Kañaam 136 - MankanyaKayeeh ki pbeebna Yawe Nawat Kabuka 1 Nabeeban Yawe Nawat Kabuka, awo na bnuura ; uŋal wi nul uunji uba ! 2 Nabeeban Naşibaţi Andëmuŋ maakan, uŋal wi nul uunji uba ; 3 Nabeeban Ajugun Andëmuŋ maakan, uŋal wi nul uunji uba ! 4 Nabeebana, ul aloolan anjaaŋ ado iko iñoŋarënaan ; uŋal wi nul uunji uba ! 5 Nabeebana, ul ampaşuŋ baţi ţi mntit mi nul ; uŋal wi nul uunji uba ! 6 Nabeebana, ul anşeefuŋ mboş ţi meel duuţ ; uŋal wi nul uunji uba ! 7 Nabeebana, ul ampaşuŋ iko iloŋ iweek injaaŋ ijeehan, uŋal wi nul uunji uba ! 8 Apaş bnuur kë baji başih na pnak, uŋal wi nul uunji uba ! 9 Apaş pli na ŋjah kë ŋaji ŋaşih na uŧejan ; uŋal wi nul uunji uba ! 10 Nabeebana, ul anfiŋuŋ biinţ bajeen bŧi ţi Ejiptu, uŋal wi nul uunji uba ! 11 Ado haŋ apënanaan biki Iŧrayel du Ejiptu, uŋal wi nul uunji uba ; 12 Apënan baka da na mnhina mnweek mi kañenul, uŋal wi nul uunji uba ! 13 Nabeebana, ul anjeepşuŋ bdëk bjeenkal, uŋal wi nul uunji uba ; 14 ado kë bañaaŋ biki Iŧrayel baţëp ţi pŧoof pi ba, uŋal wi nul uunji uba ; 15 aşë wat Farawuna naşih na bangoli biki nul du bdëk ; uŋal wi nul uunji uba ; 16 aţoŋ pntaali pi nul du pndiiş ; uŋal wi nul uunji uba ! 17 Nabeebana, ul ankobuŋ başih bankaaŋ mnhina mnweek, uŋal wi nul uunji uba ! 18 Nabeebana, ul anfiŋuŋ başih bankaaŋ mnhina mnweek, uŋal wi nul uunji uba ! 19 Nabeebana, ul anfiŋuŋ Ŧihon, naşih i Bahamorit, uŋal wi nul uunji uba ! 20 Nabeebana, ul anfiŋuŋ Og, naşih i Başan ; uŋal wi nul uunji uba ! 21 Nabeebana, ul anjejuŋ ŋŧaak mënţ awul pntaali pi nul ; uŋal wi nul uunji uba 22 Nabeebana, ul anjejuŋ ŋŧaak mënţ awul biki Iŧrayel, bukal banwooŋ biki nul ; uŋal wi nul uunji uba ! 23 Nabeebana, ul anleşuŋ nja wi ŋwooŋ ţi mnkow ; uŋal wi nul uunji uba ! 24 Nabeebana, ul ampënanuŋ nja ţi iñen yi başoorad nja ; uŋal wi nul uunji uba ! 25 Nabeebana, ul anjaaŋ awul bañaaŋ bŧi na ŋko ŋanwooŋ na uhefënţ uko ude ; uŋal wi nul uunji uba ! 26 Nabeeban Naşibaţi, uŋal wi nul uunji uba ! |
© 2014, Wycliffe Bible Translators, Inc. in cooperation with Le Groupe CIM-TBM, Senegal
Wycliffe Bible Translators, Inc.