Aebulania 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Kuitĩ umupolia namukulu wensi namusaagulue pakatĩ ya antu ukuĩĩkaguaa kunsooko ya antu munkaani nazĩmũjĩpĩĩle uNzua, koona wapũnie ĩmapũnio nĩmapolia kunsooko ya mĩlandu.

² Uyo usũũmile kukuakenkelia kuupolo nasika amanile ninaalimĩlĩĩle, kuunsooko uyo umuene wĩĩlĩ muuneketũ.

³ Kunsooko ĩĩ nayumũjĩpĩla kwipũnia ipyolia kunsooko ya mĩlandu yaakue, kĩna iio nukuapũnĩlagiaa nĩantu.

⁴ Ukutilĩ nukĩsolelagiaa ikyulio ĩlĩ, ĩpa uuyo namuĩtue nuNzua, kĩna iio uAloni alĩ muĩtue.

⁵ Iio-iioo uKilisito sika alĩ wĩkulilie umuene watũle mupolia namukulu, ĩpa alĩ muĩĩkue ninduyo naalumuĩĩlĩĩle. Ue uue wĩMuana waane Ĩne nantende nakulelaa.

⁶ Kĩna uũgile nĩpĩĩa, “Uue wĩmupolia ĩkalĩ nakalĩ Kwilika lya kĩMelikizedeki.”

⁷ Uyo pantondo zaasio pĩna alĩ wĩĩlĩ muwikyaalĩ wa muĩlĩ wa kĩuntu, alumupũnĩĩlie uulompi nuupeepia palumuĩ nukukumulĩĩlĩkia kumisholi, uyo nusũũmile kukumugũna kwipũna muukiu; nũigigua kwilika lya ukulia Nzua waakue.

⁸ Kanga alĩĩ Muana nakĩĩ, nwĩmania kwigomba kunzĩla ya waagigua uu naalĩ umuligilie;

⁹ nduyo paasio pĩna nutũla mukamĩnkĩĩlũ nutũla muandio wa ugũnua wa kalĩ nakalĩ kuasio tũlũ naakumugombaa,

¹⁰ nuĩĩkua nuNzua wĩĩ mupolia namukulu kwilika lya kĩMelikizedeki.

Kĩna ijĩpĩĩle kwikula munzĩla ya KĩKilisito

¹¹ Mumpola izi kutĩĩte inkaani ningĩ za kuganula, kangĩ nkakũ kukuziloondoosia kunsooko inie mualĩĩ akata a kutegeela.

¹² Kuitĩ yumũjĩpĩĩle inie kwitũla amania munityũngo ĩlĩ, ĩpa itĩ yĩmũjĩpĩĩle muntu wamumanie kangĩ uumanigua wa muandio wa nkaani za kĩNzua. Ĩpa inie mwijĩpĩĩle ĩmasunsu, sika india nankakũ.

¹³ Kuitĩ wensi nukukopaa ĩmasunsu sika walamana inkaani naza kulukuuluu, kunsooko wĩkĩna muana mutakata.

¹⁴ Ĩpa india nankakũ ingĩ za antu naakulu, ĩaasio namasala maao, kunzĩla ya kumatumĩla, mijiĩlĩĩligue kwilekanula nanziiza nĩnambĩĩ.