1 Yohana 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ugemi wa nkolo

¹ Aloogua, mulekishuĩĩla ĩnkolo zensi, ĩpa zigemĩ inkolo kanga ĩzipũnile kwa kĩNzua; kunsooko ĩanakĩdagu aulongo iingĩ igyelelaa muna unkũmbigyulu.

² Kunzĩla ĩĩ mumumanile uMuau wa kĩNzua; ĩnkolo yensi nĩkũmulĩĩle kĩna ũYesu Kilisito waazile mumuĩlĩ wa kĩuntu, ĩpũnile kwa kĩNzua.

³ ĩNkolo yensi nasika ĩmukũmulĩĩle ũYesu sika alĩ ĩpũnile kwa kĩNzua. Ĩĩ yaĩ nkolo ya mugilia-Kilisito namũigilie ya kĩna ĩpolokile, nunzuauu ĩkoolĩ muna unkũmbigyulu.

⁴ Ana ane, inie ingĩ mwa kĩNzua; niniiinie muadulile ĩaaso, kunsooko unuasio nuĩlĩ munsĩ yaani ingĩ mukulu kwikĩla uyo nuĩlĩ muna unkũmbigyulu.

⁵ ĩAasio ingĩ a unkũmbigyulu; luulo akũgaa ĩzaasio ĩza unkũmbigyulu, nuunkũmbigyulu ukuategeelaa.

⁶ Ishie kwa kĩNzua. uNuasio numumanile uNzua ukukutegeelaa, unuasio nasika wa kĩNzua sikukukutegeelaa. Kunzĩla ĩĩ kulekanuĩle ĩnkolo nya tai nĩnkolo nya ulimĩĩli.

Uloogua wa kĩNzua nuuloogua wa muntu

⁷ Aloogua, kwĩloogue ndiishie kundiishie; kunsooko uuloogua ukupũnaa kwa kĩNzua; wensi nutĩĩte uloogua mulelue nuNzua, kangĩ umulĩngile uNzua.

⁸ uNuasio nasika utĩĩte uloogua sikumulĩngile uNzua; kunsooko uNzua ĩngĩ uloogua.

⁹ uUloogua wa kĩNzua alĩ wigyelĩĩle kunsĩĩtu paapo pĩna alumutumile uMuana waakue nwing'ene muna unkĩmbigyulu kuligie upanga kwa kĩuyu.

¹⁰ Uu wau uloogua, sika kĩna alĩ kumuloogilue uNzua, ĩpa umuene alukuloogilue ishie, numutuma uMuana waakue watũle pyolia kunsooko ya mĩlandu yĩĩtu.

¹¹ Aloogua, malĩĩ uNzua alukuloogilue ishie itĩ, yukũjĩpĩĩle gua, nindiishie kukĩloogua.

¹² Ukutilĩ naalumuoonie uNzua kũtyũngo liensi. Kanga kwĩloogue, uNzua ukikyala munsĩ yĩĩtu nuuloogua waakue witimĩĩligua munsĩ yĩĩtu.

¹³ Kunzĩla ĩĩ kulĩngile ya kĩna kwikyalile munsĩ yaakue ninduyo munsĩ yĩĩtu, kunsooko wakukamantĩĩnie mwa kĩMuau waakue.

¹⁴ Nindiishie kwaoonie nukwikuĩla ya kĩna uTata wamutumile uMuana watũle Mugũni wa unkũmbigyulu.

¹⁵ Wensi nukũmulĩĩle kĩna ũYesu ingĩ Muana wa kĩNzua, uNzua ukikyalaa munsĩ yaakue, ninduyo munsĩ ya kĩNzua.

¹⁶ Nindiishie kuulĩngile nukukuusuĩĩla uuloogua nuutĩĩte uNzua kumiĩtu. uNzua ingĩ uloogua, nunuasio nukikyalaa muuloogua, ukikyalaa munsĩ ya kĩNzua, nuNzua ukikyalaa munsĩ yaakue.

¹⁷ Kunzĩla ĩĩ uuloogua ukamĩnkĩĩligua kumuĩtu, koona kuĩ nuukamatĩkũ palutondo lwa ulamulua, kunsooko kĩna wĩĩlĩ uzo, iio-iioo nindiishie kuĩlĩ munu muna unkũmbigyulu uu.

¹⁸ uUloogua ugila kaooa, ĩpa uuloogua naukamĩnkĩĩlũ ukutaagaa uooa kunzi, kunsooko uooa utĩĩte ukuua; umooa sika mukamĩnkĩĩligue muuloogua.

¹⁹ Iishie kutĩĩte uuloogua kunsooko muene alukuloogilue umuandio.

²⁰ Wensi kanga waũge; “Namuloogua uNzua,” ninduyo ĩumusuukĩĩlue umunũna waakue, uyu ingĩ mulongo; kuitĩ nasikumuloogilue umunũna waakue numuoonie, sika wishũũma gua, kukumuloogua uNzua nasikumuoonie.

²¹ iLyagĩĩlio ĩlĩ kuapeegue ninduyo, kĩna unuasio numuloogilue uNzua wamuloogue numunũna waakue gaa.