Aebulania 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Luulo gua, yukũjĩpĩĩle kuzikendegeele nkankanaa nakuziigilie, kuleke kuzilimĩĩlia.

² Kuitĩ kanga yĩĩ lukaani naalĩ lutambulue nĩamalaĩka nalukamĩnkĩĩligue, nuutimu wensi nuuleki alĩ uligie ĩkĩnamulĩmo kya kulukuuluu,

³ aishie gua, kukitalama mbii kanga kulekikeela uugũnua naukulu kĩna uu? Naalĩ utambulue kumuandio nũShekulu, pembele naukamĩnkĩĩligua kumiĩtu kunzĩla ya aasio naalĩ iigilie;

⁴ uNzua nduyo nukuĩla kukilĩngasĩĩlio nĩmakula nuutendi wingĩ wa ngũlũ, nukuipeegua ya kĩMuau Muelu kĩna alĩ muloelue umuene.

⁵ Kuitĩ sika aluuĩĩkile nsĩlĩlĩ ya amalaĩka uunkũmbigyulu naũjile nakukuutambula,

⁶ ĩpa umuĩ ukuĩlĩĩle ĩpĩĩa itĩ; “Muntu yaani sunga umũjuke, Katia muana-muntu sunga umukendegeele?

⁷ Numutenda muniino kwityũngo niino kwikĩla ĩamalaĩka, numujiala ĩngala ya ukulu nikyulio, numuĩĩka kiania ya mĩlĩmo ya mĩkono yaako.

⁸ Waiĩĩka intu tũlũ nsĩlĩlĩ ya mĩgulu yaakue.” Kuitĩ muuĩĩki wa intu tũlũ nsĩlĩlĩ yaakue, sikusaagilie kakĩntu nasika kĩĩĩkue. Ĩpaino sika kwalaona iintu yensi kwiĩĩkua nsĩlĩlĩ yaakue,

⁹ ĩpa kwamuona ũYesu, uyo kwityũngo niino alĩ mutendue muniino kwikĩla ĩamalaĩka. Muene kunsooko ya ualaalĩki wa ukiu, wajialilue ĩngala ya ukulu nikyulio, koona kuukende wa kĩNzua waulũle uukiu kunsooko ya muntu wensi.

¹⁰ Kuitĩ alĩ yumũjĩpĩĩle uyo, nakunsooko yaakue nukunzĩla yaakue intu tũlũ naitũla, pĩna wileeta ĩaana iingĩ sunga kuukulu, kukumukamĩnkĩĩlia kuwaagi umutongeeli nwa ugũnua waao.

¹¹ Kuitĩ uyo nukuelagiaa nĩndĩo naeeligue tũlũ gaa apũnile kumuĩ. Kunsooko ĩĩ sikukukolaguaa kansoni kukuĩĩta anũna,

¹² nwiũga, “Nikitanantia ĩliina liako kuanũna aane, pakatĩ ya mulundo nĩkakukuĩmbĩla ulukũmo luako.”

¹³ Nĩkangĩ, “Nikitũla numusanilie umuene.” Nĩkangĩ, “Laaa, ĩne nkoolĩ palumuĩ nĩaana nanumupeegue nuNzua.”

¹⁴ Iio gua, kunsooko ĩaana akamantĩĩne nĩmiĩlĩ nĩtĩĩte umugali nĩnama, uyo nduyo iio-iioo alukamantanile iio-iioo, koona kunzĩla ya nkia wamoonoone uyo nutĩĩte usũũmi wa ukiu, ingĩ ũShetani,

¹⁵ waakomole ĩaasio tũlũ pĩna muntondo zensi za uumĩ waao kuooa wa ukiu alĩ ĩĩlĩ muwikyaalĩ wa usese.

¹⁶ Kuitĩ ingĩ tai, sikusolile iyuukĩ lya amalaĩka, ĩpa alusolile uwĩleli wa kĩIbũlahimu.

¹⁷ Luulo gua, alĩ yumũjĩpĩĩle kukĩpianĩkĩĩligua nĩanũna aakue mumpola tũlũ, watũle mupolia namukulu, mukola kĩnishungu kangĩ musuĩĩli muwĩtumi tũlũ pa kĩNzua, koona waĩpolelie ĩmĩlandu ya antu.

¹⁸ Nukunsooko umuene alĩ muagigue nukwigemua, usũũmile kukuaalĩĩlia ĩasio naakugemaguaa.