1 Akolinto 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mĩlimu ya kĩuntu nuukũnukuĩlua naupũnile kwa kĩNzua

¹ Nineene pĩnananĩĩza kunsiani anũna aane, sika alĩ nijile kukumutanantĩlia uukuĩli wa kĩNzua kumakaani na makulu katia kumasala.

² Kuitĩ alĩ nsiiile nsiitimana kalukaani isiitũla ũYesu Kilisito, nduyo mukononteelue mumusalaba.

³ Nineene alĩ nkoolĩ kunsiani muuneketũ numuooa ukulu numuukĩkĩmĩkia.

⁴ uLukaani luane nuutanantia waane sika alĩ munkaani za masala nazukualũtaa ĩantu, ĩpa kuutendi wa kĩMuau ningũlũ,

⁵ koona uusuĩĩli waani ulekitũla mumasala ma antu, ĩpa mungũlũ za kĩNzua.

⁶ Ĩpa makoolĩ masala nakukumatambulaa pakatĩ ya akamĩnkĩĩlũ; ĩpa sika masala ma unkũmbigyulu uu, katia ĩma aasio naautemile unkũmbigyulu uu, naioononeka;

⁷ ĩpa kukutambulaa ĩmasala ma kĩNzua muunkũnkũ, nalĩ mapisue, uNzua naalumaĩĩkile kwipũna umuandio wa unkũmbigyulu, kuukulu wĩĩtu.

⁸ ĩAkulu a unkũmbigyulu uu sika amalĩngile sunga nunumuĩ, kuitĩ kanga ĩalĩĩ amalĩngile sika alĩ ijile kumukononteela ũShekulu wa ukulu mumusalaba.

⁹ Ĩpa kĩna yandĩkue, “iIntu ĩliiso nasika alĩ lĩioonie sunga ukutuĩ sika alĩ wiigilie Sunga sika alĩ ingĩĩle munkolo ya muntu, iIntu uNzua naalĩ waazĩpĩlĩĩĩlie naamuloilue,”

¹⁰ uNzua gua ukukũnukulĩĩle ishie kwa kĩMuau. Kunsooko uMuau ukukeesagiaa tũlũ, sunga uunkũnkũ wa kĩNzua.

¹¹ Luulo gua, waani muantu nuzimanile nazikoolĩ munkolo ya muntu isiititũla ĩnkolo ya muntu nĩkoolĩ munsĩ yaakue? Iio-iioo nĩza kĩNzua ukutilĩ nuzilĩngile isiititũla uMuau wa kĩNzua.

¹² Nindiishie gua, sika nakuanũnkula ĩnkolo ya unkũmbigyulu, ĩpa uMuau nukupũnaa kwa kĩNzua, koona kuzilĩnge naalĩ kuapeegue nuNzua.

¹³ Ziizo kukuzitambulaa, sika munkaani namanigue kumasala ma kĩuntu, ĩpa namanigue nuMuau, kukuzilĩganĩĩlia inkaani za kĩnkoolo kuantu a kĩnkoolo.

¹⁴ Ĩpa umuntu kumasĩĩgo maakue umuene sikukuzaanũnkulaa ĩza kĩMuau wa kĩNzua; kuitĩ kumuakue zaasio ingĩ ulu, sunga sika wishũũma kukuzilĩpa, kuiti zukulekanulaguaa kunzĩla ya kĩnkoolo.

¹⁵ uMuntu wa kĩnkoolo ukuzilamulaa tũlũ, sunga umuene sikukulamulaguaa numuntu.

¹⁶ “Kuitĩ waani naalulĩmanile ishĩĩgo lya kĩShekulu, wamulange?” Ĩpa ishie kutĩĩte ishĩĩgo lya kĩKilisito.