1 Akolinto 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia nukwishongelia

¹ Paulo, naalĩ numuĩtue kwitũla mutumua wa kĩKilisito Yesu kuuloa wa kĩNzua, nuSositene umunũna wĩĩtu,

² kukumuandĩkĩla inie namwikyanisa lyakĩNzua nalĩkoolĩ kuKolinto, kuaasio naalĩ eeligue mwa kĩKilisito Yesu, nalĩ ĩĩtue atũle eelu, palumuĩ nĩaasio tũlũ naakulĩkulagyaa ĩliina lya kĩShekulu wĩĩtu Yesu Kilisito tũlũ pensi, Shekulu waao kangĩ wĩĩtu.

³ uUkende wĩĩ kumiani nĩmatiliga namapũnile kwa kĩNzua Tata wĩĩtu nukwa kĩShekulu Yesu Kilisito.

⁴ Numusongĩĩlie uNzua waane intondo tũlũ zensi kunsooko yaani, kuukende wa kĩNzua naalĩ muapeegue mwa kĩKilisito Yesu;

⁵ kuitĩ muyensi mwagolĩpiligue mumuakue munkani tũlũ numuumani tũlũ;

⁶ kĩna uukuĩli kwa kĩKilisito naalĩ ukamĩnkĩĩligue kunsiani;

⁷ sunga sika muakeepeelue kakĩpeegua tũlũ kiensi, pĩna mulaaĩlĩĩle dũũ uukũnukuĩlua wa kĩShekulu wĩĩtu Yesu Kilisito.

⁸ Ninduyo ukakumukamĩnkĩĩlia sunga ĩmpelo, mulekishokigua palutondo lwa kĩShekulu wĩĩtu Yesu Kilisito.

⁹ Nzua ingĩ wa usuĩĩli naalumuĩtile mũingĩle munkamĩ ya Muana waakue, ũYesu Kilisito Shekulu wĩĩtu.

Nkolo ya utemanuki mũkyanisa

¹⁰ Numupeepilie inie anũna aane, muliina lya kĩShekulu wĩĩtu Yesu Kilisito, muutambuli waani tũlũ mwĩgombie; ilekitũla kunsiani ulekanuki, ĩpa muĩ akamĩnkĩĩligue mũshĩĩgo lĩmuĩ nĩkialo kĩmuĩ.

¹¹ Kunsooko naĩĩlĩĩlue impola zaani anũna aane nĩaasio a munumba ya kĩKiloe, kĩna ukoolĩ wĩleei kumuani.

¹² ĩne gua, ntuulu nanaluũga, yakĩna wensi kunsiani ukuũgaa, “ĩne na kĩPaulo,” “ĩne na kĩApolo,” “ĩne na kĩKefa,” “ĩne na kĩKilisito.”

¹³ uKilisito utemanukilene? uPaulo alĩ mukononteeluene mumusalaba kunsooko yaani. Katia alĩ muabadĩĩziguene muliina lya kĩPaulo?

¹⁴ Numusongĩĩlie uNzua kunsooko sika alĩ numubadĩĩzilie kamuntu kunsiani, isiititũla uKilisipo nuGayo;

¹⁵ walekiũga sunga kaumuĩ kĩna alĩ muabadĩĩzigue muliina liane ĩne. (

¹⁶ Kangĩ nanĩabadĩizia nĩantu a munumba ya kĩSitefana gaa; kwikĩlĩkĩĩla ĩaasio sika manile kanga alĩ mbadĩĩzilie numuua, magu.)

¹⁷ Kuitĩ uKilisito sika aluntumile kukwabadĩĩzia, ĩpa kwitanantia iMpola na Nziiza; sika kumasala ma nkaani, umusalaba wa kĩKilisito ulekitũla nakanda.

Ngũlũ ya musalaba

¹⁸ Kunsooko ulukaani lwa musalaba kuĩo naalĩmĩlĩĩle ingĩ ulu, ĩpa kumuĩtu ishie nakuagũnue ingĩ ngũlũ za kĩNzua.

¹⁹ Kuitĩ yandĩkue, “Nikioonooona ĩmasala maao ĩanamasala, Nuusũgũ waao ĩasũgũ nĩkakuusiita.”

²⁰ Wĩĩlĩ mpĩĩ umunamasala? Wĩĩlĩ mpĩĩ umulangi? Wĩĩlĩ mpĩĩ umuleeta-nkungumi wa unkũmbigyulu uu? uNzua sikukumatendaane ĩmasala ma muna unkũmbigyulu uu kwitũla ulu?

²¹ Iio gua, mumasala ma kĩNzua, uunkũmbigyulu pĩna sika umumanile uNzua kumasala maakue, uNzua alĩ muloeeligue kukuagũna naasuĩlĩĩle kuutanantigua wa ulu.

²² Iio gua, ĩAyahũdi akusiiaa ilĩngasĩĩlio, ĩAgiliki akudũũmaa masala;

²³ Ĩpa ishie kukumutanantagiaa uKilisito naalĩ mukononteelue mumusalaba; kuAyahũdi nayĩĩ kĩnkũmpa, nukuAgiliki nawĩĩ ulu;

²⁴ ĩpakuaasio naĩĩtue, ĩAyahũdi nĩAgiliki gaa, ingĩ Kilisito, ngũlũ ya kĩNzua nĩmasala ma kĩNzua.

²⁵ Kuitĩ uulũ wa kĩNzua utĩĩte masala kwikĩla ĩmasala ma antu, nuuneketũ wa kĩNzua utĩĩte ngũlũ kwikĩla ingũlũ za antu.

²⁶ Laaĩ gua, anũna aane, uwĩĩtua waani, ya kĩna sika iingĩ ĩanamasala ma kĩmuĩlĩ, sika iingĩ ĩakola ngũlũ, sika iingĩ ĩakola ukulu naĩĩtue;

²⁷ Ĩpa uNzua nũishaagula iintu ya ulu ya unkũmbigyulu koona waakolie inshoni ĩanamasala uNzua nũishaagula iintu naineketũ ya unkũmbigyulu koona waikolie inshooni naikola ngũlũ;

²⁸ kangĩ uNzua nũishaagula nainiekũ ya unkũmbigyulu nĩnaimeleeligue, sunga nasika igyelĩĩle, koona naigyelĩĩle itũle nakanda;

²⁹ koona wensi namukola muĩlĩ kaumuĩ waleke kĩkũmazukia ntongela ya kĩNzua.

³⁰ Ĩpa kumuakue inie mukoolĩ mwa kĩKilisito Yesu naalĩ mutendue kumuĩtu wĩĩ masala namapũnile kwa kĩNzua, nĩkulukuuluu nuweeligua nuukomolua;

³¹ koona kĩna yandĩkue, “uMukola kĩkũmazukia wĩkũmazukĩlie mwa kĩShekulu.”