1 Yohana 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Ana ane na mwanino, nukumuandĩkĩla izi mulekitimula. Kanga wensi watimule kutĩĩte uMualĩĩlia kwa kĩTata, Yesu Kilisito munakulukuuluu;

² Muene pyolia kunsooko yamĩlandu yĩĩtu; sika kunsooko ya mĩlandu yĩĩtu udũũ, ĩpa kunsooko ya mĩlandu ya unkũmbigyulu tũlũ.

Kwigomba ĩmalagĩĩlio maakue ingĩ ulagĩĩli wa ukamantani

³ Muasio kukulĩngĩlaa kĩna kumulĩngile, kanga kumakendegeele ĩmalagĩĩlio maakue.

⁴ Uzo nuũgile, “Numulĩngile,” ninduyo sikukumakendegelĩĩle ĩmalagĩĩlio maakue,, ingĩ mulongo, nĩtai yukutilĩ munsĩ yaakue;

⁵ uNuasio nulukendegelĩĩle ulukaani luakue, mumuakue uuloogua wa kĩNzua wakamĩnkĩlĩĩle ĩtai-taai. Muasio kulĩngile kĩna kuĩlĩ munsĩ yaakue.

⁶ Uzo nuũgile kĩna ukikyalaa munsĩ yaakue, yumũjĩpĩĩle umuene wagendele ii-oiioo kĩna uyo naalukugendelaa.

⁷ Aloogua, sika nukumuandĩkĩla kilyagĩĩlio nĩpia, ĩpa ilyagĩĩlo ĩlya kalĩ naalĩ mutĩĩte kwipũna umuandio. Nindĩlo ilyagĩĩlio ĩlya kalĩ ingĩ ulukaani luulo naalĩ mulũigilie.

⁸ Kangĩ niandĩka kumuani lyagĩĩlio nĩpia, lya tai munsĩ yaakwe kangĩ munsĩ yaani, kunsooko uwiilu wikĩla, nuweelu wa tai wakondagiaa kwieelia.

⁹ Uzo nukuũgaa kĩna wĩĩlĩ muweelu, ninduyo umusuukĩĩlue umunũna waakue, wĩĩlĩ muwiilu sunga nunzuauu.

¹⁰ uNuasio nukumuloogaguaa umunũna waakue ukikyalaa muweelu, sunga mumuakue kĩkutilĩ kakĩnkũpa.

¹¹ Ĩpa unuasio numusuukĩlue umunũna waakue wĩĩlĩ muwiilu, kangĩ ukugendelaa muwiilu, sunga sikumanile kĩna ulunziĩ, kunsooko uwiilu wamupokũilie ĩmiiso maakue.

¹² Nukumuandĩkĩla inie, ana namwanino, kunsooko mwaleegelagiguaa ĩmĩlandu yaani kunsooko ya liina liakue.

¹³ Nukumuandĩkĩla inie atata kunsooko mumulĩngile uyo naalukoolĩ kwipũna umuandio. Nukumuandĩkĩla inie asumbatĩ, kunsooko mumudulile uMubĩĩ. Numuandĩkĩĩle inie ana kunsooko mumulĩngile uTata.

¹⁴ Numuandĩkĩĩle inie atata, kunsooko mumulĩngiile uyo naalukoolĩ kwipũna umuandio. Numuandĩkĩĩle inie asumbatĩ, kunsooko muakamũ, nulukaani lwa kĩNzua lwikyalile munsĩ yaani, kangĩ mumudulile uMubĩĩ.

¹⁵ Muleke kuuloogua uunkũmbigyulu, sunga nazĩĩlĩ muunkũmbigyulu. Wensi kanga wauloogue uunkũmbigyulu, uuloogua kwa kĩTata ukutilĩ munsĩ yaakue.

¹⁶ Kunsooko kiensi nakĩkoolĩ muna unkũmbigyulu, nsula ya muĩlĩ, nĩnsula ya miiso, nulekeemo lwa uumĩ, sika zipũnile kwa kĩTata, ĩpa zipũnile muna unkũmbigyulu.

¹⁷ Nuunkũmbigyulu wikĩla palumuĩ ninshula zaakue, ĩpa unuasio nukutendaa uuloogua wa kĩNzua ukikyalaa sunga kalĩ nakalĩ.

Usuguli mumpola za agilia-Kilisito

¹⁸ Ana ane, ingĩ tyũngo lya mpelo; kĩna iio naalĩ mũigilie kĩna umugilia-Kilisito ũjile, sunga nunzuauu ĩagilia-Kilisito iingĩ igyelelaa; iio gua, kulĩngile kĩna ingĩ tyũngo lya mpelo.

¹⁹ Alĩ apũnile mumiĩtu, ĩpa sika alĩ a mumuĩtu. Kuitĩ kanga ĩalĩĩ ijilitũla a mumiĩtu, alĩ ijiliĩĩma palumuĩ nindiishie. Ĩpa gua, alĩ apũnile koona igyelele kĩna sika tũlũ a kumiĩtu.

²⁰ Ĩpa inie mwapakilue makũta nunuasio naMuelu, kangĩ mumanile tũlũ.

²¹ Sika alĩ numuandĩkĩĩle inie kunsooko sika mumanile ĩtai, ĩpa kunsooko mumĩmanile, kangĩ mumanile kĩna ukutilĩ kaulongo wensi naukũpunaa mutai.

²² Waani gua namuloongo isiititũla uuyo nukukaanaa ya kĩna ũYesu ingĩ Kilisito? Nuasio mugilia-Kilisito, nukumukaana uTata nuMuana.

²³ Tũlũ wensi nukumukaana uMuana mugila kaTata; uzo nukumukũmuulaa uMuana, unuasio utĩĩte nuTata gaa.

²⁴ Ĩpa gua inie, uluasio naalĩ mulũigilie kwipũna umuandio, lũkyale munsĩ yaani. Kanga uluasio naalĩ mulũigilie kwipũna umuandio lwikyale munsĩ yaani, paapo mukakikyala munsĩ ya muana numunsĩ ya kĩTata.

²⁵ Nĩndĩĩlĩ lyolĩ lyago naalukulagĩĩle ishie, uupanga wakalĩ nakalĩ.

²⁶ Numuandĩkĩĩle inie izi mumpola za asio naasiiile kukumulimĩĩlia.

²⁷ Ĩpa ĩmakũta naalĩ mumaligilie kumuakue makikyalaa munsĩ yaani, niniinie sika musiiile wensi wamumanie; ĩpa gua, kĩna iio ĩmakũta maasio makumumania impola tũlũ zensi, kangĩ maayo tai, sika ulongo, iio-iioo naalĩ mamumanilie inie; kyalĩ munsĩ yaakue.

²⁸ Ĩpaino ana namuaniino, kyalĩ munsĩ yaakue, koona pĩna ukakigyeleligua, kutũle nuukamatĩkũ, sunga kulekikolua kansoni ntongela yaakue pĩna ukiiiza.

²⁹ Kanga ĩmumanile kĩna uzo ingĩ munakulukuuluu, lĩngĩ, kĩna wensi nukutendaa ĩkulukuuluu mulelue ninduyo.