1 Akolinto 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩsokania wa AKilisito

¹ uMuntu wa kunsiai pĩna utĩĩte ulukaani kumuua usũũmilene kukumusokia ntongela yaao nasika anakulukuuluu, ilekitũla ntongela ya eelu?

² Sika mumanilene kĩna ĩeelu ijile kuulamula uunkũmbigyulu? Maalĩĩ uunkũmbigyulu wijililamulua niniinie, sika mũjĩpĩĩlene kwilamula ulamuli nauniino?

³ Sika mumanilene kĩna kwijile kualamula ĩamalaĩka? Sika nangũlũne inkaani za uumĩ uu!

⁴ Iio gua, kanga ĩmutĩĩte inkaani za kulamulua za uumĩ uu, nĩkĩ muaĩĩkile mwityengu lya ulamuli ĩaasio naagila kalukũmo mũkyanisa?

⁵ Ntambuĩle izi numukolie inshooni. Itĩ kunsiani kutilĩne kaumuĩ namunamasala, nusũũmile kwilamula inkaani za anũna aakue.

⁶ Ĩpa mukĩsokia kĩnũna kukĩnũna, kangĩ ntongela yaao nasika asuĩlĩĩle?

⁷ Iio gua, sunga kukĩsokia niinie kuniinie mulukaani luensi, ingĩ ulemua waani. Sika taazune kwitendelua uubĩĩ. Sika taazune kwinamantulua inshao zaani?

⁸ Ĩpa kuluandĩ luua mukuatendelaa ubĩĩ ĩantu nukukuanamantuula inshao zaao, sunga za ĩanũna aani.

⁹ Sika mumanilene kĩna nasika anakulukuuluu sika ijile kuusala utemi wa kĩNzua? Muleke kĩpembeelia; ĩagololia nĩatekela anzegamĩla, nĩasambo, nĩnaĩkĩgololagiaa akĩĩma atilĩ katia agoosia atilĩ,

¹⁰ nĩiii, nĩaawa, nĩnaakugaalaa, nĩatukani, nĩatũlani, sikaijile kuusaala uutemi wa kĩNzua.

¹¹ Nĩĩĩa kunsiani alĩ ĩkĩna awa. Ĩpa namoogigua, ĩpa namueligua, ĩpa namualĩĩligua ĩkulukuuluu muliina lya kĩShekulu Yesu Kilisito, nuMuau wa kĩNzua wĩĩtu.

uUdobũ sika yĩkĩgendi mwikyaalĩ wa Kilisito

¹² “Kumuane ĩne yukutilĩ naya mũiko,” ĩpa sika tũlũ naileetile ĩnsaĩlo. “Kumuane ĩne yukutilĩ naya mũiko,” ĩpa sika nikitũla musese wa tũlũ yensi.

¹³ “iNdia ingĩ kundaa, nĩndaa ingĩ kundia,” ĩpa uNzua uzilioonoona tũlũ. uMuĩlĩ gua sika kuugololia, ĩpa ingĩ kwa kĩShekulu, nũShekulu ingĩ kumuĩlĩ.

¹⁴ NuNzua alumũiukilie ũShekulu, nĩkangĩ ukakukũiukia nindiishie kungũlũ zaakue.

¹⁵ Sika mumanilene kĩina ĩmiĩlĩ yaani ingĩ pitũmpĩ pya kĩKilisito? Iio gua, nipisholene ipitũmpĩ pya kĩKilisito nukukupitenda pitũmpĩ pya mugololia. Sika iio!

¹⁶ Sika mumanilene kĩna uyo namukamantanigue numugololia ingĩ muĩlĩ umuĩ ninduyo? Kuitĩ uũgile, “ĩAasio naabĩlĩ ikitũla muĩlĩ umuĩ.”

¹⁷ Ĩpa uyo nukamantĩĩne nũShekulu ingĩ nkolo ĩmuĩ ninduyo.

¹⁸ Utalamĩ uugololia Mulandu wensi nukuutendaa umuntu ingĩ kunzi ya muĩlĩ waakue; ĩpa uyo nukugololagiaa ukuutimulĩlaa umuĩlĩ waakue umuene.

¹⁹ Sika mumanilene kĩna umuĩlĩ waani ingĩ Numba ya kiMuauMwelu nuili munsi yaani, naali mwapegue nu Nzua? Niniinie sika nsao yaani uniinie;

²⁰ kuitĩ alĩ muagulue kungele nkakũ. Mumukulie gua uNzua mumiĩlĩ yaani.