2 Akolinto 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Sika nukumuandĩkĩla inie mumpola za nsangĩ kunsooko ya eelu,

² kuitĩ manile uulĩganĩĩlia waani, nineene nĩkĩkũmazukia kunsooko yaani kuAmakedonia, kĩna ĩAkaya ĩlĩganĩlĩĩlie kwipũna muakaazu, uukamatĩkũ waani wa kamatĩkĩlie iingĩ mumiao.

³ Ĩpa alĩ nĩatumile ĩanũna, koona kukĩkũmazukia kumiĩtu kunsooko yaani ilekitũla nakanda mulukaani ulu, ĩpa mwigyelele ya kĩna mwĩlĩganĩlĩĩlie kĩna alĩ ntambuĩle.

⁴ Kuitĩ ĩAmakedonia kaanga aaze palumuĩ nineene, amuone inie kĩna sika mwĩlĩganĩlĩĩlie, kukikolua inshoni (inie niniiniene gua) kunsooko ya usanio waasio.

⁵ Kuluulo, alĩ moonie taazu kukuakamatĩkĩla ĩanũna atongele kwipika kunsiani, andie kwishangulia iipeegua ya masongelio maani naalĩ mupũnilie ilyago ĩkalĩ, malĩganĩlĩĩligue kwishanguligua, koona matũle masongelio ma ulooa, malekitũla mapũnigue kukĩaya.

Muna ijĩpĩĩle kwipũnia ĩnsangĩ

⁶ Ĩpa ulukaani ntuulu, “uMukola kupandĩla nkeei ukugolaa nkeeĩ, numukola kupandĩla kuukende ukuogolaa uukende.”

⁷ Wensi wapũnie kĩna usĩĩgile munkolo yaakue, sika kuusungu katia kwioonatĩĩligua; kuitĩ uNzua ukumuloogaguaa umukola kupũnia kuulumbi.

⁸ NuNzua usũũmile kukumũjulia uukende tũlũ kuwingĩ, koona niniinie muĩ niintu tũlũ nayendile muumo intondo tũlũ, sunga kukumũjulia inie kuutendi nauuza tũlũ,

⁹ kĩna yandĩkue, “Ukupũnagiaa ukende; ukuoomoelaa ĩatũka. ĩKulukuuluu yaakue ikyalilee ĩkalĩ nakalĩ.”

¹⁰ Uyo gua nukumupeelaa umupandĩli imbeu nuugalĩ wa kulĩa, uuyo ukakumupeela imbeu zaani nukukuzongeelia, nduyo ukakĩmongeelia ĩmaogola ma kulukuuluu yaani.

¹¹ Munzĩla tũlũ mukigolĩpigua, koona mupũnie kuukende wingĩ naukumuleetelaa uNzua ĩmasongelio kumulĩmo wĩĩtu

¹² Kuitĩ uwĩtumi wa mulĩmo uu sika ukuapũnĩlagiaa uusilĩlua wa eelu dũũ, ĩpa sunga kwiongeelia ĩmasongelio mingĩ kwa kĩNzua.

¹³ Muugemua wa wĩtumi waasio mukakumukulia uNzua kunzĩla ya wĩniinupia waani, pĩna mwigomba iMpola na Nziiza za kĩKilisito, nukunsooko ya ukende wa ukamantani waani kumiao nukuantu tũlũ;

¹⁴ Pĩna atĩĩte nsula kunsiani nukukumulompeela inie kunsooko ya ukende wa kĩNzua naukĩlĩkĩlĩĩle mumiani.

¹⁵ Kumusongelie uNzua gua, kunsooko ya upeegua waakue nasika usũũmĩkile kwiganulua!