Aebulania 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usugulii wa utendi wa ntondo zensi

¹ uUloogua wa kĩnũna naulongoleke.

² Mulekiĩĩwa kukuasũgamĩĩlia ĩagenda, kuitĩ kunzĩla niasio ĩĩa alĩ aasũgamĩlĩĩlie ĩmalaĩka, ndĩo ĩeene sika naamanile.

³ Muijuke ĩaasio naakoolĩ mukĩtũngo zĩkĩna muatũngue palumuĩ nĩndĩo; nĩndĩo naakutendelaguaa naibĩĩ, kunsooko niniinie muĩlĩ muwikyaalĩ wa kĩmuĩlĩ.

⁴ uUtoole naukuligue nĩantu tũlũ, nĩngono nĩtũle nzelu, kuitĩ uNzua akakualamula ĩasambo nĩagololia.

⁵ Mulekitũla aawa mpiia; muendue muumo niintu namutĩĩte; kuitĩ uyo umuene uũgile, “Sika nĩkakukukeepeela kainiino, sunga sika nĩkakukuleka kainiino.”

⁶ Iio gua, kukugimagiaa kwiũga, “ũShekulu ingĩ Mualĩĩlia waane, sika nikioopooka uMuntu ukintenda yaani?”

Kukuagombia ĩatongeeli

⁷ Ijukĩkiĩ ĩatongeeli aani naalĩ akumuĩĩla ulukaani lwa kĩNzua, kangĩ mulaaĩkie ĩmpelo ya lugendo luao, mutiate uusuĩĩli waao.

⁸ ũYesu Kilisito ingĩ wayuuyuu igyulo nĩnantende, sunga ĩkalĩ nakalĩ.

⁹ Mulekikenkeeligua nuumanigua nawĩngĩ-wĩngĩ nawa kĩgenda. Kuitĩ iiza ĩnkolo ĩkamĩnkĩĩligue kuukende, sika kumiiko ya ndia, ĩaasio naalĩ aĩtiatile ĩniasio sika naaligia kansaĩlo.

¹⁰ Kutĩĩte upolelio pĩna ĩaasio naakĩtekelaa mwiHyeema agila kaugombigua kwilĩa ipyolia liakue.

¹¹ Kuitĩ ĩnama ya mapolia, nĩmĩgali yaao nyukupũnagiguaa paasio Pana yeelu numupolia namukulu kunsooko ya mĩlandu, ĩnama niasio yukusonsaguaa kunzi ya nkambĩ.

¹² Itĩ yoi ũYesu nduyo alĩ muagigue kunzi ya lyumulango lya kaa, koona waeelie ĩantu kumugali waakue umuene.

¹³ Iio gua, nakupũne kumuagaane kunzi ya nkambĩ ĩkukenkile umuna waakue.

¹⁴ Kuitĩ ĩpa kuagila kakaa nya kuĩma kalĩ, ĩpa kukumĩdũũma ĩniasio nijile.

¹⁵ Luulo gua, kunzĩla yaakue umuene nakumupeele uNzua ipyũnio lya lukũmo intondo tũlũ, ingĩ ĩnkali ya mĩlomo nyukukũmuulaa ĩliina liakue.

¹⁶ Ĩpa itĩ mulekiĩĩwa kwitenda naiiza nukwikamantana, kuitĩ ĩmapũnio kĩna aya makumuloeelagiaa uNzua.

¹⁷ Agombiĩ ĩatongeeli aani nukukĩniinupia; kuitĩ ĩo ikyalile nuukenge kunsooko ya nkolo zaani, zĩ antu naikipũnia iyalo; alĩpũnie kuulumbi sika kuwĩsũsũmi, kuitĩ iio sika mukishaĩpigua kakĩntu.

Nkaani za wĩlagi

¹⁸ Kulompeelĩ ishie, kuitĩ kumanile ya kĩna kutĩĩte moo namuuza, nukwishiia kutũle nulugendo naluuza mumpola tũlũ.

¹⁹ Numupeepilie nangũlũ mutende yaasio koona nshookigue kumiani kuukaaũ.

²⁰ Ĩpa itĩ uNzua wa matiliga naalumupũnilie kwipũna muakiu uMudĩĩmi namukulu nwa nkolo, Shekulu wĩĩtu Yesu, kungũlũ ya mugali wilyago lya kalĩ nakalĩ,

²¹ wamusũũmĩkie muutendi wensi nauuza koona mutende uulooa waakue, nduyo wĩtume munsĩ yaani nalukuloeelagiaa ntongela yaakue kunzĩla ya kĩYesu Kilisito; kumuakue nawĩĩ ukulu ĩkalĩ nakalĩ. Amini.

²² Ĩpa itĩ numupeepilie anũna aane, tegeelĩ gua ulukaani luane lwa usugulua, kuitĩ namuandĩkĩla kunkaani nkeei.

²³ Mumane ya kĩna umunũna wĩĩtu Timoteo watũnguĩlaguaa. Uyo na waaza kuukaaũ, kukakĩona niniinie palumuĩ ninduyo.

²⁴ Alamukiĩ ĩatongeeli aani tũlũ nĩeelu tũlũ. Ĩo naa kuItalia akumulamukia.

²⁵ uUkende wĩĩ niniinie tũlũ.