1 Akolinto 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Mutũle atiati aane kĩna uneene nanumutiati wa kĩKilisito.

Wĩtũngi wa asungu mumĩlundo ikyanisa

² Numukũmazukilie gua, kuitĩ mwinjukile mumpola zensi, niniinie muuziambile intendo kĩna iio-iioo naalĩ numupũnĩĩlie.

³ Ĩpa nsiile mumane kĩna ityũe lya mugoosia wensi ingĩ uKilisito, nityũe lya musungu ingĩ umugoosia nityũe lya kĩKiisito iingĩ uNzua.

⁴ Mugoosia wensi pĩna wilompa katia pĩna wipũnia unakĩdagu nukwikũmba ityũe ukulĩkolia inshooni ityũe liakue.

⁵ Ĩpa musungu wensi pĩna wilompa katia pĩna wipũnia unakĩdagu pĩna sikukũmbile ityũe, ukulĩkolia inshoni ityũe liakue, kuluulo ingĩ ilika lĩmuĩ nunumuile.

⁶ Kuitĩ umusungu nulekile yoi ityũe, taazu wamũnsule. Kanga yĩĩ nsoni umusungu kwĩmũnsulua ĩmatũmbĩ katia kwimuugua, iiza wajialue mwityũe.

⁷ Kuitĩ umugoosia sika yumũjĩpĩĩle kũkũmba ityũe kunsooko ingĩ mpiani kangĩ ukulu wa kĩNzua. Ĩpa umusungu ingĩ ukulu wa mugoosia. (

⁸ Kuitĩ mugoosia sika alupũnile mumusungu, ĩpa umusungu, mumugosia.)

⁹ Sunga umugoosia sika alĩ muumbue kunsooko ya musungu, ĩpa umusungu kunsooko ya mugoosia.

¹⁰ Iio gua ijĩpĩĩle umusungu wĩkũmbe ĩkĩlĩngasĩĩlio kya wĩniinupia kũtyue kunsooko ya amalaĩka. (

¹¹ Ĩpa gua mwa kĩShekulu sikukoolĩ mugoosia wing'ene pĩna ukutilĩ umusungu, katia umusungu pĩna ukutilĩ umugoosia.)

¹² Kuitĩ kĩna iio umusungu naalupũnile mumugoosia, iio-iioo umugoosia nduyo ukulelaguaa numusungu. Niintu tũlũ yensi ipũnile kwa kĩNzua.

¹³ Lamulĩ uniinie kuniinie, iizane umusungu wamulompe uNzua pĩna sikukũmbile ityũe?

¹⁴ Uulagĩĩlio wiyuukĩ sika umulĩngiliene ya kĩna umugoosia kwitũla nĩmatũmbĩ namalĩĩpũ ingĩ nsoni kamuakue.

¹⁵ Ĩpa umusungu na waa nĩmatũmbĩ namalĩĩpũ ingĩ uukulu waakue; Kuitĩ mupeegue ĩmatũmbĩ namalĩĩpũ matũle palioma lijialo.

¹⁶ Malĩĩ muntu wensi waa usĩĩgile kwileeta nkungumi, ishie kuagila intendo kĩna zaasio, sunga ĩmakanisa ma kĩNzua.

¹⁷ Sika numukũmazukilie kukumulagĩĩlia izi kunsooko pĩna mukĩlundĩĩla, sika kunsaĩlo ĩpa kuukapĩki.

¹⁸ Kuitĩ kumuandio pĩna mwĩlundĩlĩĩle mwikyanisa, niigilie kĩna ukoolĩ ulekanuli kunsiani; nineene piipĩ kũshuĩĩla.

¹⁹ Kuitĩ kutilĩ kawĩnegelo kũtũla nuwĩleei kunsiani, koona naatai kunsiani igyelele kualiĩ.

²⁰ Luulogua, pĩna mwĩilingĩĩle palumuĩ sika ishũũmĩkile kwilĩa ĩndia ya kĩShekulu.

²¹ Kuitĩ umuĩ ukuutongelaa kwishola india zaakue muulĩi waasio, uyu namukolue nzala, uyu nugaalile.

²² Mbii itĩ! Muagilane inumba za kulĩĩla nukwikopela? Katia mulĩmelilene ikyanisa lya kĩNzua nukukuakolia inshoni naasilĩlue? Numuĩĩle yaani? Numukũmazukiene? Muizi, sika nukumukumazukia.

²³ Kuitĩ ĩne alĩ naanũnkuĩle kwa kĩShekulu nanumupeela inie, kĩna ũShekulu Yesu utiku waasio pĩna nusakigua nukĩsola ĩkĩgao;

²⁴ pĩna nukondia kwishongelia nukĩega, nuũga, “Uu wau muĩlĩ waane namupũnigue kunsooko yaani; tendĩ yoi mũnjuke ĩne.”

²⁵ Iio-iioo pĩna naakoondia kwilĩa, nukĩsola ĩkĩĩko, nuũga, “ĩKĩĩko ĩkĩ kyokĩ lyago, nĩpia mumugali waane; tendĩ yoi pensi pĩna mwikopa mũnjuke ĩne.”

²⁶ Iio gua, pĩna mukukĩlĩa ĩkĩgao ĩkĩ nukukukĩkopela ĩkĩĩko ĩkĩ, mukutanantagiaa nkia ya kĩShekulu sunga waaze.

²⁷ Luulo gua, wensi nwilĩa ĩkĩgao ĩkĩ nukwikopela ĩkĩĩko ĩkĩ ĩkya kĩShekulu pĩna sika wijĩpĩĩle ukaa wĩligĩĩlie utimu wa muĩlĩ numugali wa kĩShekulu.

²⁸ uMuntu wĩkolekeelie umuene, paapo wakĩlĩe ĩkĩgao nukukukĩkopela ĩkĩĩko.

²⁹ Kuitĩ nwilĩa nukwikopa pĩnasika wijĩpĩĩle, wilĩa nukwikopa uulamulua kumuakue, kunsooko sikuulekanuĩle.

³⁰ Kunsooko ĩĩ akoolĩ iingĩ kunsiani naaneketũ nĩaluĩle, nĩnaĩngĩ agonile.

³¹ Ĩpa kanga ĩaza kwĩkolekelĩĩlie, kĩĩsa sika aza kwijililamulua.

³² Ĩpa pĩna kwilamulua nũShekulu, kukusugulaguaa koona kulekilamulua kũkaasigua palumuĩ nuunkũmbigyulu.

³³ Luulo gua anũna aane, pĩna mwĩlundĩlĩĩle kwilĩa, iiza kukĩlĩndĩla.

³⁴ uMuntu na waa mukolue nzala walĩe kumuakue, muleke kĩlundĩĩla kuulamulua. Mumpola nazĩngĩ nazishaagile, pĩna nikiiza nĩkakuzilagĩĩlia.