Aebulania 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uKilisito mukulu kwikĩla uMusa

¹ Luulo gua anũna namwĩeelu, namukamantĩĩne muwĩĩtua wa kwigyulu, musĩĩgĩkiĩ ũYesu, mutumua kangĩ mupolia namukulu wa ukũmuuli wĩĩtu.

² Alĩ musuĩĩli kumuakue uyoo naalumuĩĩkile, kĩna uMusa nduyo naalĩ musuĩĩli munumba tũlũ nya kĩNzua.

³ Kuitĩ ũYesu alĩ wijĩpĩĩle kwiligia ikyulio nangũlũ kwikĩla uMusa, kĩna umuzengi wa numba nutĩĩte ulukũmo nangũlũ kwikĩla ĩnumba ĩnene.

⁴ (Kuitĩ ĩnumba tũlũ nzengue numuntu, ĩpa umuzengi wa tũlũ yensi ingĩ uNzua.)

⁵ NuMusa, tai alĩ musuĩĩli munumba tũlũ nya kĩNzua kĩna mwĩtumi, watũle ukuĩli wa mpola nazijilitambulua.

⁶ Ĩpa uKilisito gua alĩ musuĩĩli mumpola za numba ya kĩNzua kĩna Muana. Nidiishie kwĩnumba yaakue kanga kwityapĩkie sunga kumpelo uukamatĩkũ wĩĩtu, nukukĩkũmazukilia muulaĩĩli wĩĩtu.

⁷ Iio gua, kĩna uMuau Muelu uũgile, “Nantende pĩna mukiiigia ululi luakue,

⁸ Mulekikapũkia inkolo zaani Kĩna mumatũngo ma uleki, Palutondo lwa ugemua mumbugi-melemele,

⁹ ĩpaasio ĩatata aani alĩ ingema naandaaa Naaona uutendi waane kumiaka makumi manĩĩ.

¹⁰ Luulo gua, nansuukĩlua uwĩleli uu, Nambũga, ‘Ĩntondo tũlũ akulimĩĩlaa munkolo zaao, Sika alĩ azimanile injĩla zaane.’

¹¹ Kĩna alĩ ndapile muutaki waane, ‘Sikaka ikiingĩla muusũũpio waane.’”

Kĩna ijĩpĩĩle kwitũla musuĩĩli sunga ĩmpelo

¹² Ĩkendegeelĩ, anũna aane, ilekitũla mumiani kaumuĩ nutĩĩte ĩnkolo nambĩĩ nya kusiitishuĩĩla, nya kumuleka uNzua namupanga.

¹³ Ĩpa itĩ mwĩsugule lutondo luensi, pĩna yĩĩtue, “Nantende,” kaumuĩ mumiani walekikapũka kuupembeeligua wa mulandu.

¹⁴ Kuitĩ kualĩĩ akamantani a kĩKilisito kanga kũtyapĩkie uukamatĩkũ wĩĩtu wa muandio sunga kumpelo,

¹⁵ kĩna itambulue, “Nantende pĩna ukiiigia ululi luakue, Mulekikapũkia inkolo zaani Kĩna mumatũngo ma uleki.”

¹⁶ Kuitĩ naalĩ iigilie nukwileka alĩ aani; sika aao tũlũne naalĩ apũnile muMĩsili naalĩ atongeelue nuMusa?

¹⁷ Kumiaka makumi manĩĩ alĩ waasuukĩĩlue aani; sika aaone naalĩ atimuĩle, nĩmĩimba yaao naalĩ ĩguile mumbugi-melemele?

¹⁸ Kangĩ aani naalĩ waalapĩĩle ya kĩna sika ijiliingĩla muusũũpio waakue, isiititũla aao nasika alĩ agombile.

¹⁹ Kwaona gua, ya kĩna sika naasũũma kwiingĩla kunsooko ya usiitishuĩĩla.