1 Akolinto 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usuguli kwipũna mulugano lwa Aĩsilaeli

¹ Anũna aane, sika nsiiile mulekimana kĩna ĩatata ĩĩtu tũlũ alĩ ĩĩlĩ nsĩlĩlĩ ilyũnde; tũlũ naakĩla pakatĩ yananza;

² tũlũ naabadĩĩzigua kwa kĩMusa mwilyũnde numunanza;

³ tũlũ naalĩa uludia lulo-luuloo lwa kĩnkoolo;

⁴ tũlũ naakopa kĩkopelo kĩĩkio-kĩĩkioo ĩkya kĩnkoolo. Kuitĩ naakopela pyampa lya kĩnkoolo naalĩ lĩatiatile; nipyampa liasio alĩ uKilisito.

⁵ Ĩpa iingĩ dũũ pakatĩ yaao uNzua sika nuloeeligua ndĩo; kuitĩ naamalua mumbugi-melemele.

⁶ Izi gua nazitũla mpiani kumuĩtu, itĩ ishie kulekitũla antu a kuawa namabĩĩ kĩna ĩaasio naalĩ aawe.

⁷ Sunga mulekitũla ĩtekela-anzegamila kĩna naĩngĩ kumiao, kinayandĩkue, “Antu naikyalansile kwilĩa nukwikopa, naĩĩmĩka kũina.”

⁸ Sunga kulekitenda uugololia kĩna naĩngĩ naalĩ autendile, naagua lutondo lumuĩ ĩantu magana ma nzogũ makumi mabĩlĩ namatatu.

⁹ Sunga kuleke kumugema ũShekulu, kĩna naĩngĩ kumiao naalĩ amugemile, naoonoonua ninjoka.

¹⁰ Sunga kuleke kĩũlũnga kĩna naĩngĩ kumiao naalĩ ĩkĩUlũnga, naoonoonua nuMoonooni.

¹¹ Izi tũlũ alĩ aziligilie ĩaasio zĩĩ mpiani, nanandĩkue zukusugule ishie nakwapikĩlĩĩlue nĩmpelo ya unkũmbigyulu.

¹² Luulo gua nwĩsĩĩgile kĩna wĩĩmĩkie wĩlaaĩkie walekigua.

¹³ uUgemua sika alĩ umuligilie inie isiititũla alĩ umuendile muumo mukĩuntu, nuNzua ingĩ wa usuĩĩli, sikukakumuleka mugemue kwikĩlĩkĩĩla muna musũũmĩĩle; ĩpa palumuĩ nuugemua ukuzĩpagiaa ĩnzila ya kutalamĩla musũũme kwigigimĩlia.

Kukisugansuga nuwĩtekela anzegamĩla

¹⁴ Luulo gua alooguaaane, utalamĩ uwĩtekela anzegamĩla.

¹⁵ Nitambula zĩ nĩantu naakola usugũ, lamulĩ uniinie nanukulutambula.

¹⁶ ĩKĩĩko kya ukembetua nakukĩkembetile, sika nkamĩ ya mugali wakĩ Kilisitone? ĩKĩgao nakukĩegile sika nkamĩ ya muĩlĩ wa kĩKilisitone.

¹⁷ Kunsooko ĩkĩgao ingĩ kĩmuĩ, ishie nakwĩiingĩ kwĩmuĩlĩ umuĩ; kuitĩ tũlũ kukukamantanaa mukĩgao kĩĩkio kĩmuĩ.

¹⁸ Alaaĩ na aĨsilaeli kukĩmuĩlĩ naakulĩaa ĩmapolia, agilane kankamĩ nuitekelo.

¹⁹ Ntambule yaani gua? Ya kĩna nakĩpũnigue ipyolia kuanzegamĩla kĩntune? Katia kĩna ĩanzegamĩla kĩntune?

²⁰ Zũi, ĩpa iintu naapũnilie ipyolia ĩanakĩlungu aapũnĩĩliie ĩalungu; sika kwa kĩNzua. Sika numuloe inie kwikamantana nĩalungu.

²¹ Sika musũũmile kwikopela ĩkĩĩko kya kĩShekulu nĩkĩĩko kya alungu. Sika musũũmile kwilĩa pameeza ya kĩShekulu nĩpameeza ya ulungu.

²² Katia kumutende ũShekulu wĩĩ nuwĩĩlũne? Kutĩĩte ngũlũne kwikĩla uyo?

²³ “Kutilĩ kamũiko kumuane mũintu tũlũ,” ĩpa iintu tũlũ sika ileetile kansaĩlo. “Kutilĩ kamũiko kumuane mũintu tũlũ,” ĩpa sika intu tũlũ nayukuzengaa.

²⁴ Muntu walekidũũma kukĩsaĩpĩla umuene, ĩpa kukumusaĩpĩla umunakaa waakue.

²⁵ Kĩntu kiensi nakĩguligue mumagulĩlo lĩĩ udũũ, mulekikolekeelia kunsooko ya moo.

²⁶ Kuitĩ, “ĩNsĩĩ ingĩ yaakue ũShekulu sunga uwijuli waakue.”

²⁷ Malĩĩ umuntu nasikusuĩlĩĩle wamuana kundia, niniinie musiiile kwienda, lĩĩ tũlũ kiensinakĩĩĩkue ntongela yaani, mulekikolekeelia kunsooko ya moo. (

²⁸ Malĩ muntu wamuĩĩla, “ĩKĩntu ĩkĩ kĩpũnigue pyolia,” mulekilĩa kunsooko yaakue) naukaa wakulagĩĩlaa nukunsooko ya moo.

²⁹ Nitambula moo, sika waako, ĩpa waakue. Mulekilĩa nĩkĩ ukolelua waane ulamulue numoo wa muntu nuĩngĩ.

³⁰ Malĩĩ ĩnilĩa kwishongelio, ntukue nĩkĩ kunsooko ya kĩntu nanĩkĩsongĩĩlie.

³¹ Luulo gua, pĩna mwilĩa katia kwikopa katia kwitenda lukaani luensi, tendĩ tũlũ kuukulu wa kĩNzua.

³² Muleke kuakũmpia ĩAyahũdi katia ĩAgiliki katia ikyanisa lya kĩNzua;

³³ iio-iioo kĩna uneene nanĩaloelĩĩlie tũlũ mumpola zensi, ndekidũũma ĩnsaĩlo yaane uneene, ĩpa nsaĩlo yaao naiingĩ, koona agũnue.