola na Nziiza

¹⁴ Kunsooko ĩĩ natũngama pa kĩtata,

¹⁵ Uzo kuliina liakue utata tũlũ wensi wa kwigyulu numuna nsĩĩ ukuĩtaguaa.

¹⁶ Wamupeele inie kwilika lya ugolĩ wa ukulu waakue, kwitendua akamũ kungũlũ, kunzĩla ya kĩMuau waakue muuntu wa munsĩ.

¹⁷ uKilisito wikyale munkolo zaani kunzĩla ya usuĩĩli; koona inie musĩmbĩlue ĩmĩlĩ, muzengue mumukũlĩla muuloogua.

¹⁸ Kangĩ musũũmĩkie kwilĩnga palumuĩ nĩeelu tũlũ uuloogua kĩna wĩĩlĩ uugalĩ nuulĩĩpũ, nuulĩĩpũ wa kuenda kukiani, nuusimu.

¹⁹ Sunga mumane uuloogua wa kĩKilisito naukĩlile ulĩngi kunsooko ya wingĩ waakue, koona mũjulue nuwijuli wensi wa kĩNzua,

²⁰ ĩpaino kumuakue nusũũmile kwitenda nkaani zensi nazikĩlile tũlũ nakukuzilompa katia nakukuzishĩĩga, kwilika lya ngũlũ nazĩkĩtuma umulĩmo munsĩ yĩĩtu.

²¹ Kumuakue uyo wĩĩ ukulu mũkyanisa numwa kĩKilisito Yesu kuwĩleli tũlũ-tũũlũũ sunga ĩkalĩ nakalĩ kutilĩ kampelo. Amini.