Aebulania 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu mpiani nkulu ya usuĩĩli

¹ Luulo gua, nindiishie gaa kunsooko kuapilimĩkĩĩligue nilyũnde kyulu lya akuĩli nalyĩkĩna itĩ, nakuujiule umuligo wensi numulandu naukukũtyapikagiaa, nakumankĩkie kuukamatĩkũ muwĩtiganĩĩli waasio nauĩĩkue ntongela yĩĩtu,

² ĩkumulaaĩlĩĩle ũYesu. mukola kuandĩĩlia, numukola kukamĩnkĩĩlia uusuĩĩli wĩĩtu. uMuene kunsooko ya ulumbi naalĩ uĩĩkue ntongela yaakue aluugigimĩĩlie umusalaba nukũshiitikolua inshoni, wikyalansile pa mukono wa kĩgoosia pityengu lya kĩtemi lya kĩnzua.

³ Kuitĩ mumusĩĩgĩkie uyo naalugigimĩĩlie inkungumi kĩna izi nazipũnile kuanamĩlandu kumuakue, koona mulekikatala, ĩmwineketa munkolo zaani.

Nsooko ya ulangua

⁴ Sika mwalakakĩsinka sunga kwiiita umugali, ĩmukĩsinka numulandu.

⁵ Kangĩ muĩaguaa nkankanaa, uulangua naukĩtambuĩlaa niniinie zĩ aana, “Muanuane, uleke kuumela uulangua wa kĩShekulu, kangĩ ulekineketa munkolo pĩna witakĩlua ninduyo.

⁶ Kuitĩ ũShekulu ukumulangaa uzo numuloilue, Nukukumukua umuana wensi nukumugombagiaa.”

⁷ Mwigigimĩlia kunsooko ya ulangua. uNzua ukumutendelaa zĩ aana; kuitĩ muana kĩ nasikukulangaguaa nũshee?

⁸ Kanga ĩmuagila uulangua nawityũmpĩ lya ensi, paapo mwatũla aana a kĩsimbĩ inie, sika mwĩaana a tai.

⁹ Kangĩ alĩ kutĩĩte ĩatata a kĩmuĩlĩ alĩ akukulangaa, sunga nakuakulia. Sika taazu nangũlũne kukĩniinupia pa kĩTata wa nkolo zĩĩtu nukwitũla apanga?

¹⁰ Ĩaasio gua alĩ akukulangaa kuntondo nkeei, kĩna alĩ aoonie iiza ĩeene akola, ĩpa uzo ukukulangaa kunsaĩlo yĩĩtu, koona kukamantane muweelu waakue.

¹¹ uUlangua wensi pityũngo liakue sika ukigyelelaa kwitũla wa ulumbi, ĩpa wa usungu; pembele gua ukualeetelaa ĩaasio naalĩ ijiĩĩligue nduo, nkali ya kulukuuluu nkola matiliga.

¹² Luulo gua, nansulĩ ĩmĩkono naalĩ yaneketile; nĩmalũũ namakiile igyandi mumakamie,

¹³ muzĩpĩlĩe ĩmĩgulu yaaani injĩla nangolokũ, koona ĩkĩntu nakialĩĩ kĩlema kĩlekilimĩlĩgua, ĩpa itĩ taazu kĩkamigue.

Usuguli nuulangi

¹⁴ Dũũmĩkiĩ muĩ nĩmatiliga kuantu tũlũ, nuweelu muntu kanga wasiititũla nduo sikukakumuona ũShekulu.

¹⁵ Mwĩlaaĩkie sunga kaumuĩ walekiulia uukende wa kĩNzua; itina lya usungu lĩleke kigyelela nukukumuagia, nukunzĩla ĩĩ antu iingĩ adobigue munkolo.

¹⁶ Sunga umuĩ walekitũla musambo katia nasikukumukulagiaa uNzua zĩ uEsau, naalugulilie uusaali wa ulelua wa muandio kuludia lumuĩ.

¹⁷ Kuitĩ mumanile ya kĩna pĩna alusiiile pembele kwishaala uukembetua nusiitĩligua; kuitĩ sika nuona kalioma lya kupela, kanga, ĩalĩ ulĩduumikilie kumisholi nakĩĩ.

Ukulĩ wa Sayuni nya muna nsĩĩ nĩSayunni nya kukiania

¹⁸ Kuitĩ sika alĩ mumĩpikĩlĩĩle ĩnkonko nĩsũũmile kwiambua, naalĩ yaakĩĩle umooto nuwiilu nikiiti, numuzũgo wa nzega,

¹⁹ numulĩlo widyede, nululi lwa nkaani ĩasiio naalĩ alũigilie naapeepia alekiĩĩlua kalukaani naluĩngi.

²⁰ Kuitĩ sika alĩ asũũmile kwigigimĩlia ulukaani naalĩ lulagĩĩligue, ingĩ ntulu; Sunga ĩnimu kanga yĩmĩpaatie ĩnkonko niasio ikitũlangua magũe.

²¹ Nĩzaasio naalĩ zigyelĩĩle alĩ za koopookia, sunga uMusa nuũga, “Ningĩĩlua nuooa nukwikĩkĩma.”

²² Ĩpa mwamĩpikĩlĩĩle ĩnkoko ya Sayuni nukukaa ya kĩNzua namupanga, Yelusalemũ nya kwigyulu, nukumaũmbĩ ma amalaĩka magana ma nzogũ mingĩ,

²³ nukumulundo wa alelua a muandio naandĩkue kwigyulu nukwa kĩNzua, mulamuli wa tũlũ ensi, nukunkolo za antu a kulukuuluu naatũlile akamĩnkĩĩlũ,

²⁴ sunga kwa kĩYesu umukamantani wilyago nĩpia, nukumugali wa kuminzangĩla naukutambulaa naiiza kwikĩla uwaasio wa kĩAbeli.

²⁵ Mwĩkendegeele muleke kumusiita uzo nukutambulaa. Kuitĩ iaasio naalĩ amusiitile uyo naalĩ waasuguĩle muna nsĩĩ, sika naasũũma kwitalama, nangũlũ gua ishie sika kukishũũma kwitalama kanga kumusiite uyo nukukusugulaa kwipũna kwigyulu.

²⁶ uLuli luakue alĩ lusũngũsilie ĩnsĩĩ ĩkalĩ, ĩpaino waĩĩkile lyago, wiũga, “Ĩne nikishũngũsia kangĩ kamuĩ sika ĩnsĩĩ dũũ, ĩpa nigyulu gaa.”

²⁷ uLukaani luasio gua, Nkua kamuĩ kangĩ, lwigyelelia ya kĩna naikishũngũsigua ileegigue zĩ intu naalĩ iumbue, koona iintu nasika ishũũmile kwishũngũsigua yĩĩme iio-iioo.

²⁸ Luulo gua, kuitĩ kukuwaanũnkulaa uutemi nasika usũũmile kwishũngũsigua, nakutũle nĩmasongelio, kangĩ kumupũnilie uNzua wĩtekeli wa kumuloeelia, palumuĩ nikyulio nuooa.

²⁹ Kuitĩ uNzua wĩĩtu ingĩ mooto naukũlĩĩkagiaa.