Aebulania 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu mupolia namukulu kumpiani ya kĩMelikizedeki

¹ Kuitĩ uMelikizedeki, nuasio umutemi wa Salemũ, mupolia wa kĩNzua nwa kukiania, naalĩ itaaganile nuIbũlahimu pĩna alushookile kwipũna kuulugu wa kĩkua nĩatemi; numukembeta.

² uIbũlahimu numoomoela ityũmpĩ likyumi lya iintu tũlũ. Taangua ĩndogolelio ya liina liakue, ingĩ mutemi wa kulukuuluu, kangĩ mutemi wa Salemũ, kuitĩ ingĩ mutemi wa matiliga.

³ Mugila kishee, mugila kanina, mugila kandugu, mugila kamuandio wa ntondo sunga ĩmpelo ya uumĩ, ĩpa nwĩpianĩkĩĩligua nuMuana wa kĩNzua, wikyalile kũtula mupolia yukutilĩ kampelo.

⁴ Laaĩ gua, unuasio kĩna alĩ mukulu! uIbũlahimu, tata wĩĩtu namukulu numupeela ityũmpĩ likyumi lya utepi waakue.

⁵ Numuaana a kĩLawi naakuligagiaa umulĩmo wa upolia, atĩĩte lyagĩĩlio lya kusola ityũmpĩ likyumi lya antu aao, ingĩ aao ĩanũna aao kunzĩla ya Ulagĩĩlio, kanga nĩaasio gaa ĩapũnile palumuĩ nĩndĩo mũyĩĩno ya kĩIbũlahimu nakĩĩ.

⁶ Ĩpa uyo nasika wa ndugu yaao, nusola ityũmpĩ likyumi kwa kĩIbũlahimu, numukembeta uyo naalutĩĩte ĩmalago.

⁷ sika ya kukungumia kĩna namuniino ukukembetaguaa nĩnamukulu.

⁸ Ĩpa papa ĩantu naakukiaa akusolaa ityũmpĩ likyumi ĩpa kuasio nusola umuntu naalĩ mukuĩlue kĩna mupanga.

⁹ Ishũũmĩkile kwitambula ya kĩna uLawi umuene nukuanũnkulaa ityũmpĩ likyumi, nupũnia ityũmpĩ likyumi kunzĩla ya kĩIbũlahimu,

¹⁰ kuitĩ alukoolĩ mũyĩĩno ya kishee ĩpaasio uMelikizedeki pĩna alĩ itaaganilie nduyo.

¹¹ Ĩpa gua, kanga uukamĩnkĩĩlũ ĩalĩĩ ukoolĩ kunzĩla ya upolia wa kĩLawi (kuitĩ ĩpaasio pĩna alĩ ukoolĩ, ĩantu alĩ apeegue uUlagĩĩlio), kunsooko kĩ waĩĩkue kangĩ umupolia wĩngĩ wigyelele nwilika lya kĩMelikizedeki sika yĩĩ kũlika lya kĩAloni?

¹² Kuitĩ uupolia pĩna ukaĩlĩkile, kutilĩ kawĩnegelo, ĩpaasio ijĩpĩĩle nuulagĩĩlio nduo ukaĩlĩke.

¹³ Kuitĩ uyo naalĩ mutambulue ĩzaasio, alĩ mukamantani wa luuli luĩngĩ, sunga kutilĩ nwa luuli ulo nalukĩtumĩlaa paupolelio.

¹⁴ Kuitĩ yĩkualie kĩna ũShekulu wĩĩtu alupũniile mwa kĩYuda; mumpola za luuli luasio uMusa sika alutambuĩle kalukaani mumpola za upolia.

¹⁵ Kangĩ yĩkualie kwikĩlĩkĩĩla pĩna wigyelĩĩle umupolia nuĩngĩ kwilika lya kĩMelikizedeki,

¹⁶ naalutũlile mupolia sika kunzĩla ilyagĩĩlio lya kĩuntu, ĩpa kungũlũ za upanga naugila kampelo.

¹⁷ Kuitĩ wakuĩlua mumpola zaakue, “Uue wĩmupoolia ĩkalĩ nakalĩ, Kwilika lya kĩMelikizedeki.”

¹⁸ Paluandĩ lumuĩ, ikoolĩ kwileegigua ilyagĩĩlio lya muandio kunsooko ya uneketũ waakue, kangĩ kunsooko sika ukuleeta kansaĩlo,

¹⁹ (kuitĩ uUlagĩĩlio sika ukutimĩĩlagiaa kakĩntu); paluandĩ luua, nawingĩligwa uulaaĩĩli nauuza nangũlũ, nukuwaasio kukumusũgamĩĩla uNzua.

²⁰ Naikulu nangũlũ, sika naitũla pĩna yukutilĩ kilyapo.

²¹ ĩAasio a kalĩ alĩ atũlile apolia pĩna kutilĩ kilyapo, ĩpa uyo palumuĩ nilyapo kwa kĩuyo naaluũgile mumpola zaakue, “ũShekulu walapile, Sunga sika ukikaĩla ishĩĩgo liakue; Uue wĩmupolia ĩkalĩ nakalĩ.”

²² Kunzĩla ĩĩ ũYesu watũlile musegamĩli wilyago naliiza nalĩkĩlĩkĩlĩĩle.

²³ Kangĩ ĩasio ĩa kalĩ alĩ apolia iingĩ, alĩ akulemagiguaa nĩnkia kukikyala,

²⁴ ĩpa unuasio kunsooko ukilyalaa sunga ĩkalĩ nakalĩ, utĩĩte uupolia waakue nasika ukukaĩlĩkaa.

²⁵ Iio gua, usũũmile kukuagũna sunga kumpelo ĩaasio naakumusũgamĩĩla uNzua kwa kĩuyo, kunsooko ukoolĩ mupanga intondo tũlũ, koona waalompeele.

²⁶ Kuitĩ alĩ ijĩpĩĩle ishie kutũle numupolia namukulu kĩna uyu, namuelu namugila kaubĩĩ, namugila kibyado, naalĩ mukamatulue nĩanamĩlandu, nunansulua kukiania igyulu.

²⁷ Uyo sikusiile lutondo luensi, kĩna ĩapolia naakulu naĩngĩ, tangua kwipũnia ĩmapolia kunsooko ya mĩlandu yaakue umuene, pembele kunsooko ya mĩlandu ya antu; kuitĩ uyo alutendile itĩ kamuĩ dũũ, pĩna alĩ wĩpũnilie umuene.

²⁸ Kuitĩ uUlagĩĩlio ukuaĩĩkaa ĩantu naatĩĩte uneketũ atũle apolia naakulu; ĩpa ulukaani lwilyapo naalĩ lwijile kunũma ya Ulagĩĩlio lwamuĩĩkile uMuana namukamĩnkĩĩlũ sunga ĩkalĩ nakalĩ.