Aebulania 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

iPyolia lya kĩYesu kyulu, kangĩ liĩmile palioma lya mapolia ma kĩMusa

¹ Kuitĩ uUlagĩĩlio utĩĩte mulũle udũũ wa uuza nawijile, sika kikyelu liene lya uuza waasio, iio gua, sika usũũmile kumapolia ayo naakumapũnagiaa intondo tũlũ muaka kumuaka, kukuakamĩnkĩĩlia ĩaasio naakusũgamĩĩlaa.

² Malĩĩ iio, sika aza ijililekane kwipũnia ĩmapolia? Kanga naakĩtekela ĩalĩĩ eeligue nkua ĩmuĩ, sika aza ijile kĩona kangĩ kĩna atĩĩte mĩlandu.

³ Paluandĩ luua kĩkoolĩ kijukĩ-zukĩ kya mĩlandu muaka kumuaka.

⁴ Kuitĩ sika ishũũmĩkile ĩmĩgali ya ng'ombe nimbuli ĩleegie ĩmĩlandu.

⁵ Luulo gua, uKilisito pĩna wijile muna unkũmbigyulu, uũgile, “ĩMapolia nĩmapũnio sika nusiia, Ĩpa umuĩlĩ aluuzĩpĩlĩĩlie;

⁶ ĩMapolia ma kusonsa nĩmapolia ma mĩlandu sika nuloeeligua ndayo.

⁷ Paapo nambũga, Laaa, naazile nuutende uulooa waako, Nzua; Kĩna numuandĩkĩlue mumbũgũlũ ya kalĩ.”

⁸ Pĩna aluũgile kumuandio, “Sika alumasiiile sunga sika alumuloeeligue nĩmapolia nĩmapũnio,” katia ĩmapolia ma kusonsua nĩmapolia ma mĩlandu namapũnigue kĩna alĩ ilagĩĩligue muUlagĩĩlio,

⁹ paapo aluũgile, “Naazile nuutende uulooa waako.” Waleegia ulwa muandio koona walukamĩnkĩĩlie ulwa kabĩlĩ.

¹⁰ Kuulooa uu alĩ kwĩeeligue kunzĩla ya upũnigua wa muĩlĩ wa kĩYesu Kilisito nkua ĩmuĩ dũũ.

¹¹ Numupolia wensi ukuĩmĩkaa lutondo kulutondo nukĩtuma uwĩtekeli, nwipũnia ĩmapolia mayo-mayoo nkua ningĩ; ndayo sika masũũmile kwileegia ĩmĩlandu.

¹² Ĩpa uKilisito pĩna alupũnilie kunsooko ya mĩlandu ipyolia kamuĩ nalĩkoolĩ ĩkalĩ nakalĩ, paapo nwikyalansa pamukono wa kĩgoosia wa kĩNzua.

¹³ Kwipũna paapo ukulindĩlaa dũũ, sunga ĩalugu aakue aĩĩkue nsĩlĩlĩ ya mĩgulu yaakue.

¹⁴ Kuitĩ kwipyolia lĩmuĩ alĩ waakamĩnkĩlĩĩlie sunga kalĩ nakalĩ ĩaasio naalĩ eeligue.

¹⁵ NuMuau Muelu nduyo wakukuĩlaa, kuitĩ pĩna wakondia kwiũga,

¹⁶ “Ĩlĩ lyolĩ lyago nanĩkakuaĩĩkĩlia Pĩna zakĩla intondo zaasio, uũgile ũShekulu. Nikiĩĩkĩla ĩmalagĩĩlio maane munkolo zaao, Numwishala liao nĩkakumandĩka; papo watambula izi,

¹⁷ ĩMĩlandu yaao nuuleki waao sika nĩkakuijuka kangĩ nĩnainiino.

¹⁸ Ĩpa gua uleegeligua wa aya pĩna wĩĩlĩ, kutilĩ kipyolia kangĩ mumpola za mulandu.”

Upumbulia nuusuguli

¹⁹ Luulo gua anũna aane, kunsooko kutĩĩte ukamatĩkũ wa kuingĩla Pana yeelu kunzĩla ya mugali wa kĩYesu,

²⁰ kunzĩla niasio naalukuandĩĩlie, nampia, nampanga, naalumigyuile kwikĩlĩla mwipyupa, ingĩ umuĩlĩ waakue,

²¹ kangĩ kunsooko kutĩĩte umupolia namukulu mumpola za numba ya kĩNzua;

²² kusũgamĩĩle nĩnkolo ya tai kuukamĩnkĩĩlũ wa usuĩĩli; ikuaminzangĩlue inkolo zĩĩtu kuleke umoo namubĩĩ, koogigue ĩmiĩlĩ kumaazĩ nameelu.

²³ Kuambĩĩlĩkie uukũmuuli wa ulaaĩĩli wĩĩtu, ulekipĩluka; kuitĩ uyo naalulagile ingĩ wa usuĩĩli.

²⁴ Kwĩkendegele ndiishie kundiishie nukukĩsuagĩĩlia kungũlũ muwĩloogua nuutendi nauuza.

²⁵ Kulekileka kukĩlundĩĩla palumuĩ, kĩna ĩntendo ya naĩngĩ, ipa kwĩkamie nkolo ndiishie kundiishie, naikulu nangũlũ pĩna muoonie uLutondo luasio lwasũgamĩĩla.

²⁶ Kuitĩ kanga kwĩkakie kutenda imĩlandu pĩna kwakondile kwiaanũnkula uulĩngi wa tai, lyukutilĩ kipyolia nalĩsaagile kangĩ kunsooko ya mĩlandu,

²⁷ Ĩpa kwitũngĩla uulamulua nautĩĩte uoopokia, nuupiu wa mooto naũjile kualĩa naakupĩnga-pĩngaa.

²⁸ Wensi nukutimulĩlaa uUlagilũa wa kĩMusa ukukiaa kutilĩ kakĩsuusu, kulukani lwa akuilĩ abĩlĩ katia atatu.

²⁹ Mwaona mbii gua, sika yumũjĩpĩĩlene uukaasigua naukulu nangũlũ unuasio naalĩ umutilatile uMuana wa kĩNzua, nukukuusĩĩgĩla umugali wilyago naalĩ mueligue ninduyo, kĩna ingĩ sika kĩntu, nukukumumela uMuau wa ukende?

³⁰ Kuitĩ kumumanile uyo naaluũgile, “uUkaasia ingĩ mulĩmo waane;” nikilĩpa ĩne uneene. Nĩkangĩ, “ũShekulu ukakualamula ĩantu aakue.”

³¹ Ingĩ lukaani lwa koopookia kwiguĩla mumĩkono ya kĩNzua namupanga.

Usuguli kukikyala muukamatĩkũ

³² Ĩpa itĩ zijukĩkiĩ intondo za muandio pĩna namukoonda kwipeegua uweelu munkolo, namugigimĩlia uwĩsinki naukulu wa kuagigua;

³³ intondo nzia namuĩĩkua kualiĩ pautukĩlua nimpatĩ, intondo nzia namukamantana nĩaasio naalĩ atendelue yaasio.

³⁴ Kuitĩ alĩ muakolĩĩlue kĩsuusu ĩaasio naalĩ ĩĩlĩ mukitũngo, namugomba kuulumbi kwileegeligua inshao zaani, kunsooko alĩ mumanile kĩna alĩ mutĩĩte ĩnsao nanziiza nangũlũ nikikyalaa.

³⁵ Luulo, gua muleke kuutaaga ukamatĩkũ waani, kuitĩ utĩĩte upeegua ukulu.

³⁶ Kuitĩ ĩmũjĩpĩĩle muĩ nuugigimĩlia, koona pĩna mwatenda uulooa wa kĩNzua, muanũnkule naalĩ mualagĩlue.

³⁷ Kuitĩ kĩlĩ katũngo kaniino udũũ, Uyo nwijile ukiiza, sika ukitinia.

³⁸ Ĩpa umunakulukuuluu waane ukitũla muumĩ kuusuĩĩli, Kanga washooke kĩnsengelũma, ĩnkolo yaane sika iloeeligua nduyo.

³⁹ Ĩpa ishie kukutilĩ mumiao naakushookaa kĩnsengeluma nukwilimĩĩla, ĩpa kukoolĩ pakatĩ yaao naatĩĩte uusuĩĩli nukwikendegeela inkolo zaao.