2 Akolinto 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kukumigyelelia ĩtai, nukukĩkũnukula kumuakue uPaulo

¹ Iio kunsooko kuapeegue uwĩtumi uu kĩna kuakolelue kĩnishungu, sika kwitia kansula.

² Ĩpa kuzishiitile impola za kĩmpĩsĩmpĩsĩ naza nsoni; sika kukugendelaa muwĩsukukia katia sika kusaalĩnkĩĩnie ukulaani lwa kĩNzua nuulongo, ĩpa kuwigyelelio wa tai, kukĩpũnĩlia kualiĩ kumioo ya antu tũlũ ntongela ya kĩNzua.

³ Impola na Nziiza nakutanantilie malĩĩ zikũnĩkĩlua, zikũnĩkĩlua kumuao nailimila.

⁴ Ingĩ mumuao unzua wa unkũmbigyulu uu naalupokũilie ĩmasĩĩgo maao nasika asuĩlĩĩle, alekimĩlĩkĩlua nuweelu wa Mpola na Nziiza za ukulu wa kĩKilisito nampiani ya kĩNzua.

⁵ Kuitĩ sika kwĩtanantilie ishie undiishie, ĩpa uKilisito Yesu kĩna ingĩ Shekulu, nindiishie kuĩtumi aani kunsooko ya kĩYesu.

⁶ Kuitĩ uNzua naaluũgile, “Weelu naweelie mukiiti; muene alĩ weelilie munkolo zĩĩtu wakupeele uweelu wa ulĩngi wa ukulu wa kĩNzua muusiu wa kĩYesu.”

Uneketũ wa mutumua ningũlũ za kĩNzua

⁷ Ĩpa kutĩĩte ĩkĩuto ĩkĩ mũisheme ya ulongo, koona ingũlũ nazikĩlĩkĩlĩĩle zitũle za kĩNzua, zilekitũla zipũnile kunsĩĩtu ishie.

⁸ Tũlũ pensi kwialaaligua, ĩpa sika kualemeeligue; Kwiona nkankani, ĩpa sika kwitia kansula;

⁹ Kwiĩngua, ĩpasika kualekue kwingene; kwiguusigua pansĩ, ĩpa sika kwiulagua.

¹⁰ Intondo tũlũ kwikenka kwikia kumuakue ũYesu mumuĩlĩ wĩĩtu, koona uupanga wa kĩYesu wigyelele gaa mumuĩlĩ wĩĩtu.

¹¹ Kuitĩ ishie nakwĩuumĩ kukupũnagiguaa intondo tũlũ kukie kunsooko ya kĩYesu, koona uupanga wa kĩYesu wigyelele mumiĩlĩ yĩĩtu nĩtĩĩte ukiu.

¹² Paapo gua, ĩnkia yukuligagiaa ngũlũ mumuĩtu, ninduoo uupanga mumiani.

¹³ Ĩpa gua, nakutĩĩte ĩnkolo ĩo-ĩĩoo nya usuĩĩli kĩna naalĩ yandĩkue, “Alĩ nsuĩlĩĩle, kuitĩ ntambuĩle;” ishie nundiishie kusuĩlĩĩle, nukunsooko ĩĩ kwitambula,

¹⁴ kumanile kĩna naalumũiukilie ũShekulu Yesu ukakukũiukia sunga nindiishie palumuĩ nũYesu, nukukukutuala palumuĩ niniinie ntongela yaakue.

¹⁵ Kuitĩ tũlũ ingĩ kunsooko yaani, koona uukende pĩna wiongeeligua kuaasio naiingĩ, ĩmasongelio mĩĩ mingĩ kuukuluu wa kĩNzua.

Nzago kwityũngo nuukulu wa kalĩ nakalĩ

¹⁶ Kuitĩ sika kwitia ĩnsula; kanga uuntu wĩĩtu wakunzĩ ukulupale, uuntu wĩĩtu wa munsĩ ukutendaguaa upia lutondo kulutondo.

¹⁷ Kuitĩ injago zĩĩtu nampeepeele ĩzityũngo niino zukukuligĩlagiaa uukulu naukĩlĩkĩlĩĩle, naugila kiyalo, uwa kalĩ nakalĩ,

¹⁸ pĩna sika kukulaaa nazigyelĩĩle ĩpa nasika zigyelĩĩle; kuitĩ nazigyelĩĩle zikoolĩ ntondo nkeei udũũ; ĩpa gua nasika zigyelĩĩle zikoolĩ ĩkalĩ nakalĩ.