Aebulania 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Akulu a usuĩĩli

¹ uUsuĩĩli gua, ingĩ kwitũla nuukamĩnkĩĩlũ wa mpola nakuzilaaĩlĩĩle; ingĩ kwimana kutai impola nasika zigyelĩĩle.

² Kuitĩ kunzĩla ĩĩ ĩanakalĩ ĩĩtu alĩ akuĩlue.

³ Kusuĩĩli kwalĩnga ya kĩna uunkũmbigyulu alĩ utũndue kuLukaani lwa kiNzua, sunga iintu naigyelĩĩle alĩ ijĩpigue kuintu nasika igyelĩĩle.

⁴ Kuusuĩĩlĩ uAbeli alumupũnĩĩlie uNzua ipyolia naliiza kwikĩla ĩlya kĩKaini; kunzĩla ĩĩ nukuĩlua kĩna munakulukuuluu; uNzua nuikuĩla iipeelo yaakue nukukuĩgomba ninduyo angaa wakiile noo, ĩpa kunzĩla ya uusuĩĩli waakue kilĩ witambula.

⁵ Kuusuĩĩli uEnoki alĩ musaamigue walekiona ĩnkia sunga sika nwigyelela kunsooko uNzua alumusaamilie. Kuitĩ pĩna alũkĩĩlĩ kalasaamigua, alĩ mukuĩlue kĩna umuloelĩĩlie uNzua.

⁶ Ĩpa pĩna kutilĩ kausuĩĩli sika ishũũmĩkile kukumuloeelia. Kuitĩ wensi nukumusũgamĩlaa uNzua yumũjĩpĩĩle wasuĩĩle ya kĩna ukoolĩ, kangĩ ya kĩna ukuapeelaa uupeegua nauuza ĩaasio naakumudũũmaa.

⁷ Kuusuĩĩli uNoe, pĩna nusugulua nuNzua mumpola nasika alĩ zalakakigyelela, numugombia uNzua, nuzĩpia ipyango kuugũnua wa numba yaakue. Kunzĩla ĩĩ nuulamula uunkũmbigyulu kĩna utimuĩle, nutũla musaali wa kulukuuluu nikigyelelaa kuusuĩĩli.

⁸ Kuusuĩĩli uIbũlahimu pĩna alĩ muĩtue nugomba, nupũna nulongola kuluandĩ, kuasio kĩna ũjililigia wĩĩ usaali. Nupũna sika numanile nĩkĩna ulunziĩ.

⁹ Kuusuĩĩli alĩ wikyalile munsĩĩ ilyago, zĩ munsĩĩ ya ugenda, nukikyala mwihyeema palumuũ nuIsaki nuYakobo, asaali palumuĩ nduyo ilyago lĩlo-lĩĩloo.

¹⁰ Kuitĩ alumĩlaaĩlĩĩle ĩkaa nya mĩkũlĩla, ĩĩo umukola kumĩsĩĩga nukukumĩzenga ingĩ uNzua.

¹¹ Kuusuĩĩli uSala umuene alĩ wanũnkuile usũũmi wa kutũla niimbi pĩna alĩ wakĩlile ĩmatũngo maakue, kunsooko alumuoonie uzu naalupũnilie ilyago kĩna wa usuĩĩli.

¹² Luulo gua, naalelua numuntu umuĩ, kangĩ nduyo zĩ mukiu, antu iingĩ zĩ inshonda za kwigyulu uwingĩ waao, naĩĩ zĩ mĩnsanga ya pikiki lya nanza nasika ĩsũũmile kwialĩgua.

¹³ ĩAasio tũlũ naakia muusuĩĩli, sika naaanũnkula ĩmalago, ĩpanaamaona kwipũna kulĩ nukukumalumbĩĩlĩkia, naikũmuula kĩna alĩ agenda kangĩ ana, mĩsĩnzo muna nsĩĩ.

¹⁴ Kuitĩ naakutambulaa itĩ akulagĩĩlaa kualie kĩna akumĩdũũmaa ĩnsĩĩ ĩniao.

¹⁵ Kanga ĩalĩĩ ijukile ĩnsĩĩ niasio kĩna alĩ apũnile, alĩ ijililigia ĩlioma kukumĩshookela.

¹⁶ Ĩpaino atĩĩte nsula kwienda kunsĩĩ nanziiza kwikĩlĩkĩĩla, ĩyo nya kwigyulu. Luulo gua, uNzua sika nuona kansoni kwiĩĩtua Nzua waao; kuitĩ waazĩpĩlĩĩlie ĩkaa.

¹⁷ Kuusuĩĩli uIbũlahimu pĩna alĩ mugemue numupũnia uIsaki watũle pyolia; ninduyo naalumaanũnkuĩle ĩmalago, alumupũnilie polia umuana waakue nwig'ene,

¹⁸ Uyo uuyoo naalĩ muĩĩlue, “Mwa kĩĨsakĩ uwĩleli waako uukiĩĩtua.”

¹⁹ Nwishĩĩga kĩna uNzua usũũmile kukumũiukia sunga kwipũna muukiu; kwipũna kuasio numuligia zĩ kumpiani.

²⁰ Kuusuĩĩli uIsaki numukembeta uYakobo nuEsau mumpola nazijile kigyelela.

²¹ Kuusiĩĩli uYakobo, pĩna alĩ wikia numukembeta muana wensi muaana a kĩYosepũ nwĩtekela nusegamĩĩle mukĩsukulĩ kya nkome yaakue.

²² Kuusuĩĩli uYosepu pĩna alĩ wipigamĩĩla ĩmpelo ya uumĩ waakue, nutambula impola za kulega kumiao ĩaana a Ĩsilaeli, nulagĩĩlia mumpola za makũpa maakue.

²³ Kuusuĩĩli uMusa pĩna nulelua nupisua mieli ĩtatu nĩaleli aakue, kunsooko alĩ aoonie kĩna muana muuza, sunga sika naoopooka ilyagĩĩlio lya mutemi.

²⁴ Kuusuĩĩli uMusa pĩna nukula, nusiita kwiĩĩtua muana wa kĩna Palao;

²⁵ musaagula kĩna taazu kwiaagigua palumuĩ nĩantu a kĩNzua kwikĩla kukĩloeelia mumĩlandu kuntondo nkeei udũũ.

²⁶ Nusĩĩga kĩna kwitukĩlua kunsooko ya kĩKilisito ingĩ ugolĩ ukulu kwikĩla imbĩĩka za Mĩsili, kuitĩ nalaaĩkia uupeegua wa pembele.

²⁷ Kuusuĩĩli nulega kuMĩsili, sika noopooka uutaki wa mutemi, kuitĩ alugigimĩlĩĩlie zĩ umuoonie uzo nasika ukigyelaa.

²⁸ Kuusuĩĩli nuzĩpĩa ĩPasaka, numinzangĩla ĩmĩgali, koona umukola kuoonoona iityangi waleke kuapatia ĩo.

²⁹ Kuusuĩĩli naakĩlĩla pakatĩ ya Nanza nankasũkũ zĩ akĩlĩĩle munsĩĩ nanumu, ĩpa ĩAmĩsili pĩna alĩ agemile yaasio naakapĩligua.

³⁰ Kuusuĩĩli ĩmagelele miYeliko namagua, pĩna namapilimĩkĩĩligua ntondo mupũngatĩ.

³¹ Kuusuĩĩli uLahabũ naalĩ mugololia sika nuulagua palumuĩ nĩaasio naalĩaleki kunsooko alĩ waasũgamĩlĩĩlie ĩapeleeli kumatiliga.

³² Sunga ntambule yaani kangĩ? Kuitĩ matũngo sika mienda muumo kwiganula impola za kĩGideoni, nuBalaki, nuSamsoni, nu Yepũta, nuDaudi, nuSamueli, nĩza anakĩdagu.

³³ Kunzĩla ya usuĩĩli alĩ adulile uutemi, alĩ atendile ĩkulukuuluu, alĩ aligilie ĩmalago, alĩ amũmilie ĩmĩlomo ya nsimba,

³⁴ alĩ azidibilie ingũlũ za mooto, alĩ agũnĩkile muuugĩ wa maũmba. Alĩ asũũmigue pĩna alĩ aneketũ, alĩ akamatĩkũ muulugu, alĩ amaĩngile ĩmaũmbĩ ma ulugu ĩma agenda

³⁵ ĩAsungu alĩ aaanũnkuĩle ĩakiu ao kunzĩla ya wiiuki. Ĩpa itĩ ĩĩĩa alĩ akuue sunga kwikia alĩ asiitile kwikomolua koona aligie uwiiuki nauuza.

³⁶ ĩĨĩa alĩ agemue naapopotua nukwikuangua sunga kwitũngua nĩmatendele nukwigumĩlua mukĩtũngo.

³⁷ Alĩ atũlangue magũe, alĩ adumulue kumĩsũmeno, alĩ agemue alĩ aulague, kumaũmba; alĩ iungua-ungua naĩkĩtũnga ĩmĩkunza ya nkolo nĩnya mbuli, alĩ asililue, alĩ aagigue alĩ atendelue namabĩĩ.

³⁸ uUnkũmbigyulu sika alĩ wijĩpĩĩle ĩantu ĩo. Alĩ iungua-ungua mumbuga numunkonko numumalũlũ numuĩgaa.

³⁹ Ĩaasio tũlũ ensi kanga alĩĩ akuĩlue noo kunzĩla ya usuĩĩli waao, sika alĩ aanũnkuĩle ilyago;

⁴⁰ kuitĩ uNzua alĩ watongelĩĩle kukukuĩĩkĩlia ishie ulukaani naluuza nangũlũ, koona pĩna kukutilĩ ishie, ĩaasio alekitũla akamĩnkĩĩlu.