1 Akolinto 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mĩntinka ya ntoola, kwishiititoola, nuwĩleli

¹ Ĩpa gua, mumpola zaasio naalĩ muandĩkile, ingĩ iiza umugoosia waleke kumutona umukĩĩma.

² Ĩpa kunsooko ya ugololia umugoosia wensi nuĩ numusungu waakue umuene, numusungu nuĩ numugoosia waakue.

³ uMugoosia wamupeele umusungu waakue muna ijĩpĩĩle, iio-iioo numusungu wamupeele umugoosia waakue muna ujĩpĩĩle.

⁴ uMusungu mugila kausũũmi mumuĩlĩ waakue, ĩpa umugoosia waakue; iio-iioo numugoosia mugila kausũũmi mumuĩlĩ waakue, ĩpa umusungu waakue.

⁵ Muleke kĩsiita isiititũla ĩmwĩgombĩlie kwityũngo, koona mwĩligĩlie ĩlioma lya kulompa; mwĩsũgamĩĩle kangĩ koona ũShetani waleke kumugema kunsooko ya usiita kĩgilia waani.

⁶ Mbũgile izi gua kuugombia waane, sika kũlyagĩĩlio.

⁷ Kuitĩ numuloe ĩantu tũlũ atũle kĩna ĩne nĩĩlĩ; ĩpa wensi utĩĩte ĩkĩpeegua kiakue umuene kwa kĩNzua, uyu itĩ numuua Itĩ.

⁸ Naaĩĩla gua ĩaasio nasika alatoola nĩakiĩlua, taazu ikyale kĩna ĩne nĩĩlĩ.

⁹ Malĩĩ ĩsika asũũmile kukĩgilia naatoole; kuitĩ ingĩ taazu kwitoola kwikĩla kwishonseelua nĩnsula.

¹⁰ Nĩaasio naakondile kukĩtoola nĩalagĩlĩĩlie, sika neene, ĩpa ũShekulu, umusungu waleke kĩleka numugoosia waakue. (

¹¹ Ĩpa malĩĩ ĩlekile ninduyo nũkyale yoi, walekitoolua, katia wakamantane numugoosia waakue;) nĩkangĩ umugoosia waleke kumuleka umusungu waakue.

¹² Naĩngĩ gua nĩaĩĩlĩĩle uneene, sika Shekulu; ya kĩna kanga munũna wensi ĩutĩĩte umusungu nasikusuĩlĩĩle, numusungu nuasio ĩugombile kukikyala ninduyo, waleke kumuleka.

¹³ Numusungu nutĩĩte umugoosia nasikusuĩlĩĩle, numugoosia nuasio ugombile kukikyala ninduyo, waleke kumuleka

¹⁴ Kuitĩ umugoosia nasikusuĩlĩĩle ukuelagiguaa kunzĩla ya musungu. Numusungu nasikusuĩlĩĩle ukuelagiguaa kunzĩla ya mugoosia; kanga ĩsika iio, ĩaana aani aza ijilitũla a udobũ, ĩpaino ingĩ eelu.

¹⁵ Ĩpa unuasio nasikusuĩlĩĩle na walege, walega udũũ. iYaasio umunũna namugoosia katia namusungu sika mutũngue. Ĩpa uNzua ukuĩtile kumatiliga.

¹⁶ Kuitĩ umanile mbii, ue numusungu, kĩna ukakumugũna umugoosia waako? Katia umanile mbii, ue numugoosia, kĩna ukakumugũna umusungu waako?

¹⁷ Ĩpa ũShekulu, kĩna alumoomolĩĩle muntu wensi, kangĩ kĩna uNzua alumuĩtile muntu wensi nwagendele muumo. Iio-iioo nilagĩĩlia mumakanisa tũlũ.

¹⁸ Ukooline kaumui pakatĩ yaani pĩna alimwitue naalĩ wakondile kwiyaalamigua? nwaleke kĩtenda zĩ sika mualamigue. uMuntu kanga wĩĩtue pĩna sika walaalamigua, nwalekiaalamigua.

¹⁹ Kwiaalamigua sika kĩntu nukũsiitiaalamigua sika kĩntu, ĩpa kũkendegeela ĩmalagĩĩlio ma kĩNzua.

²⁰ Wensi nwikyale muumo muna alĩ wĩĩlĩ pĩna alĩ muĩtue.

²¹ Alumuĩtue umusesene? Sika kĩntu; ĩpa na wasũũma kwitũla mukolelua, taazu yĩĩ iio.

²² Kuitĩ uyo naalĩ muĩtue mwa kĩShekulu naalĩ musese, ingĩ mukolelua wa kĩShekulu. Iio-iioo ninduyo namuĩtue naalĩ mukolelua ingĩ musese wa kĩKilisito.

²³ Alĩ muagulue kungele nkakũ; mulekitũla asese a antu.

²⁴ Anũna aane, muntu wensi nwikyale pa kĩNzua muumo munaalĩmuĩtĩlue.

²⁵ Kumpola za ananso numugila kilyagĩĩlio lya kĩShekulu, ĩpa nipũnia ishĩĩgo liane ĩne naalĩ numukolelue kĩnishungu kwitũla musuĩĩli.

²⁶ Iio gua, naona ikitũla iiza, kunsooko ya luago nalukoolĩ, kĩna ingĩ taazu umuntu kukikyala kĩna wĩĩlĩ.

²⁷ Umutũngue kumusungune? Ulekidũũma kwitũnguĩlua watũnguĩlaguaane kumusungu. Ulekidũũma kamusungu.

²⁸ Ĩpagua, kanga utoole umugila kautimu; numunanso kanga watoolue mugila kautimu; ĩaasio naĩtoolile ikitũla ninjago mumuĩlĩ; nineene nsiile kukumugilĩlia izi.

²⁹ Naũga itĩ anũna aane, ityũngo lya keepaa; kwipũna ĩpaino ĩaasio naa tĩĩte ĩasungu naatũle zĩ agila;

³⁰ nĩaasio nailĩla ĩĩ zĩ sika ilĩla; nĩnailumba zĩ sika ilumba; nĩnaigula zĩ agila kakĩntu.

³¹ Ndĩo naakuutumĩla uunkũmbigyulu uu zĩ sika akuutumĩla; kunsooko wikyaalĩ wa unkũmbigyulu uu ukĩlile.

³² Nsiile gua mutũle muagila kawĩkunkunalia. Uyo nasikutoolile ukuzikendegeelaa impola za kĩShekulu, kĩna wamuloeelie mbii ũShekulu;

³³ ĩpa uyo nutoolile ukuzikendegeelaa impola za unkũmbigyulu, kĩna wamuloeelie mbii umusuungu waakue;

³⁴ ukoolĩ wĩkĩlankĩli. uMusungu nasika mutoolue katia munanso ukuzikendegeelaa impola za kĩShekulu, koona watũle muelu mumuĩlĩ numunkolo gaa. Ĩpa nwatoolilue ukuzikendegeelaa impola za uunkũmbigyulu, kĩna wamuloelie mbii umugoosia waakue.

³⁵ Ntambuĩle izi kunsaĩlo yaani; sika ya kĩna numuĩĩkĩĩlie kĩnululi, ĩpa kunsooko nailoeelĩĩlie, kangĩ mumutumĩle ũShekulu ĩkutile kawĩnkankania.

³⁶ Ĩpa muntu wensi naa usĩĩgile kĩna sikumutendĩĩle umũuuligua waakue naiiza; kanga nsula yĩĩ nkulu, nĩkanga ĩmũjĩpĩĩle yĩĩ itĩ, nwatende gua muna usiiile naĩtoole udũũ; sika witenda kautimu.

³⁷ Ĩpa nuasio nuĩmĩkile kuukamũ munkolo yaakue, mugila kaoonatĩĩligua, nusũũmile kwitema uulooa waakue, nwĩkakie munkolo yaakue kukumukendegeela umuuligua waakue ukitenda iiza.

³⁸ Luulo gua, numutoolile umuuligua waakue utendile iiza; niĩ nduyo nasikutoolile utendille iiza nangũlũ.

³⁹ uMusungu ukutũngaguaa pĩna umugoosia waakue kĩlĩ muumĩ. Kanga umugoosia waakue ĩwakiile, ukutũnguĩlaguaa kwitoolua numuntu wensi numusiiile, mwa kĩShekulu udũũ.

⁴⁰ Ĩpa uyu muliukũ nangũlũ kanga wikyale yoi; iio moonie ĩne. Neene nsĩĩgile kĩna ĩne niineene ntĩĩte uMuau wa kĩNzua.