Kañaam 68 - Mankanya

Kayeeh kadëmanaani Naşibaţi anwatuŋ başooradul

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh.

² Naşibaţi anaţiin, başooradul bawayşër, banşooruluŋ baţi ţi kadunul.

³ Jibi udu ujaaŋ uwayşër, hënk di di ijaaŋ kwayëş baka. Jibi mbeela manjaaŋ mayuuy ţi bdoo, hënk di bañaaŋ bajooţ bakkeţuŋ ţi kadun ki Naşibaţi.

⁴ Kë bañaaŋ banwooŋ baŧool başë wo ţi mnlilan baŧaŋ ţi kadun ki Naşibaţi, aŧum na mnlilan.

⁵ Nayeeharën Naşibaţi, nayeehan katim ki nul. Nabomaan bgah bi andapiiŋ umpëlënŧ du pndiiş. Katimul kawooŋ Yawe Nawat Kabuka. Nawoon ţi mnlilan ţi kadunul !

⁶ Naşibaţi du ufëţ wi nul uyimanaan awo aşin banwaaŋuŋ bajug baka, aji yeŋan ñaaţ nayoţ.

⁷ Ul ajaaŋ ado banlowuŋ bañaaŋ bawo na bañaaŋ. Ul ajaaŋ ado bakalabuş bawo ţi bjeehi, kë bampataţiiŋ başë ji baduka du mboş mnwuţaan.

⁸ Iwi Naşibaţi, wi ipënuŋ ţi kadun ki pntaali pi nu, wi ipoşuŋ du pndiiş... Pnaţ ntiinku

⁹ ...kë mboş manşë şinţar, kë baţi baktul meel ţi kadun ki Naşibaţi, Naşibaţi i Ŧinayi, Naşibaţi i Iŧrayel.

¹⁰ Ido kë uşubal uweek wi bnuura ujoti ; pntaali pi nu pabi noor kë ido pa kë pakak ahinan.

¹¹ Iwi Naşibaţi, pntaali pi nu pafëţ du dko di ibiiŋ abomandër najuuk ţi bnuura bi nu.

¹² Nawat Kabuka aţup uţup, kë baaţ banjaaŋ baţup uţup ulil unuura mënţ baŧum maakan

¹³ aji : « Başih biki bangoli bajiŋ na pţi, kë baaţ bandukiiŋ du katoh bafaaşiir iko yi badukuŋ.

¹⁴ Napiinţ du dko di ŋnŧaam ŋajaaŋ ŋapiinţ kë ibaaklu yi ubalab ufaaŧal işë wo na unŧaam kë iluŋ iwo na uwuuru.

¹⁵ Wi Naşibaţi Anhiniiŋ Maakan agaruŋ başih, kë mpoj manşë jot ţi pnkuŋ pi Ŧalmon. »

¹⁶ Pnkuŋ pi Naşibaţi, pnkuŋ pi Başan ; pnkuŋ panŧumuŋ inkunkaali, pnkuŋ pi Başan.

¹⁷ An inkuŋ inŧumuŋ inkunkaali, we ukaaŋ kë nakñeebar pnkuŋ pi uliluŋ Naşibaţi kë afëţ da ? Aa, Nawat Kabuka afëţ da te mnţo.

¹⁸ Ŋkaaru ŋgutni ŋi ŋmpëlënŧ ŋakpuluŋ ŋi Naşibaţi ŋawo iñeen-week ŋyaaş ŋŧum, ŋaŧum pŧum paŋ. Nawat Kabuka awo ţi pŧoof pi ŋa, pnkuŋ pi Ŧinayi pawo du dko dyimanaan di nul.

¹⁹ Iwi Nawat Kabuka imob bañaaŋ ado bakalabuş, apaya bko duuţ na baka ado da ufëţ kë baluku bañaaŋ adoo luku bampataţiiŋ.

²⁰ Bnuura bawoon ţi Nawat Kabuka na ŋnuur ! Aji ţënk nja, ul awooŋ mbuur mi nja. Pnaţ ntiinku

²¹ Naşibaţi awo Naşibaţi anjaaŋ aţij mbuur, ilëman yi mnkeţ iwo yi Nawat Kabuka Ajugun.

²² Aa, Naşibaţi aluŋ kafom ikow yi başooradul, bkow banjabuŋ bi ñaaŋ anlilanuŋ ţi pla bţup pi adoluŋ.

²³ Nawat Kabuka aji : « Dluŋ kado baka bakakna Başan bajoob ; dluŋ kado baka bakakna du pndiiloŋ pi bdëk bajoob,

²⁴ nahilna naneejan ihoţ ţi pñaak, pndemënt pi ŋbuş ŋi nan payeenkna kafah ki ŋa ţi başooradu. »

²⁵ Iwi Naşibaţi, bawin ubi wi nu du dko dyimanaan, ubi wi Naşibaţi i naan, naşih i naan.

²⁶ Bayeeh bajot kadun, kë beegani bankkobuŋ ŋntambër ŋmpoţi, na bankkobuŋ iko iloŋ bakţaş baka.

²⁷ Nabeeban Naşibaţi ţi byit ! Nabeeban Nawat Kabuka ţi pŧoof pi pntaali pi Iŧrayel !

²⁸ Benyamin anwooŋ nabaaşa awuŋ ţi kadun ki baka, babuuşiin biki Yuda na imişa yi baka inknuuruŋ, babuuşiin biki Ŧabulon, babuuşiin biki Neftali.

²⁹ Naşibaţi i nu aţup aji iwo ñaaŋ anhiniiŋ. Iwi Naşibaţi, diimaan mnhina mi nu manlempuŋ na un maakan !

³⁰ Du katoh kaweek ki nu kanwooŋ du Yeruŧalem duuţ di başih bakţijuŋ iko kaţenu,

³¹ Ŋomaan na ulimariya wi bjaagal bi bdëk ; ŋomaan na pntaali panwooŋ ji pntuni pi ŋgit ŋkaş na pi ŋbay, panjaaŋ pakunţan pa itaka imbomanaanuŋ unŧaam. Garan ŋŧaak ŋanjaaŋ ŋaŋal ugut !

³² Bayilna bañaaŋ du Ejiptu. Bañaaŋ biki uŧaak wi Iŧiyopiya baţiirad Naşibaţi awo na iko iŧum ţi iñen.

³³ An ŋŧaak ŋi mboş nayeeharën Naşibaţi ! Nayeehan nañaamarën Nawat Kabuka ! Pnaţ ntiinku

³⁴ Nayeeharën andapiiŋ umpëlënŧ du baţi duuţ, baţi bi unjon ! Natenan, ado pdiim, pdiim pi nul panwooŋ na mnhina.

³⁵ Nayikrënan mnhina mi Naşibaţi ! Awo ţi Iŧrayel duuţ, mnhina mi nul manwo du infëluŋ.

³⁶ Iwi Naşibaţi, iyibani du ŋfëţ ŋyimanaan ŋi nu. Naşibaţi i Iŧrayel ajaaŋ awul pntaali pi nul mnhina mnweek. Bnuura bawoon ţi Naşibaţi !