1 Akolinto 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ugololia naukĩlĩkĩlĩĩle

¹ iMpola zasapatĩĩle za tai kĩna kunsiani ukoolĩ ugololia, nuugololia kĩna waasio ukutilĩ sunga pakatĩ ya anakĩlungu, gaale umuntu numusola umusungu wa kishee.

² Niniinie namwĩkeema! Sika muoonie kausungu? koona waleegigue pakatĩ yaani unuasio naalutendile uutendi waasio.

³ Kuitĩ ĩne kanga ĩnukutilĩ kukĩmuĩlĩ nakĩĩ, ĩpa nkoolĩ kukĩnkoolo. Nakondagiaa kumulamula uyo naalutendile itĩ zĩ pĩna nkoolĩ.

⁴ Muliina lya kiShekullu Yesu, inie pĩna mwĩlundĩĩla ensi nĩnkolo yaane, palumuĩ ningũlũ za kĩShekulu wĩĩtu Yesu;

⁵ mumupũnĩlie ũShetani muntu nuasio kuoononeki wa muĩlĩ, koona ĩnkolo ĩgũnue palutondo lwa kĩShekulu.

⁶ Kukĩkũmazukia kumuani sika iiza. Sika mumanilene kĩna piugaasũ pikeei pyukugaasagiaa ipyũli liensi.

⁷ Luulo gua, muuleegie ugaasũ wakalĩ koona muĩ pyũli nĩpia, kĩna iio namuĩlĩ muagila kaugaasũ. Kuitĩ ĩnkolo ya Pasaka yĩĩtu alĩ mpũnigue pyolia, muene uKilisito.

⁸ Luulo gua, kutende lutondo lukulu, sika kuugaasũ wa kalĩ, katia kuugaasũ ubĩĩ nuoonooni, ĩpa kwipyũli nasika lĩgaasile, ndĩlo ingĩ ugolokũ wa nkolo nĩtai.

⁹ Alĩ numuandĩkĩĩle mumbalua yaane kĩna mulekikamantana nĩagololia;

¹⁰ Ĩpa sika mbũgile mulekikamantana nĩagololia a unkũmbigyulu uu, katia aawa, katia nĩatũlani katia nĩĩtekela anzegamĩla, kuitĩ yaasio aza ijile kumũjĩpĩla kukuupũna unkũmbigyulu uu.

¹¹ Ĩpa gua, paapo alĩ numuandĩkĩĩle kĩna mulekikamantana numuntu namuĩtue munũna na waa mugololia katia muawa, katia mwĩtekela anzegamĩla, katia mutukani, katia ukugaalaa katia mutũlani; umuntu kĩna uyu, mulekigomba sunga kwilĩania ninduyo.

¹² Kuitĩ injĩpĩĩle yaani kukualamula ĩaasio naĩĩlĩ kunzi? Sika mukualamulaane inie, ĩaasio namwĩensi niniinie?

¹³ ĩAasio naĩĩlĩ kunzi uNzua wijile kualamula. “Muleegiĩ unuasio namubĩĩ pakatĩ yaani.”