1 Akolinto 8 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Umania mumpola za mapolia ma anakĩlungu

¹ Kumpola za nama nampũnigue ipyolia kuanzegamĩla, kumanile kĩna “Ishie tũlũ kutĩĩte ulĩngi, uulĩngi ukuleeta lukeemo,” ĩpa uulogua ukuzengaa.

² Ĩpa muntu wensi kanga ĩwĩsĩĩgile kĩna umanile lukaani, sika walamana kalukaani kĩna yumũjĩpĩĩile kwimana.

³ Wensi kanga wamuloogue uNzua, uzo wamanagua ninduyo.

⁴ Iio gua, kumpola za kwilĩa ĩnama nampũnigue ipyolia kuanzegamĩla, kumanile kĩna “ĩanzegamĩla sika kĩntu” muna unkũmbigyulu nĩkangĩ kutilĩ “uNzua nuĩngĩ isiititũla umuĩ udũũ.”

⁵ Kuitĩ kanga atũle akoolĩ naĩĩtue anzua, yĩĩ kwigyulu katia muna nsĩĩ, kĩna iio naakoolĩ “anzua iingĩ” “niishekulu iingĩ,”

⁶ ĩpa gua, kunsĩĩtu ishie ukoolĩ uNzua umuĩ, mueneTata. Kumuakue uyu intu tũlũ naigyelela, nindiishie kumuakue kukoolĩ; kangĩ ukoolĩ ũShekulu umuĩ YesuKilisito; yensi naitũla ikoolĩ kwa kĩuyo, sunga nindiishie kukoolĩ kwakĩ uuyo.

Ukendegeeli wa nkolo za anũna naaneketũ

⁷ Ĩpa ĩmĩlimu ĩĩ sika ĩkoolĩ munsĩ ya antu tũlũ. Ĩpa amuĩ kukijiĩĩla nĩanzegamĩla sunga nunzuauu akulĩaa ĩnama kĩna tai mpũnigue ipyolia kuanzegamĩla, nĩmioo yaao kunsooko mĩneketũ, nĩdobia.

⁸ Kuitĩ india sika zukukulegelagia uugombigua kwa kĩNzua; kuluulo, kanga kwilĩa sika kukongeelagiguaa kakĩntu, nĩkanga kusiitilĩa sika kukukeepeelaguaa kakĩntu.

⁹ Ĩpa gua kendegeelĩ uusũũmi wani ulekitũla kĩmkũnpa kuaneketũ.

¹⁰ Kuitĩ umuntu na wakuona ue nutĩĩte uulĩngi wikyalansile pandia mwijumba lya anzua, kanga umoo waakue ĩmuneketu, sikukikamatĩkane sunga wamĩlie ĩnama nampũnigue ipyolia kuanzegamĩla?

¹¹ Itĩ unuasio namuneketũ wilimĩĩligua kuulĩngi wako ninduyo ingĩ munũna wa uKilisito naalukiile kunsooko yaakue.

¹² Kuitĩ pĩna mukuatimulĩla ĩanũna aani nukukuaalalia mumioo yao namĩneketũ, mukumutimũlĩlaa uKilisito.

¹³ Luulo gua, kanga india ĩzukumukũmpia umunũna waane, sika nijililĩa ĩnama kainino sunga ĩkalĩ nakalĩ, ndeke kumukũmpia umunũna waane.