Aebulania 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Iio gua, kulege kuumanigua wa muandio wa kĩKilisito kulongoleke kuukamĩnkĩĩlũ; kulekiĩĩka kangĩ umukũlĩla wa upeli kwipũna muutendi naukiu, nuusuĩĩli kwa kĩNzua,

² nuumanigua wa ubadĩĩzo, nukwiĩĩkĩlua ĩmĩkono, nuwiiukigua mwa akiu, nuulamulua wa kalĩ nakalĩ.

³ Kukitenda itĩ gua, naNzua wakugombia.

⁴ Kuitĩ ĩaasio naakondile kwipeegua uweelu munkolo, nukwitomia uupeegua wa kwigyulu, nukwitũla akamantani a kĩMuau Muelu,

⁵ nukukulutoma uLukaani naluuza lwa kĩNzua, ningũlũ za unkũmbigyulu naukiiiza;

⁶ ĩaasio kanga atũle aleki, sika ishũũmĩkile kukuatenda ĩĩ apia kangĩ sunga apele. Kunsooko akumukononteela mumusalaba uMuana wa kĩNzua ĩeene nkua ya kabĩlĩ, nukukumumela kualie.

⁷ Kuitĩ ĩnsĩĩ nyukukopaa ĩmbũla nyukukuaa nkua kunkua nukwiliisia inani nukukuasaĩpia ĩaasio nukunsooko yaao yukulĩmaguaa, yukuanũnkulaa uukenbetua kwipũna kwa kĩNzua.

⁸ Ĩpa kanga ĩliisie iyĩnza nimbĩgĩlĩ kutilĩ kansaĩlo kangĩ, ĩpa zitũla piipĩ nuuzũmua; ĩmpelo yaakue ingĩ kwishoonsua.

⁹ Ĩpa itĩ aloogua, kanga kutambule itĩ nakĩĩ, kumpola zaani kusuĩlĩĩle inkaani nanziiza nangũlũ, nazitĩĩte ugũnua.

¹⁰ Kuitĩ uNzua sika mubĩĩ, sunga wĩĩwe ĩmĩlimo yaani nuuloogua waasio naalĩ muũgyelĩĩlie kuliina liakue, pĩna alĩ mukuatumĩla ĩeelu, sunga nunzuauu kĩlĩ mukuatumĩla.

¹¹ Kwasiiia gua, wensi mumiani wigyelelie uukamatĩkũ uo-uuoo, waũtyapĩkie uulaaĩĩli tũlũ sunga kumpelo,

¹² koona mulekitũla akata, ĩpa mutũle atiati a aasio naakusaalaa ilyago kunzĩla ya usuĩĩli nuugigimĩlia.

Malago ma kĩNzua makuleeta ulaaĩĩli

¹³ Kuitĩ uNzua pĩna alukumupeela uIbũlahimu ilyago kunsooko alĩ mugila namukulu kwikĩla uyo umuene nwa kumulapĩla, alulapile umuene mukola,

¹⁴ nuũga, iTai, uukembeti, nĩkakukukembeta; nuwongeelia, nĩkakukongeelia.

¹⁵ Iio gua, uIbũlahimu pĩna nugigimĩlia nuona kĩna ilyago nalĩtimĩĩlĩka.

¹⁶ Tai ĩantu akulapaa kwa kĩuyo namukulu kwikĩla ĩo, nuulapi ukutũla mpelo ya ukamĩnkĩĩlia wa wĩkungumi waao.

¹⁷ uNzua pĩna nusiia nangũlũ kukualagĩĩla ĩasaali ilyago kĩna uusio wakue sika usũũmile kwikaĩlĩka, nuĩĩka ilyapo pakatĩ,

¹⁸ koona kunzĩla ya intu ibĩlĩ nasika ishũũmile kwikaĩlĩka, mũyaasio uNzua sikusũũmile kwitambula uulongo, kuligie ipyumbulio nalya ukamatĩkũ, ishie naalĩ kumankĩlĩĩle kwiamba uulaaĩĩli waasio nauĩĩkue ntongela yĩĩtu,

¹⁹ nakutĩĩte zĩ kyamĩkĩlo lya nkolo nikyola ngũlũ nĩmatiliga, uulaaĩĩli naukĩlile mũpyupa lya kumbele nikwiingĩla sunga munsĩ;

²⁰ muasio muumo naalĩ wingĩĩle ũYesu umutongeeli kunsooko yĩĩtu, naalutũlile mupolia namukulu ĩkalĩ nakalĩ kwilika lya kĩMelikizedeki.