یعقوب 2 - Peymana Nû (Încîl)

Firqîyê nekine nava meriva

¹ Xûşk-birayêd min! Hûn ku bawermendêd Xudanê me Îsa Mesîhê xweyîrʼûmet in, firqîyê nekine nava meriva.

² Mesele, gava yekî gustîla zêrʼ tʼilîyêda û kʼincêd rʼewş wergirtî bê civîna we, usa jî yekî belengaz bi kʼincêd pʼizinîva bê

³ û hûn dîna xwe bidine yê xweyê kʼincêd rʼewş û bêjinê: «Kʼerem ke vê jorê rʼûnê», lê yê belengazrʼa bêjin: «Ser pʼîya bisekine» yan jî «vê jêrê rʼûnê»,

⁴ gelo hûn nava xweda firqîyê danaynin û nabine hʼakimêd fikirêd xirab?

⁵ Bibihên xûşk-birayêd mine delal! Ne Xwedê belengazêd vê dinê bijartin, wekî bi bawerîyê dewletî bin û warêd wê Pʼadşatîyê bin, kʼîjan ku Xwedê wanrʼa soz daye, yêd ku Wî hʼiz dikin?

⁶ Lê hûn belengaza bêhurmet dikin! Çima ew yêd dewletî nînin, ku zorê li we dikin û we kʼaşî ber dîwanê dikin?

⁷ Çima ew nînin, yêd ku wî navê qenc bêhurmet dikin, kʼîjan ser we ye?

⁸ Heger hûn qanûna Pʼadşatîyê biqedînin, li gora nivîsara ku dibêje: «Hevalê xwe weke xwe hʼiz bike», hûn qenc dikin.

⁹ Lê heger hûn firqîyê dikin, guna dikin û hindava Qanûnêda dibine yekî gunekʼar.

¹⁰ Ewê ku tʼemamîya Qanûnê xwey dike, lê tiştekî jê berʼdide, ew dibe deyndarê tʼemamîya Qanûnê.

¹¹ Çimkî Ewê ku got: «Zinîyê neke» usa jî got: «Nekuje». Awa heger zinîyê nekî, lê bikujî, dîsa Qanûnê ditʼerʼibînî.

¹² Xeberdan û kirinêd xweda usa bin, çawa yêd dîwana wanê bi wê qanûnê bibe, ya ku azayîyê dide.

¹³ Çimkî bê rʼeʼm wê dîwana bêrʼeʼma bibe, lê rʼeʼm li ber dîwanê rʼûspî dike.

Bawerî û kirin

¹⁴ Çi feyde xûşk-birayêd min, heger yek bêje ku bawerîya wî heye, lê kirêd wî tʼunebin? Gelo eva bawerîya dikare wî xilaz ke?

¹⁵ Mesele, heger birak yan xûşkek sitʼar lê tʼunebe yan hʼewcê nanê rʼojê be,

¹⁶ ji we yek wanrʼa bêje: «Bi xêr û silamet herʼin, germ û tʼêr bin», lê tiştêd ku ew hʼewce bin nede wan, çi feyde?

¹⁷ Usa jî bawerî, heger kirêd wê tʼunebin, bi tʼenê mirî ye.

¹⁸ Lê yekê bêje: «Bawerîya te heye, kirêd min hene». Lê ezê bêjim: Kʼa bawerîya xwe bê kirina nîşanî min ke, ezê jî bawerîyê bi kirinêd xweva nîşanî te kim.

¹⁹ Tu bawer dikî, ku Xwedê yek e. Qenc e! cin jî bawer dikin û dibizdin.

²⁰ Lê tu dixwazî ev yek bê îzbatkirinê, merivê bêhʼiş, wekî bawerî bêyî kira mirî ye?

²¹ Ne Birahîmê bavê me bi kira rʼast hate hʼesabê, gava kurʼê xwe Îshaq danî ser gorîgehê, ku bike qurban?

²² Tu dibînî ku bawerîyê tʼevî kirêd wî ya xwe kir û bi wan kira bawerî kʼamil bû?

²³ Û gotina nivîsarê hate sêrî, ku dibêje: «Birahîm Xwedê bawer kir û ew jêrʼa rʼastî hate hʼesabê» û dostê Xwedê hate gotinê.

²⁴ Hûn dibînin ku meriv bi kira rʼast tê hʼesabê, ne ku tʼenê bi bawerîyê?

²⁵ Ne usa jî Rʼexaba çʼeʼvder bi kira rʼast hate hʼesabê, gava ceʼsûs qebûl kirin û ew rʼêke dinva verʼêkirin?

²⁶ Awa çawa qalib bê rʼuhʼ mirî ye, usa jî bawerî bêyî kira mirî ye.