Aepeso 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uUgũnua ingĩ kuukende wa kĩNzua

¹ Niniinie alumupangatilie pĩna alĩ muakiu kunsooko ya utimu nĩmĩlandu yaani.

² Naalĩ mukugendelaa ndĩo ĩkalĩ kukuzitiata intendo za unkũmbigyulu uu, nukukumutiata umutemi wa usũũmi wa nzega, ĩnkolo niasio nyĩkĩtuma umulĩmo sunga nunzuauu muaana auleki.

³ Pakatĩ yaao sunga nindiishie alĩ kukikyala ĩkalĩ munsula za miĩlĩ yĩĩtu, nakukondeelia uulooa wa kĩmuĩlĩ nuwa masĩĩgo, nakutũla kuwikyaalĩ wĩĩtu aana a utaki kĩna nĩndĩo naĩngĩ.

⁴ ĩpa itĩ uNzua, namukola ugolĩ wa kĩninshungu, kuuloogua waakue naukulu naalukuloogilue,

⁵ sunga paapo pĩna alĩ kuakiu kunsooko ya utimu wĩĩtu, nukupangatia palumuĩ nuKilisito (muagũnue kuukende).

⁶ Kangĩ nukuĩukia palumuĩ nduyo nukukũkyalansia ensi nduyo kwigyulu pa kĩKilisito Yesu.

⁷ Koona mwityũngo nalijile, waũgyelelie uwingĩ wa ukende wakue naukĩlile ĩngele kuuuza waakue kumuĩtu mwa kĩKilisito Yesu.

⁸ Kuitĩ muagũnue kuukende kunzĩla ya usuĩĩli; nuwaasio sika upũnile kumuani inie, ingĩ upeegua wa kĩNzua;

⁹ kangĩ sika kuutendi, tũlũ wensi waleke kĩkeema.

¹⁰ Kuitĩ kwĩmulĩmo waakue, alĩ kuaumbue mwa kĩKilisito Yesu kutende utendi nauuza, uo uNzua naaluzĩpĩĩlĩĩlie kwipũna umuandio, kugendele muwaasio.

Ndugu nazĩngĩ palumuĩ nĩAyahũdi akamantanigue mũkyanisa

¹¹ Luulo gua, jukĩkiĩ kĩna ĩkalĩ inie namwa ndugu nazĩngĩ kukĩmuĩlĩ namukuĩtaguaa nasika alaamigua nĩaasio naaalamigue, ingĩ waalami wa kĩmuĩlĩ naukutendaguaa kumĩkono;

¹² jukĩkiĩ kĩna ĩkalĩ paasio alĩ muagila ka Kilisito, alĩ mutemanukile nuluuli lwa Ĩsilaeli, agenda naagila ĩmalago milyago. Alĩ muagila kaulaaĩĩli, alĩ muagila kaNzua muna unkũmbigyulu.

¹³ ĩpaino mwa kĩKilisito Yesu, inie naalĩ mwĩkulĩ ĩpo pamuandio, muasũgamĩlĩĩligue piipĩ kumugali wa kĩKilisito

¹⁴ kuitĩ uyo muene matiliga mĩĩtu, naalukutendile ishie naalĩ kuabĩlĩ kwitũla umuĩ, nukĩleegia ĩkĩgilia ĩkya pakatĩ, ĩkya ulugu naalĩ kyukutemanuĩle.

¹⁵ Pĩna nuuleegia uulugu kumuĩlĩ waakue, uulagĩĩlio waasio wa malagĩĩlio namĩĩlĩ muntendo, koona waaumbe ĩaasio naabĩlĩ kwitũla muntu mupia umuĩ mumuakue umuene, muaasio muumo nuleeta ĩmatiliga.

¹⁶ Nukamantania tũlũ ensi naabĩlĩ nuNzua mumuĩlĩ umuĩ kunzĩla ya musalaba, nukuuuo nuuuulaga uulugu wasio.

¹⁷ Nuuza nutanantia ĩmatiliga kumiani inie naalĩ mwĩkulĩ, nĩmatiliga kumiao naalĩ ĩpiipĩ.

¹⁸ Luulo gua, kunzĩla yaakue ishie nakuabĩlĩ kwaligagiaa nzĩla ya kumusũgamĩĩla uTata kwa kĩMuau umuĩ.

¹⁹ Iio gua sika kĩlĩ muagenda nĩakĩlania, ĩpa itĩ inie muakolakaa palumuĩ nĩeelu, antu a munumba ya kĩNzua.

²⁰ Muazengue mumukũlĩla wa atumua nĩanakĩdagu, nuKilisito Yesu ingĩ umuene gyũe nikyulu lya kuluũno.

²¹ Mumuakue uzengi tũlũ ukukamantanagiguaa kĩĩsa nukwikula, sunga utũle Numba nanzelu mwa kĩShekulu.

²² Mumuakue niniinie mwijengua palumuĩ kwitũla wikyaalĩ wa kĩNzua mwa kĩMuau.