1 Akolinto 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ĩNkolo ya utemanuki ilamulua kĩna utimu

¹ Ĩne gua anũna aane, sika alĩ nsũũmile kukĩtambuĩla niniinie zĩ antu a kĩnkoolo, ĩpa zĩ naa kĩmuĩlĩ udũũ, zĩ aana naatakata mwa kĩKilisito.

² Alĩ numonkilie ĩmasunsu, sika alĩ numulĩĩsilie india nankakũ, kuitĩ sika alĩmwalasũũma kukuzilĩa. Sunga nunzuauu sika musũũmile,

³ kunsooko kĩlĩ mwĩantu a kĩmuĩlĩ udũũ. Kuitĩ kunsiani malĩĩ ukoolĩ wĩĩlũ nuwĩleei, sika mwĩantu a kĩmuĩlĩne, kangĩ sika mukugendelaa mukĩuntune.

⁴ Kuitĩ pĩna umuĩ uũgile, “ĩne na kĩPaulo,” umuua, “ĩne na kĩApolo,” sika mwĩantu a kĩmuĩlĩne?

⁵ uApolo gua waani? NuPaulo gua waani? Ingĩ ĩtumi nukuwĩtumi waao namusuĩĩla, muntu wensi muna ũShekulu alumupeelĩĩle.

⁶ Ĩne nampandĩla, uApolo nũitĩla ĩmaazĩ, ĩpa umukola kukulia ingĩ uNzua.

⁷ Iio gua nupandĩĩle sika kĩntu, sunga nũitĩĩle ĩmaazĩ, ĩpa ingĩ uNzua nukukulagiaa.

⁸ Luulo gua, uyo nukupandĩlaa ninduyonukũitĩlaa ĩmaazĩ ingĩ ilika lĩmuĩ, kangĩ wensi ukiligia kĩpeegua kiakue muumo-muumoo muna ukuagĩlaa umukola.

⁹ Kuitĩ ishie kukĩtumaa umulĩmo palumuĩ nuNzua; inie mwĩmugunda wa kĩNzua, mwĩnumba ya kĩNzua.

Mulĩmo wa amania

¹⁰ Kwilika lya ukende wa kĩNzua naalĩ numupeegue, ĩne zĩ numukulu wa azengi namukola masala nuuĩĩkile umukũlĩla; umuua wijenga mukiania yaakue.

¹¹ Kuitĩ umukũlĩla nuĩngĩ kutilĩ nusũũmile kukuuĩĩka, isiititũla uo nawakondile kwiĩĩkua, ingĩ ũYesu Kilisito.

¹² Ĩpa kanga umuntu wazenge mukiania ya mukũlĩla uu kuzahabũ katia kumpeesa, katia kupigũe napya ngele nkakũ, katia kumakota, katia kumasanzĩ, katia kunenge,

¹³ umulĩmo wa muntu wensi ukakigyelela. Kuitĩ uLutondo lukakigyelelia; kunsooko ukikũnukulua kumooto, numooto ukakuugema umulĩmo wa muntu wensi kĩna wilika kĩ.

¹⁴ uMulĩmo wa muntu nuzengile mukiania yaakue kanga wikyale, ukiligia ĩkĩpeegua.

¹⁵ uMulĩmo wa muntu kanga utekenteeligue, ukiligia ukapĩki; ĩpa uyo umuene ukigũnĩka, ĩpa zĩ kumooto.

¹⁶ Sika mumanilene inie kĩna mualĩĩ Numba ya kĩNzua, kangĩ kĩna uMuau wa kĩNzua wikyalile munsĩ yaani?

¹⁷ Numuntu kanga wamionoone ĩNumba ya kĩNzua, uNzua ukakumoonoona umuntu nuasio. Kuitĩ ĩNumba ya kĩNzua ingĩ nzelu, ndĩo ingĩ niinie.

¹⁸ Muntu waleke kĩpembeelia umuene, na wĩona kĩna munamasala pakatĩ yaani muna unkũmbigyulu uu, nwa tũle munaulu, koona watũle munamasala.

¹⁹ Kuitĩ ĩmasala ma unkũmbigyulu uu ingĩ ulu ntongela ya kĩNzua. Kuitĩ yandĩkue, “uzo ukuaguĩlagiaa ĩanamasala muwĩsukukia waao.”

²⁰ Nĩkangĩ, “ũShekulu umamanile ĩmasĩĩgo ma anamasala ya kĩna nakanda udũũ.”

²¹ Iio gua, kaumuĩwaleke kĩkũmazukĩlia ĩantu. Kunsooko tũlũ yensi yaani.

²² Kanga wĩĩ Paulo katia Apolo katia Kefa, katia unkũmbigyulu katia upanga katia nkia, katia ii naikoolĩ ĩpaino, katia io naikitũla; tũlũ yensi ingĩ yaani,

²³ niniinie ingĩ mwa kĩKiisito, nuKilisito ingĩ wa kĩNzua.