1 Yohana 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uUloogua wa kĩTata ukutongeelana kuupanga nauuza

¹ Laaĩ uu uloogua kĩ naalukupĩĩle uTata, sunga kuĩtua aana a kĩNzua; Nindiishie iio kuĩlĩ. Kunsooko ĩĩ uunkũmbigyulu sika ukulĩngile, kunsooko sika umulĩngile uyo.

² Aloogua, ĩpaiino kwĩaana a kĩNzua; sika yalakakigyelela kĩna kukitũla kuĩlĩ; ĩpa kumanile kĩna pĩna ukakigyelela kukakĩpiana ninduyo, kunsooko kukakumuona kĩna wĩĩlĩ.

³ Kangĩ wensi nutĩĩte uulaaĩĩli uu kumuakue ukĩeelagiaa, kĩna umuene namuelu.

ĩMĩlandu sika ĩkamantĩĩne nuwaana mwa kĩNzua.

⁴ Wensi nukutendaa umulandu ingĩ muleki; kangĩ umulandu ingĩ uleki.

⁵ Mumanile kĩna uzo alũgyelĩĩle waĩleegie ĩmĩlandu, numulandu ukutilĩ munsĩ yaakue.

⁶ Wensi nukikyalaa munsĩ yaakue sikukutimulaa, wensi nukutimulaa sikumuoonie sunga sikumulĩngile.

⁷ Ana ane, wensi waleke kumulimĩĩlia; wensi nukutendaa ĩkulukuuluu ingĩ munakulukuuluu, kĩna umuene namunakulukuuluu.

⁸ Nukutendaa ĩmĩlandu ingĩ wa kĩShetani, kunsooko ũShetani ukutendaa ĩmĩlanadu kwipũna umuandio. Kunsooko ĩĩ uMuana wa kĩNzua nwigyeleligua, koona waĩonoone ĩmĩlĩmo ya kĩShetani.

⁹ Wensi namulelue nuNzua sikukutendaa ĩmĩlandu, kunsooko ĩmpiani yaakue ikyalile munsĩ yaakue; sikusũũmile kwitenda ĩmĩlandu kunsooko mulelue nuNzua.

¹⁰ Kunzĩla ĩĩ ĩaana a kĩNzua igyelĩĩle, sunga ĩaana a kĩShetani gaa. Tũlũ wensi nasikukutendaa ĩkulukuuluu sika wa kĩNzua, sunga uuyo nasikumuloilue umunũna waakue.

¹¹ Kunsooko izi zozi mpola naalĩ mũigilie kwipũna umuandio kwĩloogue ndiishie kundiishie.

¹² Sika kĩna uKaini naalĩ wa kinuasio na Mubĩĩ, numuulaga umunũna waakue. Numuulaga kunsooko kĩ. Kunsooko uutendi waakue alĩ ubĩĩ, uwa munũna waakue alĩ wa kulukuuluu.

Uloogua wa kĩnũna

¹³ Mulekikulĩlua anũna aane, kĩna uunkũmbigyulu umusuukĩĩlue.

¹⁴ Ishie kumanile kĩna kwakĩlile kwipũna muukiu sunga kuupanga, kunsooko kualoogilue ĩanũna. uNuasio nasikukuloogaguaa, ukikyalaa muukiu.

¹⁵ Wensi nukumusuukĩlaguaa umunũna waakue ingĩ muulagi, niniiinie mumanile kĩna umuulagi wensi mugila kaupanga wa kalĩ nakalĩ naukikyalaa munsĩ yaakue.

¹⁶ Kunzĩla ĩĩ kuulĩngile uuloogua, kunsooko uyo alupũnilie uuumĩ waakue kunsooko yĩĩtu kunsooko ya anũna.

¹⁷ Ĩpa wensi kanga ĩutĩĩte inshao za munu muna unkũmbigyulu, kanga wamuone umunũna waakue namusilĩlue, nukukumugilĩlia ĩkĩsuusu kumuakue, uuloogua wa kĩNzua wikyalile mbii munsĩ yaakue?

¹⁸ Ana aane, kulekiloogua kulukaani katia palulĩmĩ, ĩpa yĩĩ kuutendi nukutai.

¹⁹ Kunzĩla ĩĩ kukilĩnga kĩna ishie kwa tai, nukuntongela yaakue kukikamia inkolo zĩĩtu,

²⁰ tũlũ pensi pĩna inkolo zĩĩtu zukukusokia; kunsooko uNzua ingĩ mukulu kwikĩla inkolo zĩĩtu, ninduyo ulĩngile tũlũ zensi.

²¹ Aloogua, inkolo zĩĩtu kanga zishiite kukusokia kutĩĩte uukamatĩkũ ntongela ya kĩNzua.

²² kangĩ luensi nakulompile, kukuluanũnkulaa kumuakue, kunsooko kukendegelĩĩle ĩmalagĩĩlio maakue nukwitenda nazĩmuloelĩĩlie pamiiso maakue.

²³ Ĩlĩ lyolĩ lyagĩĩlio liakue, kusuĩĩle muliina lya Muana waakue ũYesu Kilisito, nukukĩloogua ndiishie kundiishie, kĩna alukulagĩlĩĩlie.

²⁴ Nunuasio nukukendegeelaa ĩmalagĩĩlio maakue ukikyalaa munsĩ yaakue ninduyo munsĩ yaakue. Kunzĩla ĩĩ kulĩngile kĩna ukikyalaa munsĩ yĩĩtu, kunzĩla ya kĩMuau naalukupĩĩle.