2 Akolinto 8 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nsangĩ kuatũka iYelusalemũ

¹ Kwamupeela inie anũna ĩĩtu, impola za ukende naalĩ mapeegue ĩmakanisa ma kuMakedonia.

² Kuitĩ pĩna naaigemua ninjago ningĩ, uwijuli wa ulumbi waao, nuutũka waao nawongelelia uugolĩ wa ukende waao.

³ Kuitĩ nĩakuĩlĩĩle kĩna kwilika lya usũũmi waao nukwikĩlĩkĩĩla uusũũmi waao, kuulooa waao, ĩeene naapũnia inshao zaao.

⁴ Naakupeepia dũũ ishie nukukukulompa akamantane mukende uu kukuatumĩla ĩeelu.

⁵ Nĩkangĩ sika alĩ apũnilie kĩna alĩ kulaaĩlĩĩle udũũ, ĩpa umuandio alĩ ĩpũnilie ĩeene kwa kĩShekulu nukumuĩtu gaa kuulooa wa kĩNzua.

⁶ Kuluulo, nakumukamatĩkĩla ũTito waukondeelie uukende waasio sunga kunsiani kĩna umuene aluandilie.

⁷ Ĩpa gua, kĩna mukĩlĩkĩlĩĩle munkaani tũlũ-muusuĩĩli, numuutambuli, numuumania, numuukamatĩkũ, sunga muuloogua waani kumuĩtu ishie, mwĩkakie kwikĩlĩkĩĩla numuukende uu gaa.

Mpiani ya kĩYesu

⁸ Sika mbũgile itĩ kukumulagĩĩlia ĩpa kunsooko ya ukamatĩkũ wa naĩngĩ, ngeme uuloogua waani kĩna ingĩ wa tai.

⁹ Kuitĩ mwalĩngile uukende wa kĩShekulu wĩĩtu Yesu Kilisito kanga ĩalĩĩ mugolĩ nakĩĩ, nutũla mutũka kunsooko yaani, koona mugolĩpigue kuutũka waakue.

¹⁰ Nineene mulukaani ulu nipũnia uulangi waane, taazu mumalĩĩlie naalĩ muandilie muakaazu; sika kwitenda udũũ, ĩpa sunga kwigomba.

¹¹ ĩpaino mumalĩĩlie kukĩtuma kuukaaũ, kĩna iio naalĩ mwĩlĩganĩlĩĩlie nukwigomba, mumalĩĩlie kwilika lya nsao zaani.

¹² Kuitĩ malĩĩ ukoolĩ uulooa, ukugombagiguaa kwilika lya nsao zaakue umuntu, sika kwilika lya usilĩlua waakue.

¹³ Sika kĩna naĩngĩ aligie uusũũpio niniinie muagigue, ĩpa tũlũ yĩĩ ilika lĩmuĩ.

¹⁴ uUligia waani wingĩ wa nzuauu ukeepie uuulia waao, nĩkangĩ uuligia waao wingĩ wĩĩ kumiani pĩna mwijilishilĩlua; iio ikilĩganĩĩla.

¹⁵ Kĩna yandĩkue, “Naalusolelĩĩle ningĩ sika nongeeligua, sunga naalusolelĩĩle nkeei sika nukeepeelua.”

Utumua wa kĩTito nĩnaĩngĩ

¹⁶ Ĩpa uNzua wasongeligue nukumupela ũTito wĩkakia iio-iioo munkolo yaakue kunsooko yaani.

¹⁷ Kuitĩ pĩna nakumukamatĩkĩla, nugomba sunga nwĩkamatĩkia dũũ kwiiiza kunsiani kuulooa waakue umuene.

¹⁸ Nakumutuma palumuĩ ninduyo umuunũna nuasio naalĩ mukũmazukigue mumakanisa tũlũ muMpola na Nziiza;

¹⁹ ĩpa sika alĩ iio dũũ, ĩpa nusaaguulua nĩmakanisa tũlũ watũle mutiati wĩĩtu mumulĩmo wa ukende uu nakukuutumĩkĩla ishie kuukulu wa kĩShekulu, kangĩ wigyelele uwĩlĩganĩĩlia wĩĩtu.

²⁰ iYaasio kwĩgidĩlĩle, wensi waleke kukusokia kunsooko ya nsangĩ ĩĩ naningĩ nakukumĩtumĩla ishie,

²¹ nakusĩĩgile naza kulukuuluu sika ntongela ya kĩShekulu udũũ, ĩpa nukuntongela ya antu gaa.

²² Palumuĩ nĩndĩo nakumutuma umunũna wĩĩtu naalĩ kumuoonie nkua ningĩ mumpola ningĩ kĩna utĩĩte wĩkakia. Ĩpaino wĩkamatĩkilie nangũlũ kunsooko ya usanio naukulu nutĩĩte kunsiani.

²³ Mumpola za kĩTito muene mĩaane, kangĩ munamulĩmo palumuĩ nineene kunsooko yaani; numumpola za anũna ĩĩtu, ingĩ atumua a makanisa, nuukulu wa kĩKilisito.

²⁴ Iio gua mulagĩĩle ntongela ya makanisa ĩkulukuuluu ya uloogua waani niya kĩkũmazukĩlia kumiĩtu kunsooko yaani.