1 Akolinto 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya mutumua nya kusuula ĩkulukuuluu yaakue umuene

¹ Ĩne sika numukoleluane? Ĩne sika numutumuane? Ĩne sika alĩ numuooniene ũYesu Shekulu wĩĩtu? Inie sika mwĩmulĩmo waanene mwa kĩShekulu?

² Malĩĩ ĩne sika numutumua kuna ĩngĩ, ĩpa numutumua kunsiani inie, kunsooko umuntozo wa utumua waane ingĩ uniinie mwa kĩShekulu.

³ iShookeelio liane kuaasio nainkolekeelia ntĩĩlĩ.

⁴ Kuagilane kausũũmi wa kulĩa nukwikopa?

⁵ Kuagilane kausũũmi wa kumusola umusungu nusuĩlĩĩle tũlũ pensi kĩna ĩatumua naĩngĩ, nĩanũna a kĩShekulu, nuKefa?

⁶ Katia uneene dũũne nuBalinaba nakuagila usũũmi wa kusiititenda umulĩmo?

⁷ Mwĩlaasi kĩ nukuendaa kuulugu tyũngo tũlũ liensi kũlyĩpo liakue umuene? Waani nukupandĩlaa ĩmakota ma mĩzabiibu nasikukulĩaa inkali zaakue. Waani nukudĩĩma idyale, nasikukukopaa ĩmasunsu midyale?

⁸ Niũgane izi zĩ kĩuntu udũũ. uUlagĩĩlio sika uũgilenezozi-zozii?

⁹ Kuitĩ muUlagĩĩllio wa kĩMusa yandĩkue, “Uleke kumĩtũnga umulomo ĩng'ombe nayaipuula uupemba.” uNzua ukukendegeelaane ing'ombe?

¹⁰ Katia sikuũgilene izi kunsooko yĩĩtu udũũ? Yoi eeze, alĩ nandĩkue kunsooko yĩĩtu, kuitĩ nwilĩma ijĩpĩĩle kwilĩmaa kuulaaĩĩli; nduyo nwipuula kuuza nulaaĩlĩĩle kwiligia ityũmpĩ liakue.

¹¹ Malĩĩ ishie ĩalĩĩ kumupandĩlĩĩlie iintu ya kĩnkoolo, lukaani lukulune kwiogola iintu yaani ya kĩmuĩlĩ?

¹² Malĩĩ naĩngĩ akamantĩĩne muusũũmi uu mumiani, ishie sika nangũlũne? Ĩpa sika kuutumĩĩle uusũũmi uu; ĩpa nakugigimĩlia mumpola tũlũ koona kuleke kuzigilia iMpola na Nziiza za kĩKilisito.

¹³ Sika mumanilene kĩna ĩaaso naĩkĩtumaa muNumba ya kĩNzua akulĩaa iintu ya Numba ya kĩNzua, nĩaasio naĩkĩtumaa pawitekelo akutũlaa nityũmpĩ liao mũintu ya witekelo.

¹⁴ NũShekulu iio-iioo ulagĩlĩĩlie kĩna ĩaasio naakutanantagiaa iMpola na Nziiza ĩliĩsĩlie muumo ya muMpola naNziiza.

¹⁵ Ĩne gua, sika ntumĩĩle izi sunga nĩnalumuĩ. Kangĩ sikanandĩkile izi koona itũle iio kumuani; ingĩ taazu iiza nkie kwikĩlaũmuntu wensi watende uwĩkũmazukia waane wĩĩnakanda.

¹⁶ Kuitĩ kanga ntanantie iMpola na Nziiza, numugila ulwa kĩkumazukĩlia, kutilĩ kawĩnegelo; kangĩ ukĩa kumuane kanga nsiititanantia iMpola naNziiza!

¹⁷ Kuitĩ malĩĩnitenda umulĩmo kuuloa waane ntĩĩte kĩnamulĩmo; malĩĩ sika kuuloa waane nasuĩlĩĩlue uukendegeeli.

¹⁸ Kiani ĩkĩnamulĩmo kiane? Ingĩ kyokĩ, yakĩna pĩna nitanantia, mpũnilie iMpola naNziiza pĩnakutilĩ kilyĩpo, iio ndekitumĩla uusũũmi waane nanuutĩĩte muMpola naNziiza.

Shiio liakue kukualeeta ĩantu kwa kĩKilisito

¹⁹ Kuitĩ kanga ĩnaazaa numukolelua kuantu tũlũ, nitendaa numusese wa tũlũ, itĩ ndigie antu iingĩ nangũlũ.

²⁰ Nantũla zĩ Muyahũdi kuAyahũdi koona nĩaligie ĩAyahũdi; kuaasio naĩĩlĩ nsĩlĩlĩ ya Ulagĩĩlio nantũla zĩ nsĩlĩlĩ ya Ulagĩĩlio kanga ĩne uneene ĩsika nĩĩlĩ nsĩlĩlĩ ya Ulagĩĩlio nakĩĩ, koona nĩaligie naĩĩlĩ nsĩlĩlĩ ya Ulagĩĩlio.

²¹ Kuaasio naagila uUlagĩĩlio nantũla zĩ numugila Ulagĩĩlio, sika kĩna numugila kaUlagĩĩio kwakĩnzua, ĩpa nĩĩlĩ nsĩlĩlĩ ya Ulagĩĩlio kwakĩKilisito, koona nĩaligie ĩaasio naagila uUlagĩĩlio.

²² Kuaneketũ nantũla zĩ numuneketũ koona nĩaligie naaneketũ. Kuaasio tũlũ nantũla iio kĩnaĩili koona nĩagũne ĩantu kunzĩla tũlũ.

²³ Nineene nitenda izi tũlũ zensi kunsooko ya Mpola na Nziiza nkamantane palumuĩ ndĩo.

Ngũlũ nansiiigue kuligia uuduli

²⁴ Sika mumanilene kĩna naitiganilile kwimanka, kuuza amankile tũlũ, ĩpa nukuanũnkulaa ĩkĩpeegua ingĩ umuĩ? Mankĩ koona mukĩligie.

²⁵ Wensi nukĩtiganĩĩlaa ukĩgilagiaa mutũlũ zensi; Ĩaasio gua, koona aanũnkule ĩngala nyukoonekaa; ĩpa ishie nasika yukoononekaa.

²⁶ Iiogua, mankile iio-iioo, sika kĩna nukĩkankania; nĩkĩkua iio-iioo sika kĩna nukukuaa ĩnzega;

²⁷ ĩpa nukuwaagia umuĩlĩ waane nukuutontia; ilekitũla pĩna nakondia kukuatanantĩĩlia naĩngĩ, ĩne uneene ntũle wa kusiitua.