1 Akolinto 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mulĩmo wa atumua kwa kĩNzua

¹ Muntu nwakusĩĩgĩle itĩ, kĩna kwĩĩtumi a KĩKilisito nĩalindĩĩli a unkũnkũ wa kĩNzua,

² Kangĩ naishiiue mualindĩĩli, wensi wigyelele wĩĩ musuĩĩli.

³ Kumuane gua, sika kĩntu sunga kainiino namulue niniinie, katia nuulamuli wa kĩuntu; sika nĩlamuĩle sunga uneene.

⁴ Kuitĩ sika manile ĩnsooko ya kĩsokia uneene, ĩpa sika moonie kĩna nũmunakulukuuluu kunsooko ĩĩ, nukunamulaa gua, ingĩ ũShekulu.

⁵ Iio gua, mulekilamula kalukaani pĩna likaalĩ ityũngo liakue, sunga waaze ũShekulu; nunduyo wijile kuziĩĩka muwelu nazĩpisile muwiilu, nukukumigyelelia ĩmasĩĩgo ma nkolo; paapo muntu wensi wijililigia ulukũmo luakue kwa kĩNzua.

⁶ Anũna aane, kunsooko yaani nizitambuĩle izi zĩ mpiani ya kĩApolo nineene, itĩ kumpola zĩĩtu mwĩmanie mulekishĩĩga kwikĩla naalĩ nandĩkue; sunga umuĩ waleke kĩkũmazukĩlia kumuua kunsooko ya muntu nuĩngĩ.

⁷ Kuitĩ waani nukuoonie wĩkĩlankĩlile numĩaako? Kangĩ utĩĩte kĩntu kĩ nasikukianũnkuĩle? Malĩĩ alĩ waanũnkuĩle, nĩkĩ ukĩkũmazukia kĩna zĩ sika alĩ waanũnkuĩle?

⁸ Mwakondile kukikyuta! mwakondile kwigolĩpa! mwĩtemile pĩna ishie kukutilĩ! Taazu alĩ mũjilitema, itĩ nindiishie kuteme palumuĩ niniinie!

⁹ Itĩ nsĩĩgile kĩna uNzua wakupũnilie ishie atumua kumpelo, zĩ naalĩ alamulue aulague; kuitĩ kwalaailue kuumelua kuunkũmbigyulu, ntongela ya amalaĩka nĩantu.

¹⁰ Ishie kwĩanaulu kunsooko ya kĩKilisito, ĩpa inie muakola usugũ mwa kĩKilisito, ishie kuaneketũ, ĩpa inie mwa ngũlũ; inie mutĩĩte ukulu, ĩpa ishie kuagila kikyulio.

¹¹ Sunga ityũngo lyolĩ nalĩkoolĩ, kuakolue nzala nĩnoota, kukĩpuĩ, kukukuaguaa nkũndi, kuagila kawikyaalĩ,

¹² kangĩ kwiaaga kukĩtuma ĩmĩlĩmo kumĩkono yĩĩtu undiishie muna kwitukĩlua nakukembetana, muna kwipaatigua nakugigimĩlia,

¹³ Muna kwitũngigua kwagema kwikamantania; kwatũla zĩ malagala ma unkũmbigyulu, kangĩ zĩ udobũ wa intu tũlũ sunga nunzuauu.

Usĩĩgania nuusugulani wa utata

¹⁴ Sika nandĩkile izi numukolie inshoni, ĩpa kukumusugula zĩ aana aane aloogua.

¹⁵ Kuitĩ kanga muĩ nĩalangi gyana lya nzogũ kyumi mwa kĩKilisito, muagila kaatata naiingĩ. Kuitĩ ĩne neene naalĩ numulelile mwa kĩKilisito Yesu kunzĩla ya Mpola na Nziiza.

¹⁶ Luulo gua, numupeepilie muĩ atiati aane.

¹⁷ Kunsooko ĩĩ numutumile ũTimoteo kunsiani, umuana waane muloogua, musuĩĩli mwa kĩShekulu, nukakumũjukia iinjĩla zaane nazĩĩlĩ mwa KĩKilisito, kĩna nukumanagiaa mũkyanisa liensi tũlũ pensi.

¹⁸ Naĩngĩ gua, ĩkeemile kĩna zĩ sika nijile kunsiani.

¹⁹ Ĩpa nikiiiza kunsiani kuukaaũ, ũShekulu na walooa, nineene nikimana, sika lukaani luao naalĩ ĩkĩkeema, ĩpa ingũlũ zaao.

²⁰ Kunsooko uutemi wa kĩNzua sika wĩĩlĩ mulukaani ĩpa mungũlũ.

²¹ Musiiile yaani? Nĩĩze kunsiani nĩnkomene katia muulogua nĩnkolo ya upolo?