Kañaam 31 - Mankanya

Pţu mnhaţ ţi Naşibaţi ţi wal wi unoor

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ .

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Iwi Yawe Nawat Kabuka, du iwi di di njaaŋ kamennaana ; kwut nin bakowandënaan ! Iji kwayëş pwayëş pŧool, dolaan mbuur.

³ Watan kabaţ iŧiinkën, ŧaraan ibuuranaan. Woon pnkuŋ pi nji ntëŋnuŋ, woon katoh ki ŋniw ŋankëmuŋ kanjaaŋ kabuuranaan.

⁴ Iwi iwooŋ pnkuŋ pi nji ntëŋnuŋ, iwo katoh ki ŋniw ŋankëmuŋ ; katim ki nu, kakaaŋ kë ikţoŋën adiimanaan bgah.

⁵ Iluŋ kapënanaan ţi bţaaw bi babëkanaanuŋ, du iwi di di njaaŋ kamennaana.

⁶ Iwi Nawat Kabuka ijaaŋ kbuuranaan, iwooŋ Naşibaţi na manjoonan ; dbëkan uhaaş naan ţi iñen yi nu.

⁷ Dşoor banjaaŋ badëman iko inaaf inwooŋ iinwo Naşibaţi ; nji, dţu mnhaţ mi naan ţi Nawat Kabuka.

⁸ Iŋalën ukaaŋ kë nlilan maakan aki ; iwin mnhaj mi naan, ime unoor wi uhaaş wi naan.

⁹ Iinwutën du iñen yi naşoorad naan, inaţanaan, alowanaan du.

¹⁰ Iwi Nawat Kabuka ñagi'aan, dnoor maakan ! Mnţëg manfëlanaan këş, dnoor ţi uhaaş anoor ţi uleef.

¹¹ Unuur unjinţi dji kahaj, ŋşubal ŋi naan ŋaţëp ţëp ţi ŋwooni. Pekadu di naan dabeewanaan iñen, imoh yi naan iyoji.

¹² Başoorad naan bŧi bakarën, nji dwooŋ mnkow mi bakinţ naan, bañaaŋ bammeeŋ nji baţi'ën. Woli bawinën du bgah, baji baţi kalowën.

¹³ Baţilmi'aan apënanaan ţi ŋşal ji ñaaŋ ankeţuŋ ; dwo wo ji uko unŧokiiŋ afël.

¹⁴ Dŧiink iko iwuţaan yi bañaaŋ bakţupuŋ ţi nji. Palënk kë pawo ţi ŋmbaŋ bŧi ; bayit bŧi aŧiinkar pnaţara nji, baţiini aŧiinkar pfiŋën.

¹⁵ Iwi Nawat Kabuka, dţu mnhaţ mi naan ţi iwi, dji kaji : « Iwi, iwooŋ Naşibaţi i naan. »

¹⁶ Ŋnuur ŋi naan ŋawo ţi iñen yi nu ; buuranaan ţi iñen yi başoorad naan, ţi iñen yi bankdookaruŋ na nji.

¹⁷ Dolan bjeehi bi kaara di nu bawinana ţi nji nwooŋ nalemparu ; wi iŋalnuŋ, buuranaan.

¹⁸ Iwi Nawat Kabuka, kwutën nkowa wi nji kadu'iiŋ, işë ikowandën bañaaŋ bajooţ, ido baka bawala byompan du mnkeţ.

¹⁹ Dëŧan mntum mi baţilan mënţ, banjaaŋ baţiini ţi anwooŋ naŧool ţi këş ki nu na mngam na phomp na bbeehar.

²⁰ Iwi Nawat Kabuka, iko inuura yi ihankaruŋ banjaaŋ baŧiinku idëmi. Ţi kadun ki bañaaŋ bŧi iji kwul ya bankmbiiŋ kamena du iwi.

²¹ Bukuŋ mënţan iji kmen baka du dko di iwooŋ ; iji klowan baka kaguuru ki bañaaŋ bajën ; iji kpënan baka ţi mntum mi bañaaŋ.

²² Iwi Nawat Kabuka dbeebu, dbi wo ji ubeeka wi bakgutaruŋ kë işë diimanaan uŋal wi nu unwooŋ uunkba.

²³ Dñoŋar adoo ji ţi uşal : « Nji wi adookana alow këş ki nu. » Kë işë ŧiinkën wi nji nkooţiiŋ, wi nji nhuuranuŋ adu'u.

²⁴ An bŧi nanjaaŋ naţaş Nawat Kabuka na manjoonan, naŋalana ! Nawat Kabuka aji beel banfiyaaruluŋ, kaşë kob maakan banjaaŋ badeeŋ igaŋan.

²⁵ An bŧi nanhaţuŋ Nawat Kabuka, natamaan, naţuun uşal !